పెళ్లి భోజనాల్లో వడ్డించే అసలైన వెజిటేబుల్ పులావ్ ఇదే.. ఈ సీక్రెట్ తెలిస్తే నిమిషాల్లోనే చేసుకోవచ్చు..
పెళ్లి భోజనాల్లో వడ్డించే వెజిటేబుల్ పులావ్ రుచి ప్రత్యేకంగా ఉంటుంది. అదే రుచిని ఇంట్లోనే సులభంగా తయారు చేసుకోవచ్చు. బాస్మతి బియ్యం, మిల్ మేకర్, తాజా కూరగాయలు, పుదీనా-అల్లం-వెల్లుల్లి మసాలా పేస్ట్తో తయారయ్యే ఈ పులావ్ పొడిపొడిలాడుతూ అద్భుతమైన రుచిని అందిస్తుంది. కూర్మా, చికెన్ లేదా మటన్ కర్రీతో కలిపి తింటే మరింత రుచిగా ఉంటుంది.
పెళ్లి భోజనాల్లో వడ్డించే రుచికరమైన వెజిటేబుల్ పులావ్ అంటే చాలా మందికి ఇష్టం.. అలాంటి పులావ్ను ఇంట్లోనే, రెస్టారెంట్ స్టైల్లో, పొడిపొడిలాడుతూ, ఖచ్చితమైన రుచితో ఎలా తయారు చేయాలో ఈ కథనంలో తెలుసుకోండి. దీన్ని వెజ్, నాన్ వెజ్ ప్రియులు ఇష్టంగా తినొచ్చు.. ఇది కుర్మా.. అలాగే చికెన్, మటన్ కర్రీలో అద్భుతంగా ఉంటుంది.. ఈ రెసిపీ ప్రతి ప్రత్యేక సందర్భానికీ అనువైనది.. వీకెండ్స్ లో పులావ్ ను సులువుగా నిమిషాల్లోనే చేసుకోవచ్చు.. అదేలెగా తెలుసుకుందాం..
పులవ్ తయారికీ కావాల్సిన ముఖ్యమైన పదార్థాలు:
- బాస్మతి బియ్యం: 1 గ్లాసు (సుమారు 200 గ్రాములు) కావాలంటే ఇంకొంచెం పరిమాణం తీసుకోవచ్చు.. దీనికి అనుగుణంగా మార్పులు చేసుకోవాల్సి ఉంటుంది.
- మిల్ మేకర్: 1/4 కప్పు
- పచ్చిమిర్చి: 4-6
- పుదీనా: 2 టేబుల్ స్పూన్లు
- వెల్లుల్లి: 2 టేబుల్ స్పూన్లు (పొట్టు తీసినవి)
- అల్లం: 1 టేబుల్ స్పూన్ (చిన్న ముక్కలు)
- టమాటా: 1 (మీడియం సైజు, చిన్న ముక్కలు)
- నూనె: 3 టేబుల్ స్పూన్లు
- నెయ్యి: 1 టేబుల్ స్పూన్
- జీలకర్ర: 1 టీ స్పూన్
- హోల్ గరం మసాలా (దాల్చిన చెక్క, లవంగాలు, యాలక్కాయలు, అనాస పువ్వు)
- జీడిపప్పు పలుకులు: 2 టేబుల్ స్పూన్లు
- ఉల్లి తరుగు: 1/3 కప్పు (సన్నగా తరిగినవి)
- కరివేపాకు: కొద్దిగా
- క్యారెట్ ముక్కలు: 1/4 కప్పు (సన్నగా తరిగినవి)
- బీన్స్ ముక్కలు: 1/4 కప్పు (మీడియం సైజు)
- బంగాళాదుంప ముక్కలు: 1/3 కప్పు (మీడియం సైజు)
- పచ్చి బఠాణీ: 1/4 కప్పు (ఫ్రోజెన్ లేదా ఫ్రెష్)
- ధనియాల పొడి: 1 టీ స్పూన్
- నీళ్లు: 1 3/4 గ్లాసులు (ఒక గ్లాసు బియ్యానికి, పాన్ కోసం), 1 1/2 గ్లాసులు (కుక్కర్ కోసం)
- షాజీరా: కొద్దిగా
- బిర్యానీ ఆకు: 1
- కొత్తిమీర: 2 టేబుల్ స్పూన్లు (సన్నగా తరిగినవి)
- ఉప్పు: రుచికి సరిపడా
తయారీ విధానం:
బియ్యం – మిల్ మేకర్ సిద్ధం చేయడం:
బాస్మతి బియ్యాన్ని రెండుసార్లు శుభ్రంగా కడిగి, అరగంట పాటు నీళ్లలో నానబెట్టండి.
మరో గిన్నెలో అర లీటరు నీళ్లు తీసుకుని మరగనివ్వాలి. నీళ్లు మరుగుతున్నప్పుడు పావు కప్పు మిల్ మేకర్ వేసి ఒక పొంగు వచ్చేవరకు ఉడికించి స్టవ్ ఆపేయండి. ఆ తర్వాత మిల్ మేకర్లో చల్లని నీళ్లు లేదా ఐస్ క్యూబ్స్ వేసి, చల్లారాక గట్టిగా పిండి నీరంతా తీసి పక్కన పెట్టుకోండి. మిల్ మేకర్ పులావ్కు మంచి రుచిని ఇస్తుంది.
మసాలా పేస్ట్ తయారీ:
ఒక మిక్సీ జార్లో పచ్చిమిర్చి (4-6), పుదీనా (2 టేబుల్ స్పూన్లు), పొట్టు తీసిన వెల్లుల్లి (2 టేబుల్ స్పూన్లు), చిన్న ముక్కలుగా కట్ చేసిన అల్లం (1 టేబుల్ స్పూన్), మీడియం సైజు టమాటా ముక్కలు వేసి, కొద్దిగా కోర్స్గా (వీడియోలో చూపిన విధంగా) గ్రైండ్ చేసి పక్కన పెట్టుకోండి.
పులావ్ వండటం:
స్టవ్ మీద కడాయి పెట్టి, మూడు టేబుల్ స్పూన్ల నూనె, ఒక టేబుల్ స్పూన్ నెయ్యి వేయండి. నెయ్యి కరిగిన తర్వాత ఒక టీ స్పూన్ జీలకర్ర, దాల్చిన చెక్క, లవంగాలు, యాలక్కాయలు, అనాస పువ్వు వంటి హోల్ గరం మసాలా వేసి కొద్దిగా వేయించండి.
రెండు టేబుల్ స్పూన్ల జీడిపప్పు పలుకులు వేసి వేయించిన తర్వాత, 1/3 కప్పు సన్నగా తరిగిన ఉల్లిపాయలు, కొద్దిగా కరివేపాకు వేసి, ఉల్లిపాయలు లేత గోల్డెన్ రంగు వచ్చేవరకు వేయించాలి.
ఇప్పుడు 1/4 కప్పు క్యారెట్ ముక్కలు, 1/4 కప్పు బీన్స్ ముక్కలు, 1/3 కప్పు బంగాళాదుంప ముక్కలు వేసి కొద్దిగా వేయించండి. కూరగాయలు త్వరగా మగ్గడానికి చిటికెడు ఉప్పు చల్లి, మూత పెట్టి మగ్గనివ్వండి.
ఎసరు సిద్ధం చేయడం: మరో బర్నర్పై ఒక గిన్నెలో ఎసరు కోసం నీళ్లు మరిగించండి. ఒక గ్లాసు బాస్మతి బియ్యానికి 1 3/4 గ్లాసుల నీళ్లు పడతాయి (పాన్లో వండితే). కుక్కర్లో వండితే 1 1/2 గ్లాసుల నీళ్లు సరిపోతాయి. నీళ్లలో కొద్దిగా షాజీరా, ఒక బిర్యానీ ఆకు, రెండు టేబుల్ స్పూన్ల సన్నగా తరిగిన కొత్తిమీర వేసి మూత పెట్టి తక్కువ నుండి మీడియం మంటపై మరగనివ్వండి.
పులావ్ పూర్తి చేయడం:
కూరగాయలు మగ్గిన తర్వాత, 1/4 కప్పు పచ్చి బఠాణీ (ఫ్రోజెన్ అయితే ఇప్పుడు, ఫ్రెష్ అయితే ఇతర కూరగాయలతో పాటు), ముందుగా సిద్ధం చేసుకున్న మిల్ మేకర్ వేసి రెండు మూడు నిమిషాలు మీడియం మంటపై కుక్ చేయండి.
తరువాత గ్రైండ్ చేసుకున్న పచ్చిమిర్చి పేస్ట్ వేసి పచ్చి వాసన పోయేంత వరకు మీడియం మంటపై వేయించండి.
ఇప్పుడు ఒక టీ స్పూన్ ధనియాల పొడి వేసి ఒకసారి కలిపి, నానబెట్టుకున్న బాస్మతి బియ్యాన్ని వేసి అన్నింటినీ బాగా కలపండి.
మరిగిస్తున్న ఎసరు నీళ్లను వేడిగా ఉన్నప్పుడే పులావ్లో పోయండి. రైస్ మొత్తాన్ని ఒకసారి కలిపి, రుచి చూసి ఉప్పు సరిచేసుకోండి.
మూతను గట్టిగా పెట్టి, తక్కువ మంటపై అడుగున నీరంతా ఇగిరిపోయేంత వరకు నిదానంగా ఉడికించండి.
పర్ఫెక్ట్ టెక్చర్ కోసం చివరిగా:
పులావ్ ఉడికిన తర్వాత స్టవ్ ఆపి, కడాయిని పక్కకు దించుకోండి. ఇప్పుడు అన్నం మీద రెండు పొరల టిష్యూ పేపర్ను పెట్టి, దానిపై కొద్దిగా నీళ్లు చల్లి, మూతను గట్టిగా ఉంచండి. పది నిమిషాల పాటు అలాగే ఉంచి, ఆ తర్వాత సర్వ్ చేసుకోవచ్చు. ఈ పద్ధతి వల్ల అన్నం పొడిపొడిలాడుతూ, పైన ఉండే అన్నం కూడా డ్రై అవ్వకుండా, రెస్టారెంట్లలో వడ్డించే పులావ్ లాగా పర్ఫెక్ట్గా వస్తుంది.
ఈ పద్ధతిని అనుసరిస్తే, మీరు ఇంట్లోనే పెళ్లి భోజనాల్లో వడ్డించే అసలైన వెజిటేబుల్ పులావ్ రుచిని ఆస్వాదించవచ్చు. దీని రుచి, నిలకడ ఖచ్చితంగా మిమ్మల్ని ఆకట్టుకుంటాయి.
మరిన్ని లైఫ్స్టైల్ వార్తల కోసం ఇక్కడ క్లిక్ చేయండి..