Gold Jewellery: పాత నగలు ధగధగ మెరిసిపోవాలా.. ఈ సింపుల్‌ టిప్స్‌తో ఇంట్లోనే ట్రై చేయండిలా..

మీ పాత బంగారాన్ని మళ్లీ కొత్తదిగా మార్చడానికి ఈ కొన్నిఇంటి చిట్కాలు పాటిస్తే సరిపోతుంది. బంగారాన్ని రోజూ ధరిస్తే, దాని మెరుపు క్రమంగా తగ్గుతుంది. అదేవిధంగా ఇప్పుడు మీ అమ్మమ్మ బంగారు నగలను చూస్తే అవి చాలా పాతవిగా కనిపించడమే కాకుండా మెరుపు కూడా తగ్గిపోయి ఉంటుంది. అయితే, ఇక్కడ ఒక్క విషయం మాత్రం ప్రతి ఒక్కరూ తప్పనిసరిగా గుర్తించుకోవాలి… ఎందుకంటే.. బంగారం ఎంత పాతదైనా బంగారం మాత్రం బంగారమే. బంగారం ప్రతి ఒక్కరూ ఇష్టపడే విలువైన లోహం. మన దేశంలో మహిళలు బంగారాన్ని ఎక్కువగా ఇష్టపడతారు. కాబట్టి, బంగారాన్ని ఎలా దాచుకోవాలి. ఎలా మెరుగు పెట్టుకోవాలో నేర్చుకోవడం చాలా ముఖ్యం.

ఇంట్లోనే పాలిష్..

మనలో కొందరు పెళ్లిళ్లు, వేడుకల్లో బంగారాన్ని ధరించే ముందు వాటిని పాలిష్ చేసేందుకు స్వర్ణకారుల వద్దకు వెళుతుంటారు. స్వర్ణకారులు తమ నగలలోని బంగారాన్ని తీసివేస్తారేమోనన్న భయంతో కొందరు తమ నగలను దుకాణాల్లో క్లీన్ చేసుకోకుండా అలాగే వాడేస్తుంటారు. కాబట్టి, ఈ ప్రమాదాలన్నింటినీ నివారించడానికి ఇంట్లో మీ బంగారాన్ని పాలిష్ చేయడం మంచిది కాదా.? దీనికి మీ ఇంట్లో ఉన్న ఈ వస్తువులు చాలు. అయితే, ముందుగా బంగారు నగలు ఎందుకు నల్లగా మారుతాయో తెలుసుకోవటం ముఖ్యం. సాధారణంగా, బంగారు ఆభరణాలు శరీరం నుండి విడుదలయ్యే చెమట, ధూళితో తాకినప్పుడు అవి నల్లగా మారుతాయి. ఇదీ కాకుండా, మీ బంగారు ఆభరణాలు మెరుపును కోల్పోవడానికి మరొక కారణం మేకప్. అవును, మీరు ఉపయోగించే పెర్ఫ్యూమ్, మాయిశ్చరైజర్ లేదా సౌందర్య సాధనాలు బంగారు ఆభరణాలను చెడగొడతాయి. ఇది ప్రకాశాన్ని తగ్గిస్తుంది.

బేకింగ్ సోడాతో మెరుపు..

బేకింగ్ సోడాను సాధారణంగా వంటలో ఉపయోగిస్తారు. బేకింగ్ సోడా వంటల్లో మాత్రమే కాదు.. ఇతర వస్తువులను శుభ్రం చేయడానికి కూడా ఉపయోగించవచ్చు. బేకింగ్ సోడాతో నగలను శుభ్రం చేసుకోవచ్చు. ఇందుకోసం మీరు చేయాల్సిందల్లా 2 టేబుల్ స్పూన్ల బేకింగ్ సోడాను గోరువెచ్చని నీటిలో కరిగించి పేస్ట్ తయారు చేసి అందులో మీ నగలను అరగంట నానబెట్టండి. తర్వాత శుభ్రం చేయడానికి స్పాంజితో మెల్లగా రుద్దండి.

నిమ్మ రసం..

నిమ్మకాయ ఒక సహజమైన క్లీనింగ్ ఏజెంట్. మీరు మీ బంగారు ఆభరణాలను శుభ్రం చేయడానికి దీన్ని ఉపయోగించవచ్చు. దీని కోసం, ఒక గిన్నెలో సగం వరకు వేడి నీళ్లు పోసి.. సగం నిమ్మకాయను పిండుకోవాలి. ఇప్పుడు ఆభరణాలను 20 నుంచి 30 నిమిషాల పాటు అందులో ఉంచండి. ఇప్పుడు బ్రష్‌తో మెల్లగా శుభ్రం చేసి శుభ్రమైన నీటితో కడిగేసుకోవాలి.

టూత్ పేస్టు..

బంగారాన్ని శుభ్రం చేయడానికి టూత్‌పేస్ట్‌ను కూడా ఉపయోగించవచ్చు. టూత్ బ్రష్‌పై పేస్ట్‌ను అప్లై చేసి నగలపై రుద్దండి. ఇది ధూళిని తొలగించడంలో సహాయపడుతుంది. మీరు టూత్ బ్రష్‌కు బదులుగా మృదువైన వస్త్రాన్ని కూడా ఉపయోగించవచ్చు.

పసుపు బంగారు కాంతిని తిరిగి తెస్తుంది..

బంగారు ఆభరణాలను శుభ్రం చేయడానికి, ఒక గిన్నెలో వేడి నీటిని తీసుకోండి. ఇప్పుడు దానికి కొద్దిగా వాషింగ్ పౌడర్, చిటికెడు పసుపు వేసి ఆభరణాలను 30 నిమిషాల పాటు ఉంచండి. తర్వాత బయటకు తీసి టూత్ బ్రష్ తో తేలికగా స్క్రబ్ చేసి శుభ్రమైన నీటితో కడగాలి. బంగారం మళ్లీ కొత్తదానిలా మెరుస్తుంది.

మరిన్ని లైఫ్ స్టైల్ న్యూస్ కోసం ఇక్కడ లింక్ క్లిక్ చేయండి..