Team India: బీసీసీఐ ముద్దంది.. నేనే వద్దన్నా.. టెస్ట్ కెప్టెన్సీ ఆఫర్పై క్లారిటీ ఇచ్చిన బుమ్రా
Jasprit Bumrah Rejected an Offer From the BCCI: బుమ్రా వ్యాఖ్యలను బట్టి చూస్తే, ఫిట్నెస్ సమస్యలు, వర్క్లోడ్ మేనేజ్మెంట్ను దృష్టిలో ఉంచుకునే బీసీసీఐ తనను టెస్ట్ కెప్టెన్సీకి పరిగణించవద్దని స్వయంగా బుమ్రా కోరాడు. దీంతో శుభ్మన్ గిల్ భారత టెస్ట్ జట్టుకు సారథ్యం వహించే అవకాశం లభించింది. జస్ప్రీత్ బుమ్రా నిర్ణయం అతని వృత్తి నైపుణ్యాన్ని, జట్టు పట్ల నిబద్ధతను తెలియజేస్తోంది.
Jasprit Bumrah: భారత క్రికెట్ జట్టు స్టార్ పేసర్ జస్ప్రీత్ బుమ్రా, తనను టెస్ట్ కెప్టెన్గా చేయాలంటూ బీసీసీఐ నుంచి వచ్చిన ఆఫర్ను తిరస్కరించినట్లు సంచలన విషయాలు వెల్లడించాడు. ఇటీవల రోహిత్ శర్మ టెస్టు క్రికెట్ నుంచి రిటైర్మెంట్ ప్రకటించిన తర్వాత, టెస్ట్ కెప్టెన్సీ రేసులో శుభ్మన్ గిల్తో పాటు బుమ్రా పేరు కూడా ప్రముఖంగా వినిపించింది. అయితే, అనూహ్యంగా గిల్ కెప్టెన్గా ఎంపిక కావడంపై అనేక ఊహాగానాలు చెలరేగాయి. ఈ నేపథ్యంలో బుమ్రా స్వయంగా తన నిర్ణయాన్ని, దానికి గల కారణాలను వివరించాడు.
స్కై స్పోర్ట్స్ కోసం మాజీ భారత వికెట్ కీపర్-బ్యాటర్ దినేష్ కార్తీక్తో జరిగిన ఇంటర్వ్యూలో బుమ్రా మాట్లాడుతూ, రోహిత్ శర్మ, విరాట్ కోహ్లీ టెస్ట్ రిటైర్మెంట్లు ప్రకటించడానికి ముందే తాను తన పనిభారం (వర్క్లోడ్) గురించి బీసీసీఐ అధికారులతో, సెలెక్టర్లతో చర్చించినట్లు తెలిపాడు. తన వెన్నునొప్పి సమస్యలను పర్యవేక్షిస్తున్న వైద్యులు, ఫిజియోలతో మాట్లాడిన తర్వాత, భవిష్యత్తులో తన శరీరంపై అదనపు భారం పడకుండా చూసుకోవాలని నిర్ణయించుకున్నట్లు చెప్పుకొచ్చాడు.
"ఐదు టెస్టుల సిరీస్లో నా పనిభారం ఎలా ఉండాలి అనే దానిపై నేను బీసీసీఐతో మాట్లాడాను. నా వెన్నును పర్యవేక్షించే మెడికల్ టీం, నాకు శస్త్రచికిత్స చేసిన సర్జన్తో కూడా చర్చించాను. పనిభారం విషయంలో తెలివిగా వ్యవహరించాలని వారు నాకు సూచించారు. ఈ చర్చల అనంతరం, నేను కొంచెం జాగ్రత్తగా ఉండాలనే నిర్ణయానికి వచ్చాను" అని బుమ్రా వివరించాడు.
అంతేకాకుండా, ఐదు టెస్టుల సిరీస్లో తాను అన్ని మ్యాచ్లూ ఆడలేకపోవచ్చని, అలాంటప్పుడు కెప్టెన్సీ బాధ్యతలు స్వీకరించడం జట్టుకు న్యాయం కాదని బుమ్రా స్పష్టం చేశాడు. "బీసీసీఐ నన్ను నాయకత్వ పాత్ర కోసం పరిశీలించింది నిజమే. కానీ, నేను అందుకు 'నో' చెప్పాల్సి వచ్చింది. ఒక సిరీస్లో మూడు మ్యాచ్లకు ఒకరు, మిగతా మ్యాచ్లకు మరొకరు కెప్టెన్గా ఉండటం జట్టుకు మంచిది కాదు. నేను ఎప్పుడూ జట్టు ప్రయోజనాలకే మొదటి ప్రాధాన్యత ఇస్తాను" అని బుమ్రా అన్నాడు. కెప్టెన్సీ తనకు ఎంతో ముఖ్యమని, దాని కోసం తాను చాలా కష్టపడ్డానని, అయితే కెప్టెన్సీ కంటే క్రికెట్ అంటేనే తనకు ఎక్కువ ఇష్టమని, ఒక ఆటగాడిగా జట్టుకు మరింత సహకరించాలనుకుంటున్నానని చెప్పుకొచ్చాడు.
బుమ్రా వ్యాఖ్యలను బట్టి చూస్తే, ఫిట్నెస్ సమస్యలు, వర్క్లోడ్ మేనేజ్మెంట్ను దృష్టిలో ఉంచుకునే బీసీసీఐ తనను టెస్ట్ కెప్టెన్సీకి పరిగణించవద్దని స్వయంగా బుమ్రా కోరాడు. దీంతో శుభ్మన్ గిల్ భారత టెస్ట్ జట్టుకు సారథ్యం వహించే అవకాశం లభించింది. జస్ప్రీత్ బుమ్రా నిర్ణయం అతని వృత్తి నైపుణ్యాన్ని, జట్టు పట్ల నిబద్ధతను తెలియజేస్తోంది. తన వ్యక్తిగత ఆశయాల కంటే జట్టు ప్రయోజనాలకే ప్రాధాన్యత ఇవ్వడం అభినందనీయం.