Youth motorcycles: కాలేజీ కుర్రాళ్ల కోసం స్పెషల్ బైక్ లు ఇవే.. తక్కువ ధరకే ప్రముఖ బ్రాండ్లు
నేటి కాలంలో ద్విచక్ర వాహనాల వినియోగం తప్పనిసరిగా మారింది. వివిధ అవసరాల కోసం అందరూ వీటిని వినియోగిస్తున్నారు. ఉద్యోగస్తులకు, వ్యాపారులకు, మహిళలకు వివిధ రకాల ద్విచక్ర వాహనాలను అందుబాటులో ఉన్నాయి. వీటితో పాటు కళాశాలల్లో చదువుకునే విద్యార్థుల కోసం స్టైలిష్ లుక్ తో కొన్ని వాహనాలు మార్కెట్ లో సందడి చేస్తున్నాయి. ప్రత్యేక ఫీచర్లు, ఆకట్టుకునే రంగులు, లేటెస్ట్ టెక్నాలజీతో ఆకట్టుకుంటున్నాయి. సుజుకి, యమహా, టీవీఎస్, హొండా, రాయల్ ఎన్ ఫీల్డ్ తదితర ప్రముఖ బ్రాండ్ల నుంచి విడుదలైన వీటి ధర రూ.1.50 లక్షల లోపు ఉండడం విశేషం. కాలేజీ విద్యార్థుల కోసం ప్రత్యేకంగా తయారు చేసిన మోటారు సైకిళ్లు ఇవే..!
హోండా హార్నెట్ 2.0 మోటారు సైకిల్ లో 184 సీసీ సింగిల్ సిలిండర్ ఏర్పాటు చేశారు. దీని నుంచి 17 హెచ్ పీ, 15.9 ఎన్ఎం టార్క్ విడుదల చేస్తుంది. ఐదు స్పీడ్ గేర్ బాక్స్, ముందు భాగంలో యూఎస్ డీ ఫోర్కులు, వెనుక మోనోషాక్ సెటప్, 276, 220 ఎంఎం డిస్క్ బ్రేకులు, సింగిల్ చానల్ ఏబీఎస్ తో ఆకట్టుకుంటోంది. లీటరుకు 42.3 కిలోమీటర్ల మైలేజీ వస్తుంది. హోండా హార్నెట్ 2.0 మోటారు సైకిల్ ధర రూ.1.40 లక్షలు.
రాయల్ ఎన్ ఫీల్డ్ హంటర్ 350 మోటారు సైకిల్ రూ.1.49 లక్షలకు అందుబాటులో ఉంది. దీనిలోని 349 సీసీ సింగిల్ ఇంజిన్ సిలిండర్ నుంచి 20.2 హెచ్ పీ, 27 ఎన్ఎం టార్క్ విడుదలవుతుంది. ముందు టెలిస్కోపిక్ ఫోర్కులు, వెనుక ఆరు దశల అడ్జెస్ట్ మెంట్ సెటప్, 300, 153 ఎంఎం డిస్క్ బ్రేకులు, డ్యూయల్ చానల్ ఏబీఎస్ తదితర ప్రత్యేకతలు ఉన్నాయి. లీటర్ పెట్రోలుకు సుమారు 36 కిలోమీటర్ల మైలేజీ ఇస్తుంది.
కళాశాల విద్యార్థుల కోసం ప్రత్యేకంగా రూపొందించిన సుజుకి జిక్సర్ ఎస్ఎఫ్ మోటారు సైకిల్ ప్రారంభ ధర రూ.1.37 లక్షలుగా ఉంది. రైడ్ కనెక్ట్ ఫీచర్ కలిగిన దీని టాప్ స్పెక్ రూ.1.45 లక్షల వరకూ పలుకుతోంది. 13.4 హెచ్ పీ, 13.6 ఎన్ఎం టార్క్ ఉత్పత్తి చేసే 155 సీసీ సింగిల్ సిలిండర్, ఐదు స్పీడ్ గేర్ బాక్స్, ముందు టెలిస్కోపిక్ ఫోర్కులు, వెనుక స్వింగ్ ఆర్మ్ సెటప్, సింగిల్ చానల్ ఏబీఎస్ దీని ప్రత్యేకతలు. ప్రతి లీటర్ పెట్రోలుకు 35 కిలోమీటర్ల మైలేజీ ఇస్తుంది.
టీవీఎస్ రోనిన్ మోటారు సైకిల్ లో 225 సీసీ సింగిల్ సిలిండర్ ఇంజిన్ ఏర్పాటు చేశారు. దీని నుంచి 20.1 హెచ్ పీ, 19.93 ఎన్ఎం టార్క్ విడుదల అవుతుంది. ఐదు స్పీడ్ గేర్ బాక్స్, ముందు భాగంలో యూఎస్ డీ ఫోర్కులు, వెనుక మోనోషాక్ సెటప్, ముందు 300, వెనుక 240 ఎంఎం డిస్కులు, డ్యూయర్ చానల్ ఏబీఎష్ తదితర ప్రత్యేకతలు ఉన్నాయి. లీటరుకు 42 కిలోమీటర్ల మైలేజీ వస్తుంది. టీవీఎస్ రోనిన్ మోటారు సైకిల్ రూ.1.35 లక్షలకు (ఎక్స్ షోరూమ్) అందుబాటులో ఉంది.
యమహా ఎఫ్ జెడ్ ఎక్స్ మోటారు సైకిల్ లో సింగిల్ చానల్ ఏబీఎస్ ఉంది. ముందు 282 ఎంఎం, వెనుక 220 ఎంఎం డిస్క్ లు ఏర్పాటు చేశారు. దీనిలోని 149 సీసీ సింగిల్ సిలిండర్ ఇంజిన్ నుంచి 12.2 హెచ్ పీ, 13.3 ఎన్ఎం టార్క్ ఉత్పత్తి అవుతుంది. ఐదు స్పీడ్ ట్రాన్స్ మిషన్, ముందు టెలిస్కోపిక్ ఫోర్కులు, వెనుక మోనో షాక్ సెటప్ ఉన్నాయి. లీటర్ పెట్రోలుకు 45 కిలోమీటర్ల మైలేజీ వస్తుంది. యమహా ఎఫ్ జెడ్ ఎక్స్ మోటారు సైకిల్ ప్రారంభ ధర రూ.1.36 లక్షలు (ఎక్స్ షోరూమ్).