Goru Chikkudu Pachadi: ఇన్నాళ్లూ ఈ రుచి తెలియక మిస్ అయ్యారా? విలేజ్ స్టైల్ గోరుచిక్కుడుకాయ రోటి పచ్చడి
మన సాంప్రదాయ తెలుగు వంటకాలలో రోటి పచ్చళ్లకు ఉన్న ఆదరణే వేరు. మిక్సీలో రుబ్బిన పచ్చడి కంటే రోట్లో దంచిన పచ్చడి రుచి ఎప్పుడూ రెట్టింపుగా ఉంటుంది. సాధారణంగా గోరుచిక్కుడుకాయలతో ఎక్కువగా ఇగురు కూర లేదా వేపుడు తయారు చేస్తుంటారు. కానీ గోరుచిక్కుడుకాయలతో ఎంతో మధురమైన రోటి పచ్చడి కూడా చేసుకోవచ్చు అన్న విషయం చాలామందికి తెలియదు.
పాతకాలంలో పల్లెటూర్లలో అమ్మమ్మలు, నానమ్మలు చేసే ఈ సాంప్రదాయ గోరుచిక్కుడుకాయ రోటి పచ్చడి వేడి వేడి అన్నంలోకి నంజుకుని తింటే ప్లేట్ ఖాళీ అవ్వాల్సిందే. ఈ పచ్చడి తయారీ విధానం ఎంతో సులభం. ముందుగా గోరుచిక్కుడుకాయలను శుభ్రంగా కడిగి తుంచి పెట్టుకోవాలి.
ఒక ప్రెజర్ కుక్కర్లో గోరుచిక్కుడుకాయ ముక్కలు, కొద్దిగా నీళ్లు, ఉప్పు వేసి రెండు విజిల్స్ వచ్చే వరకు ఉడికించుకోవాలి. ముక్కలు మెత్తగా ఉడికిన తర్వాత నీటిని వడకట్టి పక్కన పెట్టుకోవాలి. ఇప్పుడు బాండీలో కొద్దిగా నూనె వేసి పచ్చిమిరపకాయలు, వెల్లుల్లి రేకలు, జీలకర్ర, కరివేపాకు, చిన్న నిమ్మకాయ సైజు చింతపండు మరియు కొత్తిమీర కాడలు వేసి పచ్చివాసన పోయేలా బాగా ఫ్రై చేసి చల్లారనివ్వాలి.
ఇప్పుడు అసలైన ఘట్టం రోటి రుబ్బుడు! శుభ్రమైన రోట్లో ముందుగా వేయించిన పచ్చిమిర్చి, కొత్తిమీర మిశ్రమాన్ని, తగినంత ఉప్పు వేసి కచ్చాపచ్చాగా దంచుకోవాలి. ఆ తర్వాత ఉడికించిన గోరుచిక్కుడుకాయ ముక్కలను వేసి మరీ మెత్తగా పేస్ట్లా కాకుండా, ముక్కలు కనిపించేలా దంచుకోవాలి. మధ్యలో పచ్చడి లూజ్గా రావడానికి ఉడికించిన గోరుచిక్కుడుకాయ నీటిని వాడుకోవచ్చు.
చివరగా ఉల్లిపాయను పెద్ద ముక్కలుగా చేసి రోట్లో వేసి కచ్చాపచ్చాగా నలగ్గొట్టాలి. ఉల్లిపాయ రసం పచ్చడిలో కలవడం వల్ల అద్భుతమైన రుచి వస్తుంది. తయారైన పచ్చడిని బౌల్లోకి తీసుకుని తాలింపు పెట్టుకోవాలి. బాండీలో నూనె వేడి చేసి తాలింపు గింజలు, కచ్చాపచ్చాగా దంచిన వెల్లుల్లి, ఎండుమిర్చి, చిటికెడు ఇంగువ, కరివేపాకు వేసి దోరగా వేయించాలి.
ఈ తాలింపులో రుబ్బిన పచ్చడిని వేసి కలిపితే గుమగుమలాడే గోరుచిక్కుడుకాయ రోటి పచ్చడి సిద్ధమవుతుంది. ఈ పచ్చడికి ప్రత్యేకంగా ఉడికించే పని లేదు. పచ్చడి ప్రియులకు, ముఖంగా ముద్దపప్పు అన్నంలోకి ఈ పచ్చడి ఒక వరమనే చెప్పాలి. మీరు కూడా ఒకసారి ఇంట్లో ప్రయత్నించి చూడండి.