అత్యాధునిక బైక్ పై చీఫ్ జస్టిస్ ఎస్.ఎ. బాబ్డే…వాహ్ !

భారత ప్రధాన న్యాయమూర్తి ఎస్.ఎ. బాబ్డేకి మోడరన్ బైక్ లంటే చాలా క్రేజ్ అన్న విషయం వెల్లడయింది. అత్యాధునిక హార్లే డేవిడ్ సన్ సూపర్ బైక్ పై ఆయన కూర్చున్న ఫోటోలు సామాజిక మాధ్యమాల్లో వైరల్ అవుతున్నాయి. తనకు ఓ బుల్లెట్ వాహనం ఉందని ఆయన  గతంలో తెలిపారు. తానుంటున్న నాగపూర్ లోని ఇంటివద్ద బాబ్డే ఇలా ఈ బైక్ మీద కూర్చుని అందరికీ ఆసక్తిని రేకెత్తించారు. ఈ ఫోటోలు బాగానే ఉన్నా.. ఆయన  ఫేస్ మాస్క్ ధరించలేదని అప్పుడే నెటిజన్లు కస్సుమంటున్నారు. ఈ కరోనా కాలంలో ఇలా వితౌట్ మాస్క్ తో కనిపించవచ్చా అని ప్రశ్నిస్తున్నారు. ‘ది గార్డియన్ ఆఫ్ లా.. ఆర్.. లా బ్రేకర్ ? నో మాస్క్.. నో హెల్మెట్..’ (చట్ట పరిరక్షకుడా లేక చట్ట ఉల్లంఘనులా ? మాస్క్ లేదు.. హెల్మెట్ లేదు) అని కొందరు పెదవి విరిచారు. తనకు బైక్ లంటే చాలా ఇష్టమని, ఒకసారి యాక్సిడెంట్ అయిన కారణంగా కొన్ని రోజులు కోర్టుకు దూరంగా ఉండాల్సి వచ్చిందని జస్టిస్ బాబ్డే లోగడ ఓ సందర్భంలో తెలిపారు. ఈ కరోనా ఎపిడమిక్ కాలంలో జడ్జీలు నల్లకోట్లు ధరించే బదులు.. నెక్ బ్యాండ్ తో ప్లెయిన్ వైట్ షర్టులు ధరించాలని ఆయన ఇటీవల సూచించారు.