ఓరీ దేవుడో.. ఈ కలర్ ఫుల్ పాపడాల వెనుక ఇంత ప్రమాదం పొంచివుందా..? లొట్టలేసుకుంటూ తిన్నారంటే..
భోజనంలో నంజుకోవడానికి వడియాలు, అప్పడాలు ఉండటం మన భారతీయ ఇళ్లలో సర్వసాధారణం. అయితే, ఈ రోజుల్లో మార్కెట్లో ఎరుపు, ఆకుపచ్చ, పసుపు, గులాబీ వంటి ఆకర్షణీయమైన రంగుల్లో లభించే కలర్ పాపడ్స్, రంగు రంగుల వడియాలకు ఆదరణ పెరిగింది. ముఖ్యంగా పిల్లలు వీటిని ఎంతో ఇష్టంగా తింటారు. కానీ, చూడటానికి కంటికి ఇంపుగా ఉండే ఈ రంగు అప్పడాలు మన ఆరోగ్యాన్ని తీవ్రంగా దెబ్బతీస్తాయని వైద్య నిపుణులు హెచ్చరిస్తున్నారు.
ప్రమాదకరమైన కృత్రిమ రంగులు: మార్కెట్లో ఆకర్షణీయమైన రంగుల్లో దొరికే రంగు వడియాలు, రంగు అప్పడాలు చూడటానికి బాగున్నా, ఆరోగ్యానికి తీవ్ర హాని కలిగిస్తాయని ఆరోగ్య నిపుణులు హెచ్చరిస్తున్నారు. రంగు రంగుల వడియాల తయారీలో ఎక్కువగా నాన్-పెర్మిటెడ్ ఫుడ్ కలర్స్ లేదా అధిక మోతాదులో సింథటిక్ కెమికల్స్ వాడుతుంటారు. ఈ రసాయనాలు శరీరంలో చేరడం వల్ల కాలేయం, మూత్రపిండాల పై తీవ్ర ప్రభావం పడుతుంది. ఇవి దీర్ఘకాలంలో క్యాన్సర్ వంటి ప్రమాదకర వ్యాధులకు కారణమవుతాయి.
అధిక సోడియం, పాపడ్ఖార్: అప్పడాలు ఎక్కువ కాలం నిల్వ ఉండటానికి, కరకరలాడటానికి ఉప్పుతో పాటు పాపడ్ఖార్ (అల్కలైన్ ఉప్పు) ను అధికంగా ఉపయోగిస్తారు. ఇది శరీరంలో సోడియం స్థాయిలను పెంచి రక్తాధిక ఒత్తిడికి దారితీస్తుంది.
జీర్ణక్రియ సమస్యలు,అల్సర్లు: ఈ రంగు వడియాలను నూనెలో తీవ్ర ఉష్ణోగ్రత వద్ద వేయించినప్పుడు ఆ రసాయనాలు మరింత విషపూరితంగా మారతాయి. వీటిని తరచూ తినడం వల్ల కడుపులో మంట, అసిడిటీ, గ్యాస్ట్రిక్ అల్సర్లు, జీర్ణశక్తి మందగించడం వంటి సమస్యలు ఎదురవుతాయి.
గుండె ఆరోగ్యంపై ప్రభావం: వీటిని వేయించడానికి తరచుగా మళ్లీ మళ్లీ వాడిన లేదా నాసిరకం నూనెలను ఉపయోగిస్తుంటారు. దీనివల్ల శరీరంలో చెడు కొలెస్ట్రాల్ పెరిగి గుండె సంబంధిత సమస్యలు వచ్చే ప్రమాదం ఉంది.
పిల్లల ఆరోగ్యంపై ప్రతికూల ప్రభావం: పిల్లల్లో ఈ కృత్రిమ రంగుల ఆహార పదార్థాలు ఏకాగ్రత లోపించడం, అలెర్జీలు, చర్మ సమస్యలు, ఆస్తమా వంటి శ్వాసకోశ ఇబ్బందులకు దారితీస్తాయి. బజార్లో లభించే రంగు అప్పడాలు, వడియాలకు దూరంగా ఉండడమే ఆరోగ్యానికి మంచిది. దానికి బదులుగా ఇంట్లోనే బియ్యప్పిండి, మినపప్పు, సగ్గుబియ్యంతో సహజ సిద్ధంగా, ఎటువంటి కృత్రిమ రంగులు లేకుండా తయారుచేసుకునే సాంప్రదాయ వడియాలను పరిమిత మోతాదులో తీసుకోవడం శ్రేయస్కరం.