Anant Ambani: ఇది టైమ్ చూసే వాచ్ కాదు.. అనంత్ అంబానీ గడియారం ప్రత్యేకతలేంటో తెలుసా?
ప్రపంచంలోనే ఖరీదైన వాచీల సేకరణలో రిలయన్స్ వారసుడు అనంత్ అంబానీకి సాటి ఎవరూ లేరు. తన వివాహం సందర్భంగా స్నేహితులకు కోట్ల విలువైన వాచీలను బహుమతిగా ఇచ్చిన అనంత్ కోసం, ఇప్పుడు ప్రముఖ అమెరికన్ బ్రాండ్ 'జాకబ్ అండ్ కో' ఒక అరుదైన గడియారాన్ని రూపొందించింది. అనంత్ అంబానీ ప్రతిష్టాత్మకంగా చేపట్టిన 'వంటారా' (వన్యప్రాణి సంరక్షణ కేంద్రం) గౌరవార్థం ఈ 'ఒపెరా వంటారా గ్రీన్ కామో' వాచ్ను డిజైన్ చేశారు. దీని విలువ సుమారు 1.5 మిలియన్ డాలర్లు (దాదాపు రూ. 13.7 కోట్లు) అని అంచనా.
ఈ గడియారం కేవలం సమయాన్ని చూపడమే కాదు, ప్రకృతిపై అనంత్కు ఉన్న ప్రేమను కూడా చాటిచెబుతుంది. దీని డయల్ మధ్యలో అనంత్ అంబానీకి చెందిన ఒక చిన్న హ్యాండ్-పెయింటెడ్ బొమ్మ ఉంటుంది. దాని చుట్టూ సింహం బెంగాల్ పులి బొమ్మలు కొలువుదీరి ‘వంటారా’ లక్ష్యాన్ని గుర్తుచేస్తాయి. 400కి పైగా విలువైన రత్నాలతో అడవిని తలపించేలా గ్రీన్ కామఫ్లేజ్ డిజైన్ చేయడం ఈ వాచ్లోని ప్రధాన ఆకర్షణ. ఇది వాచ్ కంటే కూడా ఒక ‘వేరబుల్ ఆర్ట్’ (ధరించగలిగే కళాఖండం) అని నెటిజన్లు ప్రశంసిస్తున్నారు.
వాచ్ ప్రత్యేకతలు ఇవే:
రత్నాల హారం: ఈ వాచ్ తయారీలో మొత్తం 397 రత్నాలను (21.98 క్యారెట్లు) ఉపయోగించారు. ఇందులో అరుదైన డిమాంటోయిడ్ గార్నెట్స్, త్సావోరైట్స్, గ్రీన్ సఫైర్స్ మరియు డైమండ్స్ ఉన్నాయి.
మెకానికల్ వండర్: ఇందులో మూడు అక్షాల (Triple-axis) టూర్బిలాన్ మెకానిజం ఉంటుంది. వాచ్లోని మ్యూజిక్ బాక్స్ ప్లే అయినప్పుడు, డయల్ లోపల ఉన్న అనంత్, సింహం పులి బొమ్మలు గాలిలో తిరుగుతూ కనిపిస్తాయి.
వంటారా లోగో: వాచ్ పైన ఏనుగు తలతో కూడిన ‘వంటారా’ లోగోను బంగారం రంగులో ముద్రించారు.
సెలిబ్రిటీ బ్రాండ్: జాకబ్ అండ్ కో బ్రాండ్ అంటే క్రిస్టియానో రొనాల్డో, లియోనెల్ మెస్సీ వంటి దిగ్గజాలకు ఫేవరెట్. గతంలో ఇదే బ్రాండ్ అనంత్ కోసం ‘రామ్ జన్మభూమి’ ఎడిషన్ వాచ్ను కూడా తయారు చేసింది.
నెటిజన్ల కామెంట్స్:
ఈ వాచ్ ధర డిజైన్ చూసి సోషల్ మీడియాలో రకరకాల స్పందనలు వస్తున్నాయి. “ఇందులో అన్నీ కనిపిస్తున్నాయి కానీ సమయం ఎక్కడ ఉందో వెతకాలి” అని కొందరు సరదాగా వ్యాఖ్యానించగా, “జంతు ప్రేమికులకు ఇది గొప్ప నివాళి” అని మరికొందరు కొనియాడుతున్నారు.