Abhishek Sharma: సిరాజ్ జెర్సీతో బరిలోకి దిగినా.. మారని ‘జీరో’ స్టోరీ.. కట్చేస్తే.. ఆ చెత్త రికార్డ్లో కాటేరమ్మ కొడుకు
Abhishek Sharma Ducks Record: మ్యాచ్కు ముందు భారత మాజీ కెప్టెన్ సునీల్ గవాస్కర్ అభిషేక్ శర్మకు ఓ కీలక సలహా ఇచ్చారు. “నా అనవసరమైన సలహా ఏంటంటే ముందుగా ఒక సింగిల్ తీసుకో. అంతే. ఆ తర్వాత కావాలంటే భారీ షాట్లు ఆడు. కానీ, ముందు ఒక్క పరుగు తీసి ఖాతా తెరవాలి” అని గవాస్కర్ సూచించాడు.
Abhishek Sharma Three Ducks: టీ20 వరల్డ్ కప్లో అభిషేక్ శర్మ తొలి పరుగు కోసం ఎదురుచూపులు ఇంకా కొనసాగుతున్నాయి. అమెరికా (USA), పాకిస్తాన్పై డక్ ఔట్ తర్వాత, బుధవారం అహ్మదాబాద్లో నెదర్లాండ్స్తో జరిగిన మ్యాచ్లో కూడా జీరోకే ఔటయ్యాడు. ఓపెనింగ్ ఓవర్లో ఆర్యన్ దత్ వేసిన మూడో బంతికి పుల్ షాట్ ఆడేందుకు ప్రయత్నించగా, బంతి స్కిడ్ అయి స్టంప్స్ను తాకింది. ఆసక్తికరంగా, ఈ మ్యాచ్లో అభిషేక్ శర్మ మహమ్మద్ సిరాజ్ జెర్సీ ధరించడం గమనార్హం. కానీ అది కూడా అతని అదృష్టాన్ని మార్చలేకపోయింది.
మూడు మ్యాచ్ల్లో వరుసగా మూడు డక్స్తో, టీ20 వరల్డ్ కప్లలో భారత్ తరపున అత్యధిక డక్స్ నమోదు చేసిన ఆటగాడిగా అభిషేక్ శర్మ అశిష్ నెహ్రాతో కలిసి సంయుక్త రికార్డును సొంతం చేసుకున్నాడు. మొత్తంగా చూస్తే, పాకిస్తాన్కు చెందిన షాహిద్ అఫ్రిది, శ్రీలంక లెజెండ్ తిలకరత్నే దిల్షాన్లు చెరో ఐదు డక్స్తో టాప్లో ఉన్నారు. అఫ్రిది 34 మ్యాచ్లు ఆడగా, దిల్షాన్ 35 మ్యాచ్ల్లో పాల్గొన్నారు.
గవాస్కర్ మాట్లాడుతూ.. “ఆత్మవిశ్వాసమే ముఖ్యమైనది. అతడు న్యూజిలాండ్పై సెంచరీ చేశాడు. మంచి ఫామ్లో ఉన్నాడు. కానీ మంచి ఫామ్ ఉందని అతి ఉత్సాహంతో ఆడకూడదు. క్రీజ్లో సెట్ అయిన తర్వాతే రిస్క్ తీసుకోవాలి. అభిషేక్ వద్ద ఉన్న ప్రతిభను మనం ఇప్పటికే చూశాం” అంటూ చెప్పుకొచ్చాడు.
భారత్ బ్యాటింగ్ ఎంచుకున్న తర్వాత, సూపర్-8 దశకు ముందు అభిషేక్ శర్మ ఫామ్లోకి వస్తాడని అభిమానులు ఆశించారు. కానీ ఈ టోర్నీలో వరుసగా మూడోసారి డక్ అవడంతో అతడు నిరాశపరిచాడు. ఇటీవల అద్భుత ఫామ్లో ఉన్నప్పటికీ, తన తొలి ఐసీసీ టోర్నీలో ఇప్పటివరకు ఖాతా తెరవలేకపోయాడు.
మునుపటి లీగ్ మ్యాచ్ల్లో నమీబియా కెప్టెన్ గెర్హార్డ్ ఎరాస్మస్, ఉస్మాన్ ఖాదిర్, సైమ్ అయూబ్ స్పిన్ బౌలింగ్ భారత బ్యాటర్లను ఇబ్బంది పెట్టింది. ఈ మ్యాచ్లో భారత సంతతి ఆఫ్ స్పిన్నర్ ఆర్యన్ దత్ ప్రపంచంలోనే అతిపెద్ద క్రికెట్ స్టేడియంలో స్టార్లతో నిండిన భారత జట్టును ఇబ్బంది పెట్టాడు. మ్యాచ్కు ముందు నెట్స్లో భారత బ్యాటర్లు స్పిన్నర్లపై ప్రత్యేకంగా ప్రాక్టీస్ చేసినా, ఇంకా మెరుగుదల అవసరమని స్పష్టమైంది. దత్ అద్భుతంగా బౌలింగ్ చేయగా, నెదర్లాండ్స్ పేసర్లు కూడా తమ వేరియేషన్లతో భారత బ్యాటర్లను పరీక్షించారు.