IND vs ENG: మాంచెస్టర్లో ఊరమాస్ ఇన్నింగ్స్కు అభిషేక్ శర్మ రెడీ.. ధోనీ, రైనా రికార్డులు బద్దలే..!
Abhishek Sharma Records: మొదటి మ్యాచ్లో భారత్ 189 పరుగుల భారీ స్కోరు సాధించినప్పటికీ, వర్షం కారణంగా మ్యాచ్ పూర్తి కాలేదు. ఇప్పుడు అందరి కళ్లు మాంచెస్టర్లోని ఓల్డ్ ట్రాఫోర్డ్ మైదానంలో జరగబోయే రెండో టీ20పైనే ఉన్నాయి. అభిషేక్ శర్మ ఇదే జోరును కొనసాగించి ధోనీ, రైనాల రికార్డులను అధిగమిస్తూ టీమిండియాకు సిరీస్లో ఆధిక్యాన్ని అందిస్తాడని అభిమానులు ఎంతగానో ఆశిస్తున్నారు.
ఇంగ్లాండ్తో జరిగిన మొదటి టీ20 మ్యాచ్లో భారత యువ ఓపెనర్ అభిషేక్ శర్మ తన సంచలన బ్యాటింగ్తో అంతర్జాతీయ క్రికెట్ ప్రపంచాన్ని షాక్కు గురిచేశాడు. కేవలం 20 బంతుల్లోనే హాఫ్ సెంచరీ పూర్తి చేసి సరికొత్త చరిత్ర సృష్టించిన అభిషేక్, ఇప్పుడు మాంచెస్టర్ వేదికగా జరగనున్న రెండో టీ20 మ్యాచ్లో సురేశ్ రైనా, మహేంద్ర సింగ్ ధోనీల అత్యంత ప్రతిష్టాత్మక రికార్డులను బద్దలు కొట్టేందుకు సిద్ధమయ్యాడు.
ఇంగ్లాండ్తో జరిగిన తొలి పోరులో టాస్ ఓడి మొదట బ్యాటింగ్కు దిగిన టీమిండియాకు ప్రారంభంలోనే గట్టి షాక్లు తగిలాయి. సంజూ శాంసన్, ఇషాన్ కిషన్ త్వరగానే పెవిలియన్ చేరినా, పంజాబ్ సింహం అభిషేక్ శర్మ మాత్రం ఇంగ్లాండ్ బౌలర్లపై నిర్దయాత్మకంగా విరుచుకుపడ్డాడు. లండన్ మైదానంలో ఫోర్లు, సిక్సర్ల వర్షం కురిపిస్తూ కేవలం 24 బంతుల్లోనే 6 ఫోర్లు, 4 సిక్సర్లతో 59 పరుగులు సాధించాడు.
ఈ విధ్వంసకర ఇన్నింగ్స్ ద్వారా ఇంగ్లాండ్ గడ్డపై అత్యంత వేగంగా టీ20 హాఫ్ సెంచరీ చేసిన భారత బ్యాటర్గా కేఎల్ రాహుల్ పేరిట ఉన్న రికార్డును అభిషేక్ తుడిచిపెట్టేశాడు. కేవలం ఇదొక్కటే కాదు, అంతర్జాతీయ టీ20ల్లో ఎదుర్కొన్న బంతుల పరంగా అత్యంత వేగంగా 1500 పరుగులు పూర్తి చేసిన ప్రపంచ రికార్డును సైతం సూర్యకుమార్ యాదవ్ నుంచి తన వశం చేసుకున్నాడు.
ప్రస్తుతం అభిషేక్ శర్మ కెరీర్ పీక్ స్టేజ్లో దూసుకుపోతోంది. రెండో టీ20 మ్యాచ్లో అతడు మరో 60 పరుగులు సాధిస్తే, భారత మాజీ దిగ్గజ ఆటగాడు సురేశ్ రైనా (1605 పరుగులు) రికార్డును దాటేస్తాడు. అంతేకాకుండా, ఈ మ్యాచ్లో గనుక అతడు భారీ ఇన్నింగ్స్ ఆడితే ఎంఎస్ ధోనీ (1617 పరుగులు) అత్యధిక పరుగుల రికార్డును కూడా అధిగమించే సువర్ణావకాశం ఉంది. టీమిండియా తరపున అంతర్జాతీయ టీ20 ఫార్మాట్లో అత్యధిక పరుగులు చేసిన టాప్-8 బ్యాటర్ల జాబితాలోకి చేరడానికి ఈ యువ లెఫ్ట్ హ్యాండర్ కేవలం అడుగు దూరంలో ఉన్నాడు.
తొలి మ్యాచ్లో బాదిన 4 సిక్సర్లతో, అంతర్జాతీయ టీ20 క్రికెట్లో అతి తక్కువ బంతుల్లో (785 బంతులు) 100 సిక్సర్లు పూర్తి చేసిన ప్రపంచ నంబర్ వన్ బ్యాటర్గా అభిషేక్ సరికొత్త ప్రపంచ రికార్డును లిఖించాడు. వెస్టిండీస్ వీరుడు ఎవిన్ లూయిస్ (789 బంతులు) రికార్డును అతడు అధిగమించడం విశేషం. భారత్ తరపున రోహిత్ శర్మ, విరాట్ కోహ్లీ, సూర్యకుమార్ యాదవ్, హార్దిక్ పాండ్యా తర్వాత వంద సిక్సర్లు కొట్టిన ఐదో బ్యాటర్గా అభిషేక్ నిలిచాడు.