Online Harassment: ఆన్‌లైన్‌లో అవమానం.. అణుక్షణం వెంటాడే గాయం.. దీని నుంచి బయపడేదెలా?
స్మార్ట్‌ఫోన్, సోషల్ మీడియా అరచేతిలోకి వచ్చాక సమాచార మార్పిడి ఎంత వేగవంతమైందో, అంతే వేగంగా నేరాలు కూడా పెరుగుతున్నాయి. సరదా పేరిట చేసే పోస్టులు, మార్ఫింగ్ ఫొటోలు, అసభ్యకరమైన కామెంట్లు, బ్లాక్‌మెయిలింగ్‌లు సామాన్యుల నుంచి విద్యార్థులు, ఉద్యోగుల వరకు ఎందరినో మానసిక వేదనకు గురిచేస్తున్నాయి. పరువు పోతుందనే భయంతో కొందరు మౌనంగా కుమిలిపోతుంటే, మరికొందరు ప్రాణాల మీదకు తెచ్చుకుంటున్నారు. అసలు ఈ సైబర్ వేధింపుల తీవ్రత ఏ స్థాయిలో ఉంది? బాధితులు ఎలాంటి న్యాయపరమైన రక్షణ పొందవచ్చు? ఎదురైన సమస్యను ధైర్యంగా ఎలా ఎదుర్కోవాలో చూద్దాం.
ఫోన్‌ చేతిలోకి వచ్చాక ప్రపంచం అరచేతిలోకి వచ్చింది. క్షణాల్లో సమాచారాన్ని పంచుకోవచ్చు. దూరంగా ఉన్నవారితో మాట్లాడొచ్చు. అయితే ఇదే సోషల్ మీడియా కొందరి జీవితాల్లో చీకట్లు నింపుతోంది. ట్రోలింగ్‌, మార్ఫింగ్ చిత్రాలు, అసభ్య వ్యాఖ్యలు, బెదిరింపులు వారి ప్రశాంతతను దెబ్బతీస్తున్నాయి. ఒకరికి సరదాగా అనిపించిన పోస్టు.. మరొకరి జీవితంలో చెరగని మచ్చగా మిగులుతోంది.
ఒకరోజు హఠాత్తుగా ఫోన్‌ కాల్స్‌ రావడం మొదలైంది. అవతలి వ్యక్తులు మాట్లాడుతున్న మాటలు విని ఆ యువతికి ఏం జరుగుతుందో అర్థం కాలేదు. తన ఫొటోలను మార్ఫింగ్ చేసి ప్రచారం చేస్తున్నారని తెలిసి భయపడిపోయింది. ఎవరు ఈ పని చేశారు, ఇంకా ఎక్కడెక్కడ వాటిని పంచుకున్నారో తెలియక ఆందోళనకు గురైంది. ఏ పనిపైనా మనసు పెట్టలేకపోయింది. చదువుపై శ్రద్ధ తగ్గింది. ఫోన్‌ మోగినా భయపడే పరిస్థితి ఏర్పడింది.
కూతురిలో వచ్చిన మార్పును గమనించిన తల్లిదండ్రులు ఆరా తీయడంతో అసలు విషయం బయటపడింది. కుటుంబ సభ్యులు ధైర్యం చెప్పి పోలీసులను ఆశ్రయించారు. ఇలాంటి పరిస్థితులు ఒక్క యువతికే పరిమితం కావడం లేదు. విద్యార్థుల నుంచి ఉద్యోగుల వరకు, సామాన్యుల నుంచి ప్రముఖుల వరకు అనేకమంది డిజిటల్‌ వేధింపులను ఎదుర్కొంటున్నారు. కొందరు ఫిర్యాదు చేస్తుంటే, మరికొందరు పరువు పోతుందనే భయంతో మౌనంగా బాధపడుతున్నారు.
ఫొటోలతో బెదిరింపులు, వ్యక్తిగత జీవితంపై దాడి
సోషల్ మీడియాలో పరిచయం పెంచుకుని, నమ్మకం సంపాదించిన తర్వాత వ్యక్తిగత చిత్రాలతో బెదిరించే ఘటనలు వెలుగులోకి వస్తున్నాయి. కొందరు మార్ఫింగ్ ఫొటోలను ప్రచారం చేస్తామని హెచ్చరిస్తున్నారు. మరికొందరు డబ్బులు ఇవ్వకపోతే వ్యక్తిగత సమాచారాన్ని బయటపెడతామని బెదిరిస్తున్నారు. హైదరాబాద్‌లోనూ మహిళలు, యువతులు ఇలాంటి వేధింపులపై పోలీసులకు ఫిర్యాదు చేశారు. ఒక యువతి తన ఫొటోలు, వీడియోలను అసభ్యంగా మార్చి ప్రచారం చేయడంతోపాటు, అత్యాచారం చేస్తామని బెదిరింపులు వచ్చినట్లు ఫిర్యాదు చేసింది. ఈ ఘటనపై పోలీసులు కేసు నమోదు చేశారు.
పిల్లలపైనా పెరుగుతున్న ప్రభావం
పాఠశాలల్లో మొదలయ్యే చిన్న గొడవలు కూడా ఇప్పుడు సోషల్ మీడియాకు చేరుతున్నాయి. తోటి విద్యార్థుల ఫొటోలను మార్చి ప్రచారం చేయడం, శరీరాకృతిపై మీమ్స్‌ తయారు చేసి ఎగతాళి చేయడం వంటి చర్యలు పిల్లలను తీవ్రంగా ఇబ్బంది పెడుతున్నాయి. హైదరాబాద్‌లో విద్యార్థినులను లక్ష్యంగా చేసుకుని జరిగిన ఆన్‌లైన్‌ వేధింపుల గురించి వైద్యులు ప్రస్తావించారు. ఇలాంటి అనుభవాలు కొందరిలో భయం, ఆందోళన, ఒంటరితనానికి దారితీస్తున్నాయని తెలిపారు.
పాఠశాలలో ఎదురైన అవమానం ఇంటికి వచ్చిన తర్వాత కూడా ఫోన్‌ ద్వారా వెంటాడుతోంది. అందుకే “నోరు మంచిదైతే ఊరు మంచిదవుతుంది” అనే సామెతను సోషల్ మీడియా వాడకానికీ వర్తింపజేయాలి. రాసే మాట ఎదుటివారిని ఎంతగా బాధపెడుతుందో ఆలోచించాలి. ఒకసారి ఫొటో లేదా వీడియో అనేక ఖాతాలకు చేరితే, దాన్ని పూర్తిగా తొలగించడం కష్టమవుతుంది.
దేశంలో లక్షకుపైగా సైబర్ క్రైమ్‌ కేసులు
NCRB గణాంకాల ప్రకారం, 2024లో దేశవ్యాప్తంగా 1,01,928 సైబర్ క్రైమ్‌ కేసులు నమోదయ్యాయి. తెలంగాణలో 27,230, ఆంధ్రప్రదేశ్‌లో 2,528 కేసులు నమోదయ్యాయి. ఈ సంఖ్యల్లో ఆర్థిక మోసాలు సహా వివిధ రకాల నేరాలు ఉన్నాయి. కాబట్టి వీటన్నింటినీ ఆన్‌లైన్‌ వేధింపులుగా పరిగణించకూడదు. ట్రోలింగ్‌, మార్ఫింగ్, సైబర్‌స్టాకింగ్‌, వ్యక్తిగత చిత్రాలతో బెదిరింపులపై నమోదైన కేసులను విడిగా పరిశీలిస్తేనే సమస్య తీవ్రత తెలుస్తుంది.
ఆంధ్రప్రదేశ్‌లో సోషల్ మీడియా దుర్వినియోగంపై చర్యలు తీసుకున్నట్లు 2026 ఏప్రిల్‌లో డీజీపీ వెల్లడించారు. అభ్యంతరకర పోస్టులు, తప్పుడు ప్రచారం వంటి ఉల్లంఘనలపై 1,549 కేసులు నమోదు చేసి, 1,344 మందికి పైగా అరెస్టు చేసినట్లు తెలిపారు. అయితే ఈ లెక్కలన్నీ వ్యక్తిగత వేధింపులు, మార్ఫింగ్ ఘటనలకు సంబంధించినవి కావు. తెలంగాణతోపాటు దేశవ్యాప్తంగా 2026లో ఇప్పటివరకు ఆన్‌లైన్‌ వేధింపుల కేసులు, అరెస్టుల పూర్తి వివరాలు ఒకే కేటగిరీలో అందుబాటులో లేవు.
కనిపించని మానసిక గాయాలు
ఆన్‌లైన్‌లో అవమానానికి గురైనవారు బయటకు మామూలుగానే కనిపించినా లోపల తీవ్రంగా కుమిలిపోవచ్చు. తమ చిత్రాలు మళ్లీ ప్రచారంలోకి వస్తాయనే భయం, కుటుంబ సభ్యులకు తెలిస్తే ఏమవుతుందనే ఆందోళన వారిని వెంటాడవచ్చు. కొందరిలో నిద్రలేమి, నిరాశ వంటి లక్షణాలు కనిపించవచ్చు. చదువు, ఉద్యోగం, కుటుంబ సంబంధాలపైనా ప్రభావం పడవచ్చు. అవసరమైనప్పుడు మానసిక వైద్యుల సహాయం తీసుకోవడం ముఖ్యం.
కంచె చేను మేస్తే.. కాపాడేదెవరు” అన్న తీరులో వేధింపులు జరుగుతున్న వేదికలే బాధితులకు రక్షణ కల్పించాల్సిన బాధ్యతను విస్మరించకూడదు. అభ్యంతరకర కంటెంట్‌పై ఫిర్యాదు చేసినప్పుడు ఎంత వేగంగా స్పందిస్తున్నారు, చిత్రాలను తొలగించేందుకు ఎంత సమయం పడుతోంది, నిందితులను గుర్తించడంలో ఎలాంటి జాప్యం జరుగుతోంది అనే అంశాలపై స్పష్టత రావాలి. కేసుల నమోదు దగ్గరే చర్యలు ఆగిపోకుండా దర్యాప్తు, ఛార్జ్‌షీట్లు, శిక్షల వివరాలనూ ప్రజలకు అందుబాటులో ఉంచాలి.
ఫిర్యాదుతోనే న్యాయానికి తొలి అడుగు
మార్ఫింగ్ చిత్రాలు, బెదిరింపులు లేదా నకిలీ ఖాతాల ద్వారా వేధింపులు ఎదురైతే స్క్రీన్‌షాట్లు, పోస్టుల లింకులు, సందేశాలను ఆధారాలుగా భద్రపరచాలి. కేంద్ర సైబర్ క్రైమ్‌ పోర్టల్‌ cybercrime.gov.inలో ఫిర్యాదు చేయవచ్చు. ఆర్థిక సైబర్ మోసం జరిగితే వెంటనే 1930కు కాల్‌ చేయాలి. భయంతో ఒంటరిగా బాధపడకుండా కుటుంబ సభ్యులు, నమ్మకమైన వ్యక్తులు లేదా పోలీసుల సహాయం తీసుకోవాలి.
సోషల్ మీడియా సమాచారాన్ని పంచుకోవడానికి, మనుషుల్ని కలపడానికి ఉపయోగపడాలి. ఇతరుల పరువు తీయడానికి, బెదిరించడానికి, వ్యక్తిగత జీవితాన్ని బజారుకీడ్చడానికి కాదు. ఒకరి చిత్రాన్ని అనుమతి లేకుండా మార్చి ప్రచారం చేయడం, వ్యక్తిగత సమాచారాన్ని బయటపెట్టడం, బెదిరింపులకు దిగడం సరదా వ్యవహారం కాదు. పరిస్థితిని బట్టి ఇవి చట్టపరమైన చర్యలకు దారితీసే నేరాలు కావచ్చు.
వైరల్‌ చేసినవారికి కొద్దిసేపు వినోదం దొరకొచ్చు. కానీ దాని ప్రభావాన్ని ఎదుర్కొనే బాధితులు నెలల తరబడి ఇబ్బందిపడవచ్చు. డిజిటల్‌ వేధింపులను అడ్డుకోవాలంటే బాధితులు ధైర్యంగా ఫిర్యాదు చేయడం, పోలీసులు వేగంగా స్పందించడం, సోషల్ మీడియా సంస్థలు అభ్యంతరకర కంటెంట్‌పై తక్షణ చర్యలు తీసుకోవడం అవసరం. నిందితులకు శిక్షలు పడేలా చూడటంతోపాటు బాధితులకు అండగా నిలిచినప్పుడే ఈ సమస్యను అదుపు చేయగలం.
మరిన్ని హ్యూమన్ ఇంట్రెస్ట్ వార్తల కోసం ఇక్కడ క్లిక్ చేయండి.