అరెరె ఇంత కథ ఉందా.. ఆపిల్ తినేటప్పుడు మీరూ ఇదే తప్పు చేస్తున్నారా.. శరీరంలో ఏం జరుగుతుందో తెలిస్తే..
రోజుకో ఆపిల్ తింటే డాక్టర్ దగ్గరకు వెళ్లాల్సిన పనే ఉండదు అనే సామెతను మనం తరచూ వింటూనే ఉంటాం. అయితే ఇది కేవలం నానుడి మాత్రమే కాదు, నిజంగానే ఆపిల్లో శరీరానికి మేలు చేసే విటమిన్ సి, ఫైబర్, పొటాషియం, శక్తివంతమైన యాంటీఆక్సిడెంట్లు పుష్కలంగా ఉంటాయని ప్రముఖ గుండె వైద్య నిపుణుడు, SAAOL హార్ట్ సెంటర్ వ్యవస్థాపకుడు డాక్టర్ విమల్ ఛాజెడ్ స్పష్టం చేస్తున్నారు. ఆపిల్ పండును తొక్క తీయకుండా శుభ్రంగా కడిగి తినడం వల్ల శరీరంలో ఏం జరుగుతుందో తెలుసుకుందాం..
ఆపిల్లో ఉండే సహజసిద్ధమైన పీచు, యాంటీఆక్సిడెంట్లు గుండె ఆరోగ్యాన్ని మెరుగుపరచడంలో కీలక పాత్ర పోషిస్తాయి. రక్తనాళాల్లో కొలెస్ట్రాల్ పేరుకుపోకుండా కాపాడటంతో పాటు రక్త ప్రసరణ సజావుగా సాగేలా ఇవి దోహదపడతాయి. ఆరోగ్యకరమైన జీవనశైలితో పాటు రోజువారీ సమతుల్య ఆహారంలో భాగంగా ఒక తాజా ఆపిల్ను చేర్చుకోవడం వల్ల గుండె జబ్బుల ముప్పు గణనీయంగా తగ్గుతుందని వైద్యులు సూచిస్తున్నారు.
ఈ పండులో ఉండే పెక్టిన్ అనే కరిగే పీచు పదార్థం జీర్ణవ్యవస్థ పనితీరును అద్భుతంగా మెరుగుపరుస్తుంది. ఇది ప్రేగులలో మేలు చేసే బ్యాక్టీరియాను పెంచి, మలబద్ధకం సమస్యను నివారిస్తుంది. అలాగే ఆపిల్లో నీటి శాతం, ఫైబర్ అధికంగా ఉండటం వల్ల తిన్న వెంటనే కడుపు నిండిన భావన కలుగుతుంది. దీనివల్ల అనవసరమైన కేలరీలు అధికంగా ఉండే జంక్ ఫుడ్ తినాలనే కోరిక తగ్గి, శరీర బరువు సులభంగా అదుపులో ఉంటుంది.
ఆపిల్లో పుష్కలంగా ఉండే నీటి శాతం వల్ల శరీరం రోజంతా డీహైడ్రేషన్ బారిన పడకుండా తేమగా ఉంటుంది. అయితే ఆపిల్ పండ్ల ద్వారా పూర్తి స్థాయి పోషకాలు పొందాలంటే వాటిని రసంగా తీసుకోవడం కంటే నేరుగా పండు రూపంలోనే తినడం అత్యుత్తమం. జ్యూస్ చేయడం వల్ల పండులోని సహజసిద్ధమైన పీచు పదార్థం నశిస్తుంది. అంతేకాకుండా మార్కెట్లో లభించే ప్యాక్డ్ జ్యూస్లలో అధిక చక్కెరలు ఉండటం వల్ల ఆరోగ్యానికి హాని కలుగుతుంది.
డయాబెటిస్ బాధపడేవారు కూడా నిరభ్యంతరంగా తమ రోజువారీ ఆహారంలో భాగంగా ఆపిల్ను తినవచ్చు. ఆపిల్లోని పీచు పదార్థం రక్తంలోకి చక్కెర వేగంగా విడుదల కాకుండా నెమ్మదింపజేస్తుంది. అయితే డయాబెటిస్ ఉన్నవారు వీటిని స్మూతీలు, సలాడ్లలో చక్కెర, తేనె లేదా తీపి సిరప్లతో కలపకుండా, సహజ పండు రూపంలోనే తీసుకోవడం అత్యంత ముఖ్యం.
మొత్తంగా చూస్తే, ఆపిల్ పండ్లను సరైన పద్ధతిలో, సరైన సమయంలో ఆహారంలో భాగంగా చేసుకోవడం వల్ల శరీరానికి అవసరమైన సమతుల్య పోషణ అందుతుంది. ఖరీదైన సప్లిమెంట్ల కంటే ప్రతిరోజూ ఒక తాజా ఆపిల్ తినే అలవాటు చేసుకోవడం ద్వారా గుండె ఆరోగ్యం, జీర్ణక్రియ మెరుగవడమే కాకుండా దీర్ఘకాలిక రోగాల బారిన పడకుండా ఉండవచ్చని ఆరోగ్య నిపుణులు స్పష్టం చేస్తున్నారు.