Video: వార్నీ ఇంత ఈజీనా.. గుడ్డు ఫ్రెష్గా ఉందా .. కుళ్లిపోయిందా.. 10 సెకన్లలో ఇలా కనిపెట్టండి..
గుడ్డు పైకి బాగానే కనిపిస్తుంది.. కానీ లోపల పాడైపోయిందో లేదో పగలగొట్టేదాకా ఎలా తెలుస్తుంది? అనుకుంటున్నారా.. అయితే ఇది మీ కోసమే.. వంటింట్లోనే కేవలం 10 సెకన్లలో గుడ్డు తాజాదనాన్ని పరీక్షించే సూపర్ ట్రిక్ ఒకటి ఉంది. ఒక చిన్న వాటర్ టెస్ట్తో గుడ్డు నాణ్యతను ఎలా గుర్తించవచ్చో FSSAI సైంటిఫిక్ ఆధారాలతో సహా వివరించింది.
ప్రోటీన్లు, విటమిన్లు పుష్కలంగా ఉండే గుడ్లను ప్రతిరోజూ ఆహారంలో భాగం చేసుకోవడం ఆరోగ్యానికి ఎంతో మేలు చేస్తుంది. అయితే పాడైపోయిన గుడ్లను తింటే మాత్రం తీవ్రమైన ఫుడ్ పాయిజనింగ్, కడుపునొప్పి, వాంతులు, జీర్ణ సమస్యలు తప్పవు. సాధారణంగా గుడ్డును పగలగొట్టిన తర్వాతే అది మంచిదా లేదా కుళ్లిపోయిందా అని చాలామంది గుర్తిస్తుంటారు. కానీ గుడ్డును పగలగొట్టకుండానే అది ఎంత తాజాగా ఉందో క్షణాల్లో కనిపెట్టే సులభమైన వాటర్ టెస్ట్ను భారత ఆహార భద్రతా ప్రమాణాల ప్రాధికార సంస్థ సూచించింది.
FSSAI తెలిపిన సింపుల్ వాటర్ టెస్ట్ ఎలా చేయాలి?
ఒక గాజు గ్లాసు లేదా వెడల్పాటి గిన్నెలో సాధారణ నీటిని నింపి, గుడ్డును మెల్లగా అందులో వేయాలి. నీటిలో గుడ్డు ఉండే స్థానాన్ని బట్టి దాని తాజాదనాన్ని సులభంగా అంచనా వేయవచ్చు.
అడుగున మునిగి చదునుగా పడుకుంటే: గుడ్డు పూర్తిగా నీటి అడుగు భాగంలో అడ్డంగా పడితే అది ఫ్రెష్గా ఉందని, తినడానికి పూర్తిగా సురక్షితమని అర్థం.
నిటారుగా నిలబడితే: గుడ్డు అడుగు భాగంలోనే ఉంటూ ఒకవైపు పైకి లేచి నిటారుగా నిలబడితే, అది పాతబడినట్లు అర్థం. ఇది తినడానికి పనికివచ్చినప్పటికీ, ఏమాత్రం ఆలస్యం చేయకుండా వెంటనే వాడుకోవడం మంచిది.
నీటిపై తేలియాడుతుంటే: గుడ్డు నీటి పైభాగంలో తేలితే అది పూర్తిగా పాడైపోయిందని స్పష్టం. అలాంటి గుడ్లను ఏమాత్రం తినకూడదు, వెంటనే పారేయాలి.
ఈ టెస్ట్ వెనుక ఉన్న సైన్స్ ఏమిటి?
గుడ్డు పెంకుపై మన కంటికి కనిపించని సూక్ష్మ రంధ్రాలు ఉంటాయి. రోజులు గడిచేకొద్దీ లోపల ఉండే తేమ ఆవిరైపోయి, ఆ రంధ్రాల ద్వారా బయటి గాలి లోపలికి చేరుతుంది. లోపల గాలి బుడగ పరిమాణం పెరిగేకొద్దీ గుడ్డు బరువు తగ్గి తేలికవుతుంది. అందుకే పాతబడిన లేదా కుళ్లిపోయిన గుడ్లు నీటిపై తేలుతాయి. తాజా గుడ్లలో గాలి తక్కువగా ఉండటం వల్ల బరువుగా ఉండి అడుగున మునిగిపోతాయి.
గుర్తుంచుకోవాల్సిన ఇతర జాగ్రత్తలు
కేవలం నీటి పరీక్ష మాత్రమే కాకుండా గుడ్డును వాడే ముందు దాని పెంకుపై పగుళ్లు, లీకేజీలు ఏమైనా ఉన్నాయా అనేది గమనించాలి. అలాగే గుడ్డు నుంచి దుర్వాసన వచ్చినా లేదా పగలగొట్టినప్పుడు రంగులో అసాధారణ మార్పులు కనిపించినా ఎట్టిపరిస్థితుల్లోనూ ఉపయోగించకూడదని FSSAI హెచ్చరిస్తోంది.
వీడియో చూడండి..
Not sure if an egg is still good to use? Try this simple water test:
Before consuming, also check for cracks, leakage, unusual smell, or discoloration after cracking the egg.
Don’t rely on rumours, #KnowTheFacts & make informed food choices#FSSAI #FSSAIMythBuster #EggStories pic.twitter.com/DRJH1wPw4H— FSSAI (@fssaiindia) August 29, 2026