కాకి ఒక్క కన్నుతోనే చూస్తుందా..? శ్రీరాముడు కాకిపై బ్రహ్మాస్త్రం ఎందుకు ప్రయోగించాడు? అసలు కథ ఏమిటి!
Why Crow Looks With One Eye: అరణ్యవాసంలో ఉన్న సమయంలో శ్రీరాముడు, సీతాదేవి చిత్రకూట పర్వతం వద్ద నివసిస్తున్నారు. ఒక రోజు శ్రీరాముడు సీతాదేవి ఒడిలో తల పెట్టుకుని విశ్రాంతి తీసుకుంటూ నిద్రపోతాడు. ఆ సమయంలో ఇంద్రుడి కుమారుడు జయంతుడు గర్వంతో కాకి రూపంలో అక్కడికి వచ్చి సీతాదేవి వక్షస్థలాన్ని తన ముక్కుతో గాయపరుస్తాడు. ఈ విషయాన్ని గుర్తించిన శ్రీరాముడు ఆగ్రహంతో కాకిపై బ్రహ్మాస్త్రం ప్రయోగిస్తాడు. ఆ తర్వాత ఏం జరిగిందో ఇప్పుడు తెలుసుకుందాం.
మనకు “పిచ్చుకపై బ్రహ్మాస్త్రం” అనే సామెత తెలిసిందే. కానీ, శ్రీరాముడు ఒక కాకిపై బ్రహ్మాస్త్రం ప్రయోగించిన సంఘటన గురించి చాలా మందికి తెలియదు. ఇది ఆశ్చర్యంగా అనిపించినా, ఈ ఘటన వాల్మీకి రామాయణంలో కనిపిస్తుంది. హిందూ సనాతన ధర్మంలో ప్రతి ఆచారానికి ఒక అర్థం ఉంటుంది. రామాయణం అంటే కేవలం రావణ సంహారం లేదా యుద్ధకాండ మాత్రమే కాదు; అందులో అనేక చిన్న కథలు, సందేశాలు దాగి ఉన్నాయి. అలాంటి ఒక ఆసక్తికరమైన కథే శ్రీరాముడు, సీతాదేవి, ఒక కాకి కథ. ఈ కథ మనకు ఎలాంటి సందేశం ఇస్తుందో ఇప్పుడు తెలుసుకుందాం. ఈ కథలో కాకులు ఎందుకు ఒక కంటితో చూసినట్టు కనిపిస్తాయి? పితృకార్యాల్లో కాకులకు ఆహారం ఎందుకు పెడతారు? అనే విషయాలు కూడా వివరించబడతాయి.
వాల్మీకి రామాయణం ప్రకారం కథ.. అరణ్యవాసంలో ఉన్న సమయంలో శ్రీరాముడు, సీతాదేవి చిత్రకూట పర్వతం వద్ద నివసిస్తున్నారు. ఒక రోజు శ్రీరాముడు సీతాదేవి ఒడిలో తల పెట్టుకుని విశ్రాంతి తీసుకుంటూ నిద్రపోతాడు. సీతమ్మ మాత్రం ప్రకృతి అందాలను ఆస్వాదిస్తూ కూర్చుంటుంది. ఆ సమయంలో ఇంద్రుడి కుమారుడు జయంతుడు గర్వంతో కాకి రూపంలో అక్కడికి వచ్చి సీతాదేవి వక్షస్థలాన్ని తన ముక్కుతో గాయపరుస్తాడు. సీతమ్మ పక్కన ఉన్న మట్టిగడ్డలను తీసుకుని కాకిపై విసిరి దూరం చేయడానికి ప్రయత్నిస్తుంది.
కొద్దిసేపు వెళ్లిన కాకి మళ్లీ వచ్చి అదే చోట మళ్లీ బాధిస్తుంది. శ్రీరాముడు నిద్రలేవకుండా ఉండాలని సీతమ్మ ఎంత ప్రయత్నించినా ఆ కాకి మళ్లీ మళ్లీ ఇబ్బంది పెడుతూనే ఉంటుంది. ఇలా గాయపడిన సీతాదేవి శరీరం నుంచి వచ్చిన రక్తం శ్రీరాముడి శరీరానికి తగిలి ఆయన మెలకువకు వస్తాడు. వెంటనే విషయం గ్రహించిన శ్రీరాముడు రక్తంతో ఉన్న ఆ కాకిని చూసి కోపంతో దర్భాసనం నుంచి ఒక దర్భ తీసుకుని మంత్రించి బ్రహ్మాస్త్రంగా ప్రయోగిస్తాడు.
ముల్లోకాలు తిరిగిన కాకి.. శ్రీరాముడు ప్రయోగించిన ఆ బ్రహ్మాస్త్రం అగ్నిలా జ్వలిస్తూ కాకిని వెంటాడుతుంది. ఆ కాకి ప్రాణభయంతో ముల్లోకాలు తిరుగుతుంది. దేవేంద్రుడి దగ్గరికి వెళ్లినా.. ఇతర దేవతల దగ్గరికి వెళ్లినా ఎవరూ ఆ బ్రహ్మాస్త్రాన్ని ఆపలేకపోయారు. చివరకు మార్గం లేక శ్రీరాముడి దగ్గరికి వచ్చి ఆయన పాదాలపై పడిపోయి శరణు కోరుతుంది. శరణాగతులను కాపాడే స్వభావం ఉన్న శ్రీరాముడు దానిని క్షమిస్తాడు. అయితే తాను ప్రయోగించిన బ్రహ్మాస్త్రం వృథా కాదని చెబుతాడు.
కాకి చేసిన పరిహారం.. తాను చేసిన తప్పు తెలుసుకున్న ఆ కాకి వినయంతో ఇలా అంటుంది: ‘ప్రభూ, బ్రహ్మాస్త్రం వృథా కాకూడదు. నా కుడి కన్నును తీసుకోండి.’ దాంతో ఆ బ్రహ్మాస్త్రం కాకి కుడి కన్నును దహనం చేస్తుంది. ఇలా అది ప్రాణాలు దక్కించుకుంటుంది. అప్పటి నుంచి కాకులు ఒక కంటితో చూసినట్టు కనిపిస్తాయని పురాణ కథ చెబుతుంది. పితృకార్యాల్లో కాకుల ప్రాధాన్యం.. కథ ప్రకారం, శ్రీరాముడు ఆ కాకికి మరో వరం కూడా ఇచ్చాడని చెబుతారు. కాకికి పెట్టిన ఆహారం పితృదేవతలకు చేరుతుందని ఆయన వరం ఇచ్చాడట. అందుకే ఇప్పటికీ పితృకార్యాలు, శ్రాద్ధ కార్యక్రమాల్లో ముందుగా కాకులకు ఆహారం పెడతారు.
ఈ కథ ఇచ్చే సందేశం.. ఈ చిన్న సంఘటన మనకు ఒక గొప్ప పాఠాన్ని నేర్పుతుంది: గర్వం నాశనానికి దారి తీస్తుంది. తప్పు చేసినవాడు క్షమాపణ కోరితే క్షమించడం గొప్ప గుణం. శరణాగతులను కాపాడటం ధర్మం. అందుకే రామాయణంలోని ఈ చిన్న కథ కూడా మానవ జీవితానికి విలువైన సందేశాన్ని అందిస్తుంది. (Disclaimer: ఈ వార్తలోని సమాచారం మత విశ్వాసాలపై ఆధారపడి ఉంది. పాఠకుల ఆసక్తి మేరకు అందించడం జరిగింది. దీనిని టీవీ9 తెలుగు ధృవీకరించదు.)