Video Viral: రూ.3,383 కోట్ల ఆస్తులు.. అయినా ముంబై వీధుల్లో భిక్షాటన!

Parag Shah, Bjp Mla

ముంబై: సాధారణంగా రాజకీయ నాయకులు కనిపిస్తే చుట్టూ భద్రతా సిబ్బంది, ఖరీదైన కార్లు, అనుచరులు ఉంటారు. కానీ మహారాష్ట్రలో ఓ బీజేపీ ఎమ్మెల్యే మాత్రం ఇందుకు పూర్తి భిన్నంగా కనిపించారు. కోట్లాది రూపాయల ఆస్తులు ఉన్న ఈ ప్రజాప్రతినిధి.. తన రాజకీయ హోదా, భద్రతా సిబ్బంది, ఖరీదైన కార్లన్నింటినీ పక్కనపెట్టి బిచ్చగాడి వేషంలో ముంబై వీధుల్లోకి వెళ్లారు.

ఘట్‌కోపర్ బీజేపీ ఎమ్మెల్యే పరాగ్ షాకు సంబంధించిన ఈ వీడియో ప్రస్తుతం సోషల్ మీడియాలో వైరల్ అవుతోంది. 2024 మహారాష్ట్ర అసెంబ్లీ ఎన్నికల అఫిడవిట్‌లో ఆయన రూ.3,383 కోట్లకు పైగా ఆస్తులు ఉన్నట్లు పేర్కొన్నారు. అలాంటి వ్యక్తి సాధారణ దుస్తుల్లో, తన గుర్తింపును దాచుకుని ఘట్‌కోపర్ రైల్వే స్టేషన్ పరిసరాల్లో భిక్షాటన చేయడం ఆసక్తిని రేకెత్తించింది.

డబ్బున్న వ్యక్తి.. బిచ్చగాడిగా ఎందుకు?

పరాగ్ షా ఈ ప్రయోగాన్ని రాజకీయ ప్రచారం కోసం కాకుండా పర్యుషణ పర్వదినాలు, జైన చాతుర్మాసం సందర్భంగా చేపట్టినట్లు ఆయనకు సంబంధించిన వివరాల్లో పేర్కొన్నారు. జాతీయ సంత్ నమ్రముని మహారాజ్ సాహెబ్ సందేశంతో స్ఫూర్తి పొంది ఈ ప్రయోగం చేసినట్లు చెబుతున్నారు. సమాజంలోని పేదలు, నిరుపేదలు, ఇతరుల సహాయంపై ఆధారపడి జీవించే వ్యక్తుల పరిస్థితిని ప్రత్యక్షంగా అర్థం చేసుకోవడమే దీని ఉద్దేశంగా వివరించారు. అందులో భాగంగా తన రూపాన్ని పూర్తిగా మార్చుకుని, సాధారణ వ్యక్తిలా వీధుల్లోకి వెళ్లి ప్రజలను సహాయం కోరారు.

🙏 पवित्र पर्युषण पर्व पर एक प्रेरणादायी अनुभव 🙏

परम पूज्य राष्ट्रसंत श्री नम्रमुनि महाराज साहेब ने अपने प्रवचन में समाज के जरूरतमंद लोगों के प्रति संवेदनशीलता, करुणा और मानवता का संदेश दिया।

गुरुदेव की आज्ञा का पालन करते हुए वेशभूषा बदलकर घाटकोपर रेलवे स्टेशन परिसर में आम नागरिकों के बीच समय बिताया और उनके जीवन की वास्तविकताओं को करीब से अनुभव किया।

#ParyushanParv #NammramuniMaharajSaheb #Paryushan2026 #SevaBhaviParagShah2_0

— Parag Shah (@ParagShahBJP) September 14, 2026

కొందరు డబ్బిచ్చారు.. మరికొందరు పట్టించుకోలేదు

బిచ్చగాడి వేషంలో ఉన్నప్పుడు పరాగ్ షాకు భిన్నమైన అనుభవాలు ఎదురయ్యాయి. కొందరు ఆయనను పట్టించుకోకుండా వెళ్లిపోయారు. మరికొందరు సానుభూతితో కొంత డబ్బు ఇచ్చారు. ఇంకొందరు ఆహారం అందించారు. అదే సమయంలో మరికొన్ని చోట్ల ఆయనను అక్కడి నుంచి వెళ్లిపోవాలని కొందరు కోరినట్లు వీడియోకు సంబంధించిన వివరాల్లో కనిపిస్తోంది. ఒకే వ్యక్తి.. కానీ సమాజం చూపించిన స్పందన మాత్రం పూర్తిగా భిన్నం. ఇదే ఈ ప్రయోగంలో ప్రధానంగా చర్చకు వచ్చిన అంశంగా మారింది.

మేకప్ తొలగించగానే సీన్ మారిపోయింది!

కొన్ని గంటల తర్వాత పరాగ్ షా తన వేషధారణను తొలగించి అసలు రూపంలోకి వచ్చారు. ఆ తర్వాత అదే ప్రాంతాలకు తన సాధారణ రాజకీయ హోదాతో, ఖరీదైన కార్లు, భద్రతా సిబ్బందితో తిరిగి వెళ్లడంతో పరిస్థితి ఒక్కసారిగా మారిపోయింది. కొద్దిసేపటి క్రితం వరకు పట్టించుకోని వ్యక్తులే ఇప్పుడు ఆయనను గుర్తించి పలకరించడం, గౌరవించడం వంటి పరిణామాలు చోటుచేసుకున్నాయి. దీంతో ఈ ప్రయోగం ద్వారా మనిషి విలువను అతని వ్యక్తిత్వం కంటే అతని రూపం, సామాజిక స్థాయి, ఆర్థిక స్థితి ఆధారంగా అంచనా వేస్తున్నామా? అనే ప్రశ్న ముందుకొచ్చింది.

‘డబ్బు ఉన్నప్పుడు చేతులు ఇచ్చేవి.. లేనప్పుడు అడిగేవి’

ఈ అనుభవం గురించి పరాగ్ షా చేసిన వ్యాఖ్యలుగా ప్రచారంలో ఉన్న సందేశం కూడా సోషల్ మీడియాలో చర్చకు దారితీసింది. ఒక వ్యక్తి పరిస్థితులు అనుకూలంగా ఉన్నప్పుడు అతని చేతులు ఇతరులకు ఆహారం అందించగలవు. అదే పరిస్థితులు మారినప్పుడు అదే చేతులు ఒక ముద్ద ఆహారం కోసం ఇతరులను ఆశ్రయించాల్సి రావచ్చు. అంటే సంపద, హోదా, గుర్తింపు అన్నీ పరిస్థితులకు అనుగుణంగా మారే అంశాలే.. కానీ మానవత్వం మాత్రం అందరికీ ఒకేలా ఉండాలి అన్న సందేశాన్ని ఈ ప్రయోగం ద్వారా ఇవ్వాలని ప్రయత్నించినట్లు తెలుస్తోంది.

పేదల జీవితాన్ని దగ్గరగా చూసే ప్రయత్నమా?

భిక్షాటన చేసే వ్యక్తులను చాలాసార్లు సమాజం పట్టించుకోకుండా దాటిపోతుంది. మరికొందరు వారికి సహాయం చేస్తారు. ఇంకొందరు వారిని అక్కడి నుంచి వెళ్లిపోవాలని చెబుతారు. అలాంటి పరిస్థితిని ఒకరోజు ప్రత్యక్షంగా అనుభవించడం ద్వారా, పేదలు ఎదుర్కొనే అవమానం, నిర్లక్ష్యం, ఆకలి, ఇతరుల దయపై ఆధారపడే పరిస్థితి వంటి అంశాలను అర్థం చేసుకోవాలన్నదే ఈ ప్రయోగం ఉద్దేశంగా కనిపిస్తుంది. అయితే ఈ ఒక్కరోజు అనుభవాన్ని పేదరికాన్ని పూర్తిగా అనుభవించిన వ్యక్తుల జీవితంతో సమానంగా చూడలేమన్నది కూడా గుర్తుంచుకోవాల్సిన అంశమే. ఎందుకంటే ఎమ్మెల్యేకు తిరిగి తన సాధారణ జీవితం, ఆర్థిక భద్రత, సామాజిక హోదా అందుబాటులో ఉన్నాయి.

సోషల్ మీడియాలో వైరల్‌గా మారిన వీడియో ఇక్కడ చూడండి..

घाटकोपर चे कोट्याधीश आमदार पराग शहा जेव्हा वेषांतर करून घाटकोपर च्या रस्त्यावर भिकारी बनून फिरतात…!!!
आपल्या गुरूने दिलेली आज्ञा पाळून पाच हजार कोटी चे मालक असलेले आमदार पराग शहा यांनी एक दिवस त्यांच्या मतदार संघ घाटकोपर पूर्व मध्ये भिकारी बनून दिवस काढला..!!
तेव्हा काय घडले पहा https://t.co/eEXw9I1joo

— Siyadivinelybeautyful 🇮🇳 (@Siya83377032) September 13, 2026

పరాగ్ షా బిచ్చగాడి వేషంలో వీధుల్లో తిరుగుతున్న దృశ్యాలు, అనంతరం తన అసలు రూపంలో కనిపించిన దృశ్యాలు సోషల్ మీడియాలో వైరల్‌గా మారాయి. ఈ వీడియోపై నెటిజన్లు భిన్నాభిప్రాయాలు వ్యక్తం చేస్తున్నారు. కొందరు దీన్ని పేదల పరిస్థితిని అర్థం చేసుకునే మంచి ప్రయత్నంగా ప్రశంసిస్తుండగా, మరికొందరు ఇలాంటి ప్రయోగాల ద్వారా పేదరికాన్ని పూర్తిగా అర్థం చేసుకోవడం సాధ్యం కాదని అభిప్రాయపడుతున్నారు. అయితే రాజకీయ నాయకుడి సాధారణ ప్రజల మధ్య ఇలాంటి విభిన్న ప్రయోగం చేయడం మాత్రం చర్చనీయాంశంగా మారింది.

మరిన్ని హ్యుమన్ ఇంట్రెస్ట్ వార్తల కోసం ఇక్కడ క్లిక్ చేయండి..