Kodiguddu Ellipaya Karam: నోటికి కారంగా తినాలనిపించినప్పుడు ఘాటైన ఎల్లిపాయ గుడ్డు కారం..
వర్షం పడుతున్నప్పుడు లేదా జ్వరం వచ్చి నోటికి రుచి తెలియనప్పుడు ఏదైనా కారంగా, ఘాటుగా తినాలనిపిస్తుంది. అలాంటి సమయాల్లో తక్కువ సమయంలో ఇంట్లో ఉన్న పదార్థాలతోనే చేసుకునే 'ఎల్లిపాయ గుడ్డు కారం' అద్భుతమైన ఎంపిక. ఉడికించిన కోడిగుడ్లను నూనెలో చక్కగా వేయించి, దంచిన వెల్లుల్లి రెబ్బలు, కారం, ధనియాలు, జీలకర్రల మిశ్రమంతో పట్టించే ఈ కారం ప్రతి ముద్దనూ ఎంతో కమ్మగా మారుస్తుంది.
వేడివేడి అన్నం, చపాతీ లేదా పప్పుచారు, సాంబార్తో సైడ్ డిష్గా సూపర్ కాంబినేషన్ అయ్యే ఈ రాయలసీమ స్టైల్ ఎల్లిపాయ గుడ్డు కారం తయారీ విధానాన్ని ఇప్పుడు వివరంగా చూద్దాం. దీనికి కావలసిన పదార్థాలు: 4 నుండి 5 - ఉడికించిన కోడిగుడ్లు, ఒక పూర్తి వెల్లుల్లి గడ్డ పొట్టు తీసినవి లేదా కచ్చాపచ్చాగా దంచినవి, 2 టేబుల్ స్పూన్ల కారం, 1 టేబుల్ స్పూన్ ధనియాల పొడి, అర టీస్పూన్ జీలకర్ర, పావు టీస్పూన్ పసుపు, ఒకటి - సన్నగా తరిగిన ఉల్లిపాయ, రెండు పచ్చిమిర్చి చీలికలు, రెండు రెమ్మల కరివేపాకు, తాజా కొత్తిమీర తరుగు, రుచికి సరిపడా ఉప్పు, వేయించడానికి సరిపడా నూనె.
ముందుగా ఒక చిన్న మిక్సీ జార్ లేదా రోలు తీసుకుని అందులో 2 టేబుల్ స్పూన్ల కారం, రుచికి సరిపడా ఉప్పు, ధనియాల పొడి, జీలకర్ర మరియు పొట్టు వలిచిన వెల్లుల్లి రెబ్బలు వేసి కచ్చాపచ్చాగా గ్రైండ్ చేసుకోవాలి నీళ్లు అస్సలు పోయకూడదు. ఈ వెల్లుల్లి కారం పొడి మంచి ఘాటుతో, కమ్మని సువాసనతో సిద్ధమవుతుంది.
గుడ్లను వేయించడం: ఉడికించిన కోడిగుడ్లను పొట్టు తీసి, మధ్యలోకి రెండు భాగాలుగా కట్ చేసుకోవాలి (లేదా చిన్న గాట్లు పెట్టుకోవచ్చు). స్టవ్ మీద పాన్ పెట్టి రెండు టేబుల్ స్పూన్ల నూనె వేసి వేడిచేయాలి. నూనె వేడెక్కాక కొద్దిగా పసుపు, చిటికెడు ఉప్పు వేసి, ఉడికించిన గుడ్లను వేసి రెండు వైపులా లైట్ గోల్డెన్ బ్రౌన్ కలర్ వచ్చే వరకు మీడియం మంటపై దోరగా వేయించి ప్లేట్లోకి తీసుకోవాలి.
కారం పట్టించి ఫ్రై చేసే విధానం: అదే పాన్లో మరికొద్దిగా నూనె వేసి జీలకర్ర, ఆవాలు, సన్నగా తరిగిన ఉల్లిపాయ ముక్కలు, పచ్చిమిర్చి చీలికలు, కరివేపాకు వేసి ఉల్లిపాయలు మంచి గోల్డెన్ బ్రౌన్ కలర్ వచ్చేవరకు వేయించాలి. ఉల్లిపాయలు చక్కగా వేగిన తర్వాత ముందుగా గ్రైండ్ చేసి పెట్టుకున్న ఎల్లిపాయ కారాన్ని వేసి, మంటను లో ఫ్లేమ్లో పెట్టి పచ్చివాసన పోయేలా అర నిమిషం పాటు వేయించాలి.
ఆ వెంటనే ముందుగా వేయించి పక్కన పెట్టుకున్న ఎగ్ ముక్కలను వేసి, కారం అంతా గుడ్డు ముక్కలకు లోపలి వరకు పట్టేలా మెల్లగా కలపాలి. ముక్కలు చిదిమిపోకుండా అటూ ఇటూ తిప్పుతూ రెండు నిమిషాలు మగ్గనివ్వాలి. చివరగా సన్నగా తరిగిన కొత్తిమీర తరుగు చల్లి స్టవ్ ఆఫ్ చేయాలి. అంతే, నోరూరించే ఎల్లిపాయ గుడ్డు కారం సిద్ధం! వేడివేడి అన్నంలో నెయ్యితో కలుపుకుని తింటే కారం ఘాటుకు మైమరచిపోవాల్సిందే!