కోటలా కనిపించే ఆచంట మదనగోపాలస్వామి ఆలయం.. 16వ శతాబ్దపు రాజుల వైభవానికి సజీవ సాక్ష్యం
పశ్చిమ గోదావరి జిల్లాలోని ఆధ్యాత్మిక సొబగులకు, పురాతన కట్టడాలకు సాక్ష్యంగా నిలిచే అరుదైన ఆలయాల్లో ఆచంట గ్రామంలో వేంచేసి ఉన్న శ్రీ రుక్మిణి, సత్యభామ సమేత మదనగోపాలస్వామి దేవాలయం ఒకటి. ఈ ఆలయ ప్రాంగణంలోకి అడుగుపెట్టిన భక్తులకు అది ఒక దేవాలయమా లేక శత్రుదుర్భేద్యమైన ఒక చారిత్రక కోటనా అనే సందేహం కలగక మానదు.
పశ్చిమ గోదావరి జిల్లాలోని ఆధ్యాత్మిక సొబగులకు, పురాతన కట్టడాలకు సాక్ష్యంగా నిలిచే అరుదైన ఆలయాల్లో ఆచంట గ్రామంలో వేంచేసి ఉన్న శ్రీ రుక్మిణి, సత్యభామ సమేత మదనగోపాలస్వామి దేవాలయం ఒకటి. ఈ ఆలయ ప్రాంగణంలోకి అడుగుపెట్టిన భక్తులకు అది ఒక దేవాలయమా లేక శత్రుదుర్భేద్యమైన ఒక చారిత్రక కోటనా అనే సందేహం కలగక మానదు.
సామాన్యమైన దేవాలయ నిర్మాణాలకు భిన్నంగా, చుట్టూ భారీ ద్వారాలు, ఎత్తైన అరుగులు, పటిష్టమైన ప్రాకారాలతో నిర్మితమైన ఈ ఆలయం ఒక చిన్నపాటి కోటను తలపిస్తూ చూపరులను మంత్రముగ్ధులను చేస్తోంది. 16వ శతాబ్దపు మొఘలూరు రాజవంశీయుల చారిత్రక వారసత్వం. ఈ అద్భుత కట్టడానికి వందల ఏళ్ల ఘనమైన చరిత్ర ఉంది. స్థల పురాణం ప్రకారం, 16వ శతాబ్ద కాలంలో ఈ ప్రాంతాన్ని పరిపాలించిన మొఘలూరు రాజవంశీయులు ఈ మదనగోపాలస్వామిని తమ ఇష్టదైవంగా కొలిచినట్లు తెలుస్తోంది. ఆనాటి రాజుల శిల్పకళా అభిరుచికి, నిర్మాణ కౌశలానికి ఈ ఆలయమే సజీవ సాక్ష్యం.
దేవాలయ ముఖద్వారం నుండి గర్భాలయం వరకు సాగే ప్రతి నిర్మాణంలోనూ రాజసం ఉట్టిపడుతుంది. ఇక్కడ కొలువై ఉన్న రుక్మిణి, సత్యభామ సమేత మదనగోపాలస్వామి శిలా విగ్రహాలు అత్యంత నయన మనోహరంగా ఉండి, భక్తులకు ఆధ్యాత్మిక అనుభూతిని పంచుతున్నాయి.
ఈ ఆలయం కేవలం నిర్మాణానికే పరిమితం కాకుండా, ఏటా జరిగే ఉత్సవాలకు కూడా ఎంతో ప్రసిద్ధి చెందింది. ప్రతి సంవత్సరం చైత్ర శుద్ధ నవమి నుంచి బహుళ పాడ్యమి వరకు మొత్తం ఎనిమిది రోజుల పాటు స్వామివారి కల్యాణోత్సవాలు అత్యంత వైభవంగా నిర్వహిస్తారు. ఈ వేడుకల సమయంలో ఆలయ పరిసరాలు భక్తుల కోలాహలంతో, వేద మంత్రోచ్ఛారణలతో ఆధ్యాత్మిక శోభను సంతరించుకుంటాయి. చుట్టుపక్కల గ్రామాల నుండే కాకుండా సుదూర ప్రాంతాల నుంచి కూడా భక్తులు తరలివచ్చి స్వామివారిని దర్శించుకుని తరిస్తుంటారు.
ప్రశాంతమైన వాతావరణం, పచ్చని ప్రకృతి ఒడిలో విరాజిల్లుతున్న ఈ మదనగోపాలస్వామి ఆలయం పర్యాటక పరంగా కూడా ఎంతో ప్రాముఖ్యతను సంతరించుకుంది. ఆధునిక కాలంలోనూ తన ప్రాచీన వైభవాన్ని కోల్పోకుండా, చరిత్రను మరియు భక్తిని మేళవించిన ఈ క్షేత్రం నేటి తరానికి ఆనాటి రాజుల వైభవాన్ని, సంస్కృతిని పరిచయం చేస్తోంది. అటు చరిత్రకారులను, ఇటు భక్తులను ఏకకాలంలో ఆకట్టుకుంటున్న ఈ 'కోవెల కోట' ఆచంట గ్రామానికే ఒక మణిహారంగా నిలుస్తోంది.