హెల్త్ కి మంచిదని డ్రై ఫ్రూట్ తినేస్తున్నారా? డైటీషియన్స్ చెప్పే షాకింగ్ సీక్రెట్స్
సాధారణంగా డ్రైఫ్రూట్స్ అనగానే మనందరికీ అవి 'ఆరోగ్యకరమైన చిరుతిండి' అనే భావన కలుగుతుంది. అయితే గుండె ఆరోగ్య విషయానికి వస్తే మాత్రం అన్ని రకాల డ్రై ఫ్రూట్స్ సమానమైన ఫలితాలను ఇవ్వవు. మనం ఎంచుకునే రకం, తినే పరిమాణం మరియు అవి తయారయ్యే విధానంపైనే మన గుండె ఆరోగ్యం ఆధారపడి ఉంటుంది.
డ్రైఫ్రూట్స్ మన గుండెకు నిజంగా మేలు చేయాలంటే వాటిని తీసుకునే పద్ధతిలో కొన్ని మార్పులు చేసుకోవాలని నిపుణులు సూచిస్తున్నారు ముఖ్యంగా గుండె సంబంధిత సమస్యలు ఉన్నవారు ఎటువంటి డ్రై ఫ్రూట్స్ ఎంచుకోవాలి? ఏవి దూరంగా ఉంచాలి? మీ గుండె పదిలంగా ఉండాలంటే మీరు రోజూ తినే స్నాక్స్లో ఈ మార్పులు తప్పనిసరి.
సరైన డ్రైఫ్రూట్స్ ఎంపిక
“అన్ని డ్రైఫ్రూట్స్ ఒకేలా ఉండవు” అంటున్నారు నిపుణులు. ముఖ్యంగా గుండె జబ్బులు ఉన్నవారు బాదం, వాల్నట్స్, పిస్తా పప్పులపై ఎక్కువ దృష్టి పెట్టాలని సూచించారు. వీటిలో గుండె పనితీరుకు మద్దతు ఇచ్చే ఆరోగ్యకరమైన కొవ్వులు, పీచు పదార్థం, యాంటీ ఆక్సిడెంట్లు పుష్కలంగా ఉంటాయి. ఈ పోషకాలు రక్తనాళాల ఆరోగ్యాన్ని మెరుగుపరచడమే కాకుండా శరీరంలో వాపులను తగ్గించడానికి తోడ్పడతాయి. గుండె సమస్యలతో బాధపడేవారు తమ రోజువారీ డైట్లో వీటిని భాగం చేసుకోవడం వల్ల దీర్ఘకాలిక ప్రయోజనాలు పొందుతారు.
కొలెస్ట్రాల్ నియంత్రణ
బాదం, వాల్నట్స్ వంటి వాటిలో ఉండే అన్సాచురేటెడ్ ఫ్యాట్స్ శరీరంలోని కొలెస్ట్రాల్ స్థాయిలను సమతుల్యం చేయడంలో కీలక పాత్ర పోషిస్తాయి. ఇవి చెడు కొలెస్ట్రాల్ను తగ్గించి మంచి కొలెస్ట్రాల్ను పెంచడానికి సహాయపడతాయి. అలాగే ఎండుద్రాక్ష, అత్తి పండ్లు వంటి సహజంగా ఎండబెట్టిన పండ్లను కూడా పరిమిత పరిమాణంలో తీసుకోవచ్చని డాక్టర్ షేక్ తెలిపారు. వీటిలో ఉండే మైక్రో న్యూట్రియంట్లు మరియు ఫైబర్ జీర్ణక్రియను మెరుగుపరచడంతో పాటు రక్తపోటును నియంత్రించడంలో తోడ్పడతాయి. అయితే వీటిని అతిగా తీసుకోకుండా జాగ్రత్త పడాలి.
తీసుకోవాల్సిన జాగ్రత్తలు
డ్రైఫ్రూట్స్ ఆరోగ్యకరమే అయినప్పటికీ, మార్కెట్లో దొరికే ఉప్పు కలిపిన లేదా చక్కెర పూత పూసిన డ్రై ఫ్రూట్స్కు దూరంగా ఉండాలి. అధిక ఉప్పు రక్తపోటును పెంచుతుంది, ఇది గుండెపై అదనపు ఒత్తిడిని కలిగిస్తుంది. అలాగే వీటిని ఎంత పరిమాణంలో తింటున్నామనేది కూడా ముఖ్యమే. ఒక గుప్పెడు కంటే ఎక్కువ కాకుండా మితంగా తీసుకోవడం వల్ల పూర్తి ప్రయోజనాలు అందుతాయి. సహజ సిద్ధమైన, ప్రాసెస్ చేయని ఎండు ఫలాలను ఎంచుకోవడం వల్ల మీ గుండెకు నిజమైన రక్షణ లభిస్తుంది.