భూమ్మీద నమోదైన అత్యధిక రికార్డు ఉష్ణోగ్రత

గ్రీష్మంలో బిక్కచచ్చిపోతుంటాం! మండు వేసవిలో 45 డిగ్రీల ఉష్ణోగ్రతకే ఉక్కిరిబిక్కిరి అవుతుంటాం! ఇక 50 డిగ్రీలు దాటిందంటే చచ్చి ఊరుకుంటాం! అసలు ఈ భూమ్మీద 50 డిగ్రీలకు మించిన ఉష్ణోగ్రత ఎక్కడైనా ఉందా? అంటే ఉంది..! అమెరికాలోని కాలిఫోర్నియా- నెవాడా మధ్య ప్రాంతంలో ఏటా 50 డిగ్రీల సెంటిగ్రేడ్‌కు మించే ఉష్టోగ్రతలు నమోదవుతాయి.. ఇక ఇప్పుడేమో ఏకంగా రికార్డును బద్దలు కొట్టేసిందా ప్రాంతం! మొన్న భానువారం రోజున భానుడు భగభగమన్నాడక్కడ! అందుకే 54.4 డిగ్రీల ఉష్ణోగ్రత నమోదయ్యింది.. భూమ్మీద ఇదే అత్యధిక ఉష్ణోగ్రత అంటున్నారు వాతావరణ శాస్త్రవేత్తలు..
అసలు ఆ ప్రాంతం పేరే మృత్యులోయ! ఇంగ్లీషులో చెప్పాలంటే డెత్‌ వ్యాలీ.. భరించలేనంత వేడి… చుర్రుమనిపించే ఎండ అక్కడ ఉంటుంది.. మనుషులు నివాసం ఉండే చోటు కాదిది.. అంత దుర్భరపరిస్థితులు ఉంటాయిక్కడ. అమెరికాలోని బంగారు నిక్షేపాలను వెతికే పనిలో చాలా మంది ఈ లోయ నుంచే వెళ్లారు.. అలా వచ్చినవారిలో చాలా మంది ఇక్కడి వేడి తట్టుకోలేక చచ్చిపోయారు.. అందుకే దీనిని మృత్యులోయ అనేది! సుమారు వందేళ్ల కిందట… సరిగ్గా చెప్పాలంటే 1913, జులై 10న ఇక్కడ 56.7 డిగ్రీల సెల్సియస్‌ ఉష్టోగ్రత నమోదయ్యిందట! కాకపోతే దీన్ని నమ్మేవారు చాలా తక్కువ.. ఎందుకంటే ఆ రోజుల్లో ఉష్ణోగ్రతలను కొలిచేందుకు అధునాతనమైన పరికరాలు లేవు.. అలాగే 1931లో ట్యునీషియాలో కూడా 55 డిగ్రీల ఉష్ణోగ్రత నమోదయ్యింది. 1922లో సహారా ఎడారిలో నమోదైన 58 డిగ్రీల ఉష్ణోగ్రతను కూడా తూచ్‌ అని కొట్టిపారేశారు.. ఇప్పుడు నమోదైన 54.4 డిగ్రీల ఉష్ణోగ్రతే రికార్డని రికార్డేసి మరీ చెబుతున్నారు శాస్త్రవేత్తలు.. అంచేత మనం కూడా నమ్మి తీరాలి.