హెల్త్ని నిర్లక్ష్యం చేస్తున్నారా? ఐ యామ్ ఫైన్ అనుకుంటే ఏం జరుగుతుందో తెలుసా
‘నేను బాగానే ఉన్నాను’ అని చెప్పడం సానుకూల ధోరణి అని చాలామంది భావిస్తారు. అయితే ఇదే మాట మన ఆరోగ్యాన్ని ఎంతలా నిర్లక్ష్యం చేసేలా చేస్తుందో తెలిస్తే విస్తుపోతారు. నిజానికి ఈ సిండ్రోమ్తో బాధపడుతున్నామని వైద్యులు, మానసిక నిపుణులు సైతం ముందుగా గుర్తించలేరు. చిన్నప్పటి నుంచి ఎవరైనా ఎలా ఉన్నారని అడిగితే బాగున్నాను అని చెప్పడం మనకు అలవాటైంది. కానీ ఈ సమాధానమే పెద్దయ్యాక సర్దుబాటు పద్ధతిగా మారి, తీవ్రమైన మానసిక క్షోభగా పరిణమిస్తుందని నిపుణులు హెచ్చరిస్తున్నారు. తనలోని ఆందోళన సంకేతాలను విస్మరిస్తూ అంతా తన అధీనంలోనే ఉందనే భ్రమలో ఉండటమే ఈ సిండ్రోమ్ ప్రధాన లక్షణం.
‘నేను బాగానే ఉన్నాను’ అనే సిండ్రోమ్ మనల్ని మభ్యపెట్టి బతికేలా చేస్తుంది. ఒక వ్యక్తి తనలోని అసౌకర్యాన్ని అంగీకరించకుండా, భావోద్వేగాలను అణిచివేసే స్థితిలో ఉంటారు. దీనివల్ల ఎలాంటి పరిస్థితుల్లోనైనా ముందుకు సాగాలని భావించి, తమ ఆరోగ్యాన్ని పణంగా పెడతారు. ముఖ్యంగా ఉద్యోగ నిపుణులు ఈ సమస్యను ఎక్కువగా ఎదుర్కొంటున్నారు. వృత్తిపరమైన ఒత్తిడి, టార్గెట్లు, అదనపు పని భారాన్ని అధిగమించడానికి ప్రయత్నిస్తూ, భోజనం మానేయడం, నిద్రలేని రాత్రులు గడపడం, నిరంతర అలసట వంటి హెచ్చరిక సంకేతాలను విస్మరిస్తారు. ఇక్కడ జీవితాన్ని అనుభవించడం లేదు, కేవలం పోటీ పడుతున్నామని గుర్తించాలి. పరిస్థితులు చక్కబడ్డాక ఆరోగ్యం చూసుకోవచ్చులే అనుకుంటూ, తెలియకుండానే ఒక భయంకరమైన వలయంలో కూరుకుపోతారు.
గుర్తించాల్సిన సంకేతాలు..
ఈ స్థితిలో ఉన్నప్పుడు నిద్రలేమి, ఏకాగ్రత లోపం, జ్ఞాపకశక్తి సమస్యలు కనిపిస్తాయి. కారణం తెలియకుండానే ఆకలి లేదా బరువులో మార్పులు సంభవించవచ్చు. పనిలో ఉత్పాదకత తగ్గడం, సామాజికంగా ఒంటరితనం, అభిరుచులపై ఆసక్తి లేకపోవడం వంటివి ప్రధాన లక్షణాలు. చిరాకు, ఆవేశపూరిత ప్రవర్తన, తరచుగా తలనొప్పులు లేదా జీర్ణకోశ సమస్యలు వేధిస్తాయి. మానసిక నిరాకరణ అనేది తరచుగా భయం, సామాజిక కండిషనింగ్ నుండి పుడుతుంది. తాము బలహీనంగా కనిపిస్తామేమోననే సిగ్గుతో సమస్యలను అంగీకరించడానికి ఇష్టపడరు.
స్వీయ రక్షణ ఎలా?
భావోద్వేగాలను అణిచివేయడం వల్ల సమస్య పరిష్కారం కాదు. ఒత్తిడి, ఆందోళన వంటి పరిస్థితులను అంగీకరించి, వాటి నుంచి బయటపడే మార్గాలను వెతకాలి. బాగున్నాను అనే మాటకు కట్టుబడి ఆరోగ్యాన్ని నిర్లక్ష్యం చేయవద్దు. స్వీయ సంరక్షణపై దృష్టి పెట్టడం చాలా అవసరం. కష్టమైన సమయాల్లో సహాయం కోరడం బలహీనత కాదు, అది మీ ఆరోగ్యం పట్ల మీకు ఉన్న గౌరవానికి నిదర్శనం. ఆరోగ్యాన్ని తర్వాత చూసుకుందాం అనే మాటలకు ఇక స్వస్తి పలికి, నేటి నుంచే మీ మానసిక, శారీరక స్థితిపై శ్రద్ధ వహించండి. సమస్యను అంగీకరించడమే స్వస్థతకు మొదటి మెట్టు అని మర్చిపోవద్దు.