Fact Check: రష్యా అమ్మాయి.. బీహార్ యువకుడి ప్రేమ! వైరల్ వీడియో వెనుక అసలు కథ వేరే.. ఫ్యాక్ట్ చెక్‌లో షాకింగ్ నిజాలు!
Fact Check: సోషల్ మీడియాలో వైరల్ అవుతున్న వీడియోలో కొందరు విదేశీ మహిళలు బీహార్‌లోని ఓ గ్రామంలో కనిపిస్తున్నారు. చేతుల్లో పూలు, ముఖాల్లో చిరునవ్వులతో స్థానిక ప్రజల మధ్య వారు సందడి చేస్తున్నారు. సాధారణ గ్రామీణ ఇళ్లు, అక్కడి వాతావరణం మధ్య విదేశీ..
Fact Check: ప్రేమకు దేశాలు, భాషలు అడ్డుకావంటారు. సరిగ్గా ఇలాంటి కథే ఇప్పుడు సోషల్ మీడియాలో వైరల్‌గా మారింది. బీహార్‌కు చెందిన రాహుల్ యాదవ్ అనే యువకుడిని ప్రేమించిన ఓ రష్యా యువతి.. అతడి కోసం తన దేశాన్ని వదిలి భారత్‌కు వచ్చిందని ప్రచారం జరుగుతోంది. అంతేకాదు, వీరిద్దరి పెళ్లికి కుటుంబ సభ్యులు కూడా అంగీకరించారంటూ పోస్టులు వైరల్ అవుతున్నాయి. గ్రామీణ వాతావరణంలో విదేశీ మహిళలు కనిపిస్తున్న వీడియో ఈ ప్రచారానికి మరింత బలం చేకూర్చింది. అయితే, ఈ కథలో నిజమెంత? ప్రేమ కోసం విదేశాల నుంచి యువతి వచ్చిందన్న ప్రచారం వెనుక అసలు విషయం ఏమిటి?
గ్రామంలో విదేశీ మహిళలు.. ఆసక్తి రేపిన వీడియో
సోషల్ మీడియాలో వైరల్ అవుతున్న వీడియోలో కొందరు విదేశీ మహిళలు బీహార్‌లోని ఓ గ్రామంలో కనిపిస్తున్నారు. చేతుల్లో పూలు, ముఖాల్లో చిరునవ్వులతో స్థానిక ప్రజల మధ్య వారు సందడి చేస్తున్నారు. సాధారణ గ్రామీణ ఇళ్లు, అక్కడి వాతావరణం మధ్య విదేశీ మహిళలు కనిపించడంతో ఈ వీడియో అందరి దృష్టిని ఆకర్షించింది. ఈ దృశ్యాలను షేర్ చేసిన కొందరు నెటిజన్లు.. బీహార్‌కు చెందిన రాహుల్ యాదవ్‌పై ప్రేమతో ఓ రష్యా యువతి భారత్‌కు వచ్చిందని పేర్కొన్నారు. అతడు దూరంగా ఉంటున్నా, అతడితోనే కలిసి జీవించాలని ఆమె నిర్ణయించుకుందని ప్రచారం చేశారు. అంతేకాదు, నవంబర్‌లో ఇద్దరి పెళ్లి జరగబోతోందని కూడా పోస్టుల్లో పేర్కొన్నారు.
ప్రేమకథగా మారిన వీడియో.. రంగంలోకి దిగిన ఫ్యాక్ట్ చెక్ బృందం:
ఈ వీడియోతో పాటు ప్రచారంలో ఉన్న కథనం ఆసక్తికరంగా ఉండటంతో చాలామంది దాన్ని నిజమని నమ్మే పరిస్థితి ఏర్పడింది. అయితే, ఈ ప్రచారంపై అనుమానం రావడంతో టీవీ9 వైరల్ టెస్ట్ బృందం అసలు విషయాన్ని తెలుసుకునేందుకు రంగంలోకి దిగింది. వీడియోలో కనిపిస్తున్న దృశ్యాలను ఆధారంగా చేసుకుని రివర్స్ ఇమేజ్ సెర్చ్ నిర్వహించింది. ఇన్‌స్టాగ్రామ్‌లో అదే మహిళలు కనిపిస్తున్న ఇతర వీడియోలను గుర్తించింది. అక్కడి నుంచి లభించిన వివరాలను పరిశీలించగా, సోషల్ మీడియాలో జరుగుతున్న ప్రచారానికి, వాస్తవానికి మధ్య తేడా ఉన్నట్లు వెల్లడైంది.
అసలు కథ ఇదే.. స్వచ్ఛంద సంస్థతో సంబంధం!
టీవీ9 పరిశోధన ప్రకారం.. వైరల్ వీడియోలో కనిపిస్తున్న మహిళలు బ్రిటన్‌కు చెందిన ‘శివ్యా’ అనే స్వచ్ఛంద సంస్థతో సంబంధం కలిగి ఉన్నారు. ఈ సంస్థ బీహార్‌లోని పూర్ణియాలో ‘సాథీ’ అనే మరో స్వచ్ఛంద సంస్థతో కలిసి పనిచేస్తోంది. మహిళలు స్వయం సమృద్ధి సాధించేలా ప్రోత్సహించడం, వారికి సాధికారత కల్పించడం లక్ష్యంగా ఈ సంస్థలు పలు కార్యక్రమాలను నిర్వహిస్తున్నాయి. ఈ నేపథ్యంలోనే విదేశీ మహిళలు బీహార్‌లోని గ్రామీణ ప్రాంతంలో కనిపించినట్లు పరిశోధనలో వెల్లడైంది.
ఆండ్రియా కొన్నోలీ అక్కడికి ఎందుకు వెళ్లారు?
వైరల్ వీడియోలో కనిపిస్తున్న యువతి పేరు ఆండ్రియా కొన్నోలీ. ఆమె శివ్యా స్వచ్ఛంద సంస్థతో సంబంధం కలిగి ఉన్నారని టీవీ9 పరిశోధనలు తేలింది. ఓ కార్యక్రమంలో పాల్గొనేందుకు ఆమె బీహార్‌లోని పూర్ణియాకు వెళ్లినట్లు పరిశోధనలో తేలింది. అంటే, ఆమె ఓ బీహార్ యువకుడిని ప్రేమించి పెళ్లి చేసుకోవడానికి రష్యా నుంచి వచ్చారన్న ప్రచారానికి ఆధారాలు లేవు. గ్రామంలో విదేశీ మహిళలు కనిపించిన దృశ్యాలను ప్రేమకథతో ముడిపెట్టి సోషల్ మీడియాలో ప్రచారం చేసినట్లు ఈ ఫ్యాక్ట్ చెక్ వెల్లడించింది.
చివరకు ఏమి తేలింది?
రష్యా యువతి ప్రేమ కోసం బీహార్‌కు వచ్చిందని, రాహుల్ యాదవ్‌తో నవంబర్‌లో పెళ్లి జరగబోతోందని జరుగుతున్న ప్రచారంపై టీవీ9 వైరల్ టెస్ట్ బృందం పరిశీలించగా, ఇది తప్పుదోవ పట్టించే సమాచారంగా నిర్ధారించింది. వైరల్ వీడియో కనిపించినంత మాత్రాన దానితో పాటు ప్రచారంలో ఉన్న కథనాన్ని నిజమని నమ్మకూడదని ఈ ఘటన మరోసారి గుర్తుచేస్తోంది. సోషల్ మీడియాలో ఏదైనా ఆసక్తికరమైన వీడియో కనిపిస్తే, దాని వెనుక ఉన్న వాస్తవాలను తెలుసుకున్న తర్వాతే షేర్ చేయడం మంచిది.
ఫ్యాక్ట్ చెక్: రష్యా యువతి ప్రేమ కోసం బీహార్‌కు వచ్చి పెళ్లి చేసుకోబోతోందన్న వైరల్ ప్రచారం తప్పు. ఆమె పూర్ణియాకు ఓ కార్యక్రమంలో పాల్గొనేందుకు వెళ్లినట్లు టీవీ9 పరిశోధనలో వెల్లడైంది.
మరిన్ని జాతీయ వార్తల కోసం ఇక్కడ క్లిక్ చేయండి