మరోసారి వివాదాల్లో చిక్కుకున్న బీజేపీ ఎంపీ కంగనా రనౌత్.. ఏకంగా ఎఫ్ఐఆర్ నమోదు!
బాలీవుడ్ నటి, బీజేపీ ఎంపీ కంగనా రనౌత్ మరోసారి వివాదంలో చిక్కుకున్నారు. గాంధీ కుటుంబాన్ని లక్ష్యంగా చేసుకుని సోషల్ మీడియాలో ఆమె చేసిన వ్యాఖ్యలు తీవ్ర దుమారం రేపుతున్నాయి. ఈ వ్యాఖ్యలు ప్రజల్లో విద్వేషాన్ని రెచ్చగొట్టేలా ఉన్నాయంటూ వచ్చిన ఫిర్యాదు ఆధారంగా హిమాచల్ ప్రదేశ్ పోలీసులు ఆమెపై ఎఫ్ఐఆర్ నమోదు చేశారు.
బాలీవుడ్ నటి, బీజేపీ ఎంపీ కంగనా రనౌత్ మరోసారి వివాదంలో చిక్కుకున్నారు. గాంధీ కుటుంబాన్ని లక్ష్యంగా చేసుకుని సోషల్ మీడియాలో ఆమె చేసిన వ్యాఖ్యలు తీవ్ర దుమారం రేపుతున్నాయి. ఈ వ్యాఖ్యలు ప్రజల్లో విద్వేషాన్ని రెచ్చగొట్టేలా ఉన్నాయంటూ వచ్చిన ఫిర్యాదు ఆధారంగా హిమాచల్ ప్రదేశ్ పోలీసులు ఆమెపై ఎఫ్ఐఆర్ నమోదు చేశారు.
అసలు వివాదం ఏమిటంటే?
సిమ్లాకు చెందిన రిటైర్డ్ కెప్టెన్ అతుల్ శర్మ ఇచ్చిన ఫిర్యాదు మేరకు నవంబర్ 13న ఈ కేసు నమోదైంది. నవంబర్ 10న కంగనా తన ధృవీకరించిన సోషల్ మీడియా ఖాతాలో చేసిన పోస్టులో మాజీ ప్రధాని ఇందిరా గాంధీ, ఆమె కుమారులు సంజయ్ గాంధీ, రాజీవ్ గాంధీల మరణాలపై రెచ్చగొట్టే వ్యాఖ్యలు చేశారని ఫిర్యాదుదారు ఆరోపించారు. అంతేకాకుండా కాంగ్రెస్ నేత సోనియా గాంధీని ఉద్దేశించి చేసిన వ్యాఖ్యలు కూడా అభ్యంతరకరంగా ఉన్నాయని పేర్కొన్నారు. గాంధీ కుటుంబ మరణాలకు సంబంధించిన అంశాలను ప్రస్తావిస్తూ పరోక్ష ఆరోపణలు చేశారని ఫిర్యాదులో తెలిపారు.
మూడు సెక్షన్ల కింద కేసు నమోదు!
భారతీయ న్యాయ సంహిత (BNS)లోని 196(1)(b), 353(2), 356(2) సెక్షన్ల కింద పోలీసులు ఎఫ్ఐఆర్ నమోదు చేశారు. సిమ్లా ఎస్పీ గౌరవ్ సింగ్ కేసు నమోదును ధృవీకరిస్తూ దర్యాప్తు కొనసాగుతోందని వెల్లడించారు. సుమారు 1981 నాటి గాంధీ కుటుంబానికి సంబంధించిన పాత వీడియో సోషల్ మీడియాలో మళ్లీ వైరల్ అయిన నేపథ్యంలో కంగనా ఈ పోస్టు చేసినట్లు సమాచారం. సోనియా గాంధీ ఆత్మకథ విడుదలైన రోజునే ఈ వ్యాఖ్యలు వెలువడటం మరింత చర్చనీయాంశమైంది. ప్రస్తుతం ఈ వ్యవహారంపై పోలీసుల దర్యాప్తు కొనసాగుతోంది. కంగనా రనౌత్‌పై నమోదైన ఈ కేసు రాజకీయ వర్గాల్లో ఎలాంటి పరిణామాలకు దారితీస్తుందో చూడాలి.
మరిన్ని జాతీయ వార్తల కోసం ఇక్కడ క్లిక్ చేయండి..