మీ ఇంట్లోకి పాములను ఆకర్షించే వస్తువులు ఇవే.. వెంటనే పడేయండి!
వర్షాకాలంలో పాములు ఇంట్లోకి రావడం సహజమే. చాలా చోట్ల పాములు ఇంటి బయట విడిచిన బూట్లలో దాక్కుని తద్వారా ఇంట్లోకి ప్రవేశిస్తుంటాయి. ఇటీవల ఓ వ్యక్తి బూటులో పాము ఉందని గమనించకుండా దానిని ధరించి ప్రాణాలు కోల్పోయిన సంగతి తెలిసిందే. కాబట్టి ఈ కాలంలో మరింత అప్రమత్తంగా..
పాములంటే భయపడని వారుండరు. ముఖ్యంగా వర్షాకాలంలో పాములు ఇంట్లోకి రావడం సహజమే. చాలా చోట్ల పాములు ఇంటి బయట విడిచిన బూట్లలో దాక్కుని తద్వారా ఇంట్లోకి ప్రవేశిస్తుంటాయి. ఇటీవల ఓ వ్యక్తి బూటులో పాము ఉందని గమనించకుండా దానిని ధరించి ప్రాణాలు కోల్పోయిన సంగతి తెలిసిందే. కాబట్టి ఈ కాలంలో మరింత అప్రమత్తంగా ఉండటం చాలా అవసరం. మొదట ఇంట్లోకి పాములు రాకుండా ఎలా నిరోధించాలో, ఎలాంటి చర్యలు పాటించాలో ముందుగా తెలుసుకోవాలి. ముఖ్యంగా కొన్ని రకాల వస్తువులను ఇంటి చుట్టూ ఉంచితే, పాములు వాటిని ఆకర్షిస్తాయి. మీ ఇంట్లో అలాంటి వస్తువులు ఉంటే పాములు ఈ క్షణమైనా మీ ఇంట్లోకి వచ్చే ప్రమాదం ఉంది. వెంటనే వాటిని తొలగించడం మంచిది. అవేంటో ఇక్కడ తెలుసుకుందాం..
నీటి వనరులు, వాటి చుట్టూ ఉన్న మొక్కలు..
ఇంటి దగ్గరలో చెరువు, నీటి కుంట, ఏదైనా నీరు నిల్వ ఉంటే అది పాములు నివసించడానికి మంచి ప్రదేశంగా మారుతుంది. నిల్వ నీటిలో కనిపించే కీటకాలు, కప్పలు పాములకు ప్రధాన ఆహారం. దీనితో పాటు ఈ నీటి నిల్వల దగ్గర పెరిగే తామర, లిల్లీ మొదలైన మొక్కలు కూడా పాములను ఆకర్షిస్తాయి. వాటి మృదువైన కాండాలు పాములు నివసించడానికి అనువైన ప్రదేశంగా మారుతాయి. కాబట్టి ఇంటి చుట్టూ నీరు పేరుకుపోకుండా, గడ్డి, మొక్కలను ఎప్పటికప్పుడు శుభ్రంగా ఉంచుకోవాలి.
దట్టమైన పొదలు
పాములు దట్టమైన పొదల్లో సులభంగా దాక్కోగలవు. ఇవి దాక్కునే ప్రదేశాన్ని అందించడమే కాకుండా, పాములు తినగలిగే కీటకాలు, చిన్న జీవులకు నివాసంగా కూడా ఉంటుంది. కాబట్టి వీలైనంత వరకు ఇంటికి సమీపంలో ఉండే పొదలను నాశనం చేయడం మంచిది.
పెద్ద చెట్లు, దట్టమైన పుష్పించే మొక్కలు వద్దు
పెద్ద పొదలు, పుష్పించే మొక్కలు చిన్న జంతువులు, పక్షులు, కీటకాలను ఆకర్షిస్తాయి. ఇవన్నీ పాములకు ఆహారంగా ఉంటాయి. దట్టమైన పూలతో నిండిన ప్రాంతాలు పాములకు మంచి ఆవాసాలు. చెట్ల కింద ఎక్కువ చెత్తను ఉంచవద్దు. పుష్పించే మొక్కలను శుభ్రంగా ఉంచాలి.
ఆకు కుప్పలు, కుళ్ళిన వ్యర్థాలు
ఈ పాములకు చలి, వేడి నుండి తప్పించుకోవడానికి తేమతో కూడిన ప్రదేశం అవసరం. ఇవి ఎక్కువగా ఆకుల కుప్పలు, కుళ్ళిపోతున్న చెత్తకు ఆకర్షితులవుతాయి. దీనితోపాటు ఎలుకలు, కీటకాలు కూడా ఇలాంటి ప్రదేశాల్లో సులభంగా లభిస్తాయి. ఇది పాములను మరింత ఆకర్షిస్తుంది.
సువాసనగల పువ్వులు
మల్లే, చామంతి వంటి సువాసనగల మొక్కలు కూడా పాములను ఆకర్షిస్తాయి. ఈ మొక్కలను శుభ్రంగా ఉంచడం ముఖ్యం. పుష్పించే మొక్కలను శుభ్రంగా ఉంచడం, వాటి చుట్టూ గడ్డి, ఆకులు కుప్పలు పెరగకుండా చూసుకోవాలి.
పాములను తరిమికొట్టే మొక్కలు పెంచాలి
గంధం, లావెండర్, పుదీనా, నిమ్మగడ్డి, కాక్టస్ వంటి మొక్కల నుంచి వెలువడే బలమైన వాసన పాములను దూరంగా ఉంచుతాయి. ఈ మొక్కలను ఇంటి బయట, బాల్కనీలో నాటాలి. అదే సమయంలో నిమ్మగడ్డి, పుదీనా, వెల్లుల్లి వంటి మొక్కలు, వాటి నూనె వాసన పాములు ఇష్టపడవు. దీనితో పాటు దాల్చిన చెక్క, లవంగాలు, వెనిగర్ వాసన పాములను పారిపోయేలా చేస్తుంది.
మరిన్ని లైఫ్స్టైల్ కథనాల కోసం ఇక్కడ క్లిక్ చేయండి.