Bidar Fort: బీదర్ కోటపై ప్రకృతి దాడి.. చారిత్రక కట్టడం కూలిపోతుందేమోనని పర్యాటకుల ఆందోళన..
Bidar Fort: బహమనీ సామ్రాజ్య చరిత్రకు నిదర్శనంగా నిలిచిన బీదర్ కోటకు కష్టం వచ్చింది. అటు అధికారుల నిర్లక్ష్యం, ఇటు ప్రకృతి సహజ స్వభావం మధ్య బీదర్ కోట నానాటికీ తన శోభను కోల్పోతోంది. అలాగే ఈ బీదర్ కోట పరిస్థితి ఇలాగే సాగితే మరి కొద్ది సంవత్సరాల్లోనే కూలిపోయే పరిస్థితులు కూడా వస్తాయేమోనని స్థానికులు, పర్యాటకులు ఆందోళన చెందుతున్నారు. ఇంతకీ ప్రకృతి కారణంగా బీదర్ కోటకు వచ్చిన ఆ కష్టం ఏమిటో ఇప్పుడు చూద్దాం..
కర్ణాటకలోని బీదర్ కోట బహమనీ సుల్తానుల సామ్రాజ్యానికి నిదర్శనంగా నేటికి నిలిచి ఉంది. అయితే పురావస్తు శాఖ అధికారుల నిర్లక్ష్యం కారణంగా చారిత్రాత్మక బీదర్ కోటకు ఒక వైపు గోడలపై మొక్కలు, పొదలు గుబురుగా పెరగడంతో అది మొత్తం కూలిపోయే పరిస్థితి నెలకొంది.
ఎత్తైన గోడ పైభాగంలో మొక్కలు విపరీతంగా పెరిగి పాతుకుపోయాయి. ఆ మొక్కల వేళ్లు గోడ లోలోతుల్లోకి వెళ్లడంతో గోడ కూలిపోయేలా ఉందని స్థానికులు అందోళన చెందుతున్నారు.
బీదర్ జిల్లా కలెక్టరేట్ నివాసం నుంచి సబ్ రిజియన్ సైన్స్ సెంటర్ వరకు విస్తరించి కోట గోడ అందానికి ప్రకృతి సిద్ధంగా పెరిగే వృక్ష సంపద ఆపదగా మారింది. ఒకవేళ మొక్కలు అలాగే పెరిగిపోయి, గోడ పగిలితే మళ్లీ మరమ్మతులు చేయడం దాదాపుగా అసాధ్యమే.
ఈ నేపథ్యంలో ఇప్పటికైనా అధికారులు మేల్కొని బీదర్ కోట అందాలకు అడ్డుగా పెరిగిన మొక్కలను తొలగించాలని స్థానికులు, పర్యాటకులు కోరుతున్నారు.
ఇస్లామిక్, పర్షియన్ వాస్తు శిల్పం, మసీదులు, మహల్‌లు, ముప్పైకి పైగా ఇస్లామిక్ స్మారక చిహ్నాలు.. ఇలా ఎన్నో ఈ బీదర్ కోట సొంతం. ఇక ఈ బీదర్ కోట కర్ణాటక ఉత్తర కొనలో బీదర్ జిల్లాలో ఉంది.