క్యాన్సర్ రోగులకు ఉపశమనం.. 543 రకాల మందుల ధరలు భారీగా తగ్గింపు.. కొత్త రేట్లు ఇలా..
Cancer Drug Price Cut: క్యాన్సర్ రోగులకు కేంద్ర ప్రభుత్వం ఉపశమనం కల్పించింది. ఎన్‌పీపీఏ 543 రకాల క్యాన్సర్ మందుల గరిష్ఠ విక్రయ ధరలను తగ్గించినట్లు ప్రకటించింది. సవరించిన ధరలు నవంబరు 9, 2026 నుంచి అమల్లోకి రానున్నాయి. ఫుల్‌బ్రెకా, బెవాసిజాబ్, అజాసిటిన్ సహా పలు మందుల పాత ధరలు, కొత్త ధరల వివరాలు తెలుసుకోండి.
న్యూఢిల్లీ: క్యాన్సర్ మహమ్మారితో పోరాడుతున్న లక్షలాది మంది రోగులకు కేంద్ర ప్రభుత్వం భారీ ఉపశమనం అందించింది. జాతీయ ఔషధ ధరల నియంత్రణ సంస్థ (NPPA) వివిధ ప్రముఖ ఫార్మా బ్రాండ్లకు చెందిన ఏకంగా 543 రకాల క్యాన్సర్ నిరోధక మందుల (Anti-Cancer Drugs) గరిష్ఠ విక్రయ ధరలను (MRP) భారీగా తగ్గిస్తున్నట్లు ప్రకటించింది. సవరించిన ఈ కొత్త ధరలు నవంబరు 9, 2026 నుంచి అమల్లోకి రానున్నాయి. కేంద్ర రసాయనాలు, ఎరువుల మంత్రిత్వ శాఖ పరిధిలోని ఔషధ విభాగం తెలిపిన వివరాల ప్రకారం.. ఈనెల 27 వరకు ఫార్మా కంపెనీలు సమర్పించిన సమాచారం ఆధారంగా ఎన్‌పీపీఏ ఈ సవరించిన ధరల జాబితాను విడుదల చేసింది. షెడ్యూల్‌లో చేర్చని మిగిలిన క్యాన్సర్ మందుల ధరలను తయారీదారులు సవరించినప్పుడల్లా ఈ జాబితాను నిరంతరం నవీకరిస్తామని స్పష్టం చేసింది. ప్రముఖ కంపెనీల మందులన్నీ సామాన్యులకూ తక్కువ ధరకే లభించనున్నాయి.
తగ్గించిన ధరల ప్రకారం..
ఫుల్‌బ్రెకా (5 మి.లీ. వయల్‌): ఆర్‌పీజీ లైఫ్‌ సైన్సెస్‌కు చెందిన ఈ మందు పాత ధర రూ. 26,072.16 కాగా, సవరించిన కొత్త ధర రూ. 5,491 కు చేరింది.
డెబ్రుమాబ్‌ (60 మి.గ్రా. సిరంజి): ఆర్‌పీజీ లైఫ్‌ సైన్సెస్‌ ఉత్పత్తి ధర రూ. 22,031.25 నుంచి రూ. 5,941కు పడిపోయింది.
బెవాసిజాబ్ (4 మి.లీ. వయల్‌): అబాట్‌ హెల్త్‌కేర్‌కు చెందిన ఈ ప్రాణరక్షక మందు ధర రూ. 21,767.70 నుంచి ఏకంగా రూ. 5,930.10 కు తగ్గింది.
ఫ్లూడానాక్స్‌ (వయల్‌): హెటెరో హెల్త్‌కేర్‌ ఉత్పత్తి ధర రూ. 14,235.00 నుంచి రూ. 2,432 కి భారీగా తగ్గింది.
ఎనుటా (28 క్యాప్సూల్స్): ఆర్‌పీజీ లైఫ్‌ సైన్సెస్‌ బ్రాండ్ ధర రూ. 6,578.20 నుంచి రూ. 2,232 కు అందుబాటులోకి వచ్చింది.
అజాసిటిన్ (ఒక ప్యాక్): డాక్టర్‌ రెడ్డీస్‌ లేబొరేటరీస్ ఉత్పత్తి ధర రూ. 6,337.00 నుంచి రూ. 1,495 కి దిగివచ్చింది.
డసానాట్‌ 20 (60 మాత్రలు): నాట్కో ఫార్మా ఉత్పత్తి చేస్తున్న ఈ టాబ్లెట్ల ప్యాక్ ధర రూ. 2,812.50 నుంచి రూ. 1,085.90 కు తగ్గనుంది.
ఆర్థిక స్థోమత లేక వైద్యానికి దూరమవుతున్న సగటు పేద మరియు మధ్యతరగతి రోగులకు ఈ ధరల తగ్గింపు ప్రాణదానంతో సమానమని రసాయన, ఎరువుల మంత్రిత్వ శాఖ పేర్కొంది. నవంబరు 9 నాటికి దేశంలోని అన్ని ఫార్మసీలు, హాస్పిటళ్లు తగ్గిన ఎంఆర్‌పీల ప్రకారమే విక్రయాలు జరపాలని, ధరల ఉల్లంఘనలపై కఠిన చర్యలు ఉంటాయని ఎన్‌పీపీఏ స్పష్టం చేసింది.