గొంతులోని కఫాన్ని కరిగించి, జలుబు, దగ్గుకు చెక్ పెట్టే మిరియాల పులిహోర
మిరియాల పులిహోర రుచిలో ఘాటుగా, కమ్మగా ఉంటూ, ప్రత్యేకంగా శీతాకాలంలో గొంతులోని కఫాన్ని కరిగించి, జలుబు, దగ్గు వంటి వాటికి సహజ నివారణిగా పనిచేస్తుందని నమ్మకం. ఈ పులిహోర తయారీలో ఖచ్చితమైన కొలతలతో చేస్తే ఆలయాల్లో వచ్చే అద్భుతమైన రుచిని ఇంట్లోనే వస్తుంది.
ముందుగా, గింజలు లేని 50 గ్రాముల చింతపండును 300 మిల్లీలీటర్ల నీటిలో నానబెట్టాలి. రెండు కప్పుల (సుమారు 185 గ్రాములు) బియ్యాన్ని కడిగి కుక్కర్‌లో వేయాలి. దీనికి నాలుగు కప్పుల నీళ్లు, 2 1/4 టేబుల్ స్పూన్ల ఉప్పు, ఒక టీ స్పూన్ పసుపు, ఒక టీ స్పూన్ నువ్వుల నూనె కలిపి, హై ఫ్లేమ్‌లో మూడు విజిల్స్ వచ్చే వరకు వండాలి. అన్నం మెత్తబడకుండా ఉండటానికి, స్టీమ్ పోయిన వెంటనే మూత తీసి, ఒక ప్లేట్‌కు నువ్వుల నూనె రాసి, అన్నాన్ని దానిపై వేసి పూర్తిగా చల్లారనివ్వాలి. అన్నం పొడిపొడిగా ఉండటం పులిహోర రుచికి ముఖ్యం.
అదే పాన్ లో అర టీ స్పూన్ మెంతులు, ఒక టేబుల్ స్పూన్ ధనియాలు, రెండు టేబుల్ స్పూన్ల మిరియాలు, అర టేబుల్ స్పూన్ జీలకర్ర వేసి, సన్నని సెగ మీద కలుపుతూ వేపాలి. జీలకర్ర చిటపటలాడే సమయంలో 1 1/4 టేబుల్ స్పూన్ల నల్ల నువ్వులు (తెల్ల నువ్వుల కంటే నల్ల నువ్వులు ప్రత్యేకమైన రుచి, పరిమళాన్ని ఇస్తాయి) వేసి, చిటపటలాడే వరకు వేయించాలి. ఈ వేగిన దినుసులను తీసి మెత్తని పొడిలా గ్రైండ్ చేసుకోవాలి.
అదే పాన్ 1/3 కప్పు (85 మిల్లీలీటర్లు) నువ్వుల నూనె పోసి, వేడి అయ్యాక ఒక టేబుల్ స్పూన్ ఆవాలు, 1 1/2 టేబుల్ స్పూన్ల పచ్చిశనగపప్పు, 1 1/2 టేబుల్ స్పూన్ల మినప్పప్పు, 60 గ్రాముల వేరుశనగ గుండ్లు వేసి, మీడియం టు లో ఫ్లేమ్‌లో ఎర్రగా, కరకరలాడేలా వేయించాలి. తాలింపు చక్కగా వేగిన తర్వాత నాలుగు రెబ్బల కరివేపాకు, అర టీ స్పూన్ ఇంగువ వేసి వేపాలి.
వేగిన తాలింపులో నానబెట్టుకున్న చింతపండు పులుసు, ఉసిరికాయంత బెల్లం ముక్క వేసి హై ఫ్లేమ్‌లో ఒక పొంగు రానివ్వాలి. దీని వల్ల చింతపండు పచ్చి వాసన పోతుంది. ఇప్పుడు మెత్తగా గ్రైండ్ చేసుకున్న మిరియాల పొడి వేసి కలిపి, చిక్కని పేస్ట్ లా అయ్యే వరకు ప్రతి రెండు నిమిషాలకు ఒకసారి కలుపుతూ ఉడికించుకోవాలి. పులుసు ఎంత నిదానంగా ఉడికితే, ఫ్లేవర్స్ అంతగా పులుసులోకి కలిసిపోతాయి. సుమారు 20 నిమిషాల పాటు మరిగించడం వల్ల పులుసు సరైన చిక్కదనం వస్తుంది.
స్టవ్ ఆపేసి, వండుకున్న అన్నాన్ని పులుసులో వేసి జాగ్రత్తగా కలపాలి. పులుసు అన్నానికి చక్కగా పట్టడానికి కనీసం 30 నిమిషాల పాటు అలాగే వదిలేయాలి. అప్పుడే మిరియాల పులిహోర ఘుమఘుమలాడే రుచితో సిద్ధమవుతుంది. ఈ పద్ధతిని ఫాలో అయ్యి మీరు కూడా ఆలయాల్లో దొరికే అద్భుతమైన మిరియాల పులిహోరను ఇంట్లోనే తయారుచేసి తినండి.