రాత్రి పూట సరిగ్గా నిద్ర పట్టడం లేదా..? కారణాలు ఇవే కావొచ్చు..
మంచి ఆరోగ్యానికి నాణ్యమైన నిద్ర ఎంతో అవసరం. ఉదయం లేచిన తర్వాత శరీరం హుషారుగా, తేలికగా అనిపిస్తేనే అది మంచి నిద్రకు సంకేతం. అయితే గ్యాడ్జెట్ల అధిక వినియోగం, మానసిక ఒత్తిడి, కెఫిన్ అధికంగా తీసుకోవడం, అసమయ భోజనం వంటి కారణాలు నిద్రలేమికి దారితీస్తాయి.
మంచి నిద్ర ఆరోగ్యాన్ని కాపాడుతుంది. ఉదయం హుషారుగా, తేలికగా, శక్తివంతంగా అనిపించడం మంచి నిద్రకు సంకేతం.. అందుకే.. ఆరోగ్యకరమైన జీవనశైలికి మంచి నిద్ర అత్యవసరం. నిద్రలేమి, లేదా ఇన్సోమ్నియా, అనేక శారీరక, మానసిక సమస్యలకు దారితీస్తుంది. మంచి నిద్ర అంటే కేవలం పడుకోవడం మాత్రమే కాదు, ఉదయం లేచిన తర్వాత శరీరం రిఫ్రెషింగ్గా, హుషారుగా, తేలికగా, శక్తివంతంగా అనిపించడం. ఉదయం కూడా అలసటగా, డల్గా, మళ్లీ పడుకోవాలనిపిస్తే, అది మంచి నిద్ర పట్టలేదని అర్థం. రాత్రి 10 గంటల నుండి ఉదయం 5 గంటల వరకు నిద్రకు అనువైన సమయం, కానీ మన జీవనశైలి అలవాట్లు తరచుగా ఈ కాలాన్ని దెబ్బతీస్తాయని ఆరోగ్య నిపుణులు పేర్కొంటున్నారు.
నిద్రలేమికి సాధారణ కారణాలు:
గ్యాడ్జెట్ల వాడకం: పడుకోవడానికి కనీసం ఒక గంట ముందు సెల్ఫోన్లు, కంప్యూటర్లు వంటి ఎలక్ట్రానిక్ పరికరాలను దూరం పెట్టాలి. వీటి నుండి వెలువడే కాంతి మెదడును చురుకుగా ఉంచుతుంది.
గది ఉష్ణోగ్రత: నిద్రపోయే గది ఉష్ణోగ్రత 22 నుండి 24 డిగ్రీల సెల్సియస్ మధ్య ఉండాలి.
ఆహార అలవాట్లు: రాత్రిపూట మరీ భారీగా లేదా మరీ తక్కువగా ఆహారం తీసుకోవడం సరికాదు. రాత్రిపూట ఎక్కువ నీరు తాగడం కూడా యూరినేషన్కు తరచుగా లేవాల్సి రావడంతో నిద్రకు భంగం కలిగిస్తుంది.
అలారం అలవాట్లు: అలారం స్నూజ్ బటన్ను పదే పదే నొక్కడం వల్ల శరీరం మరింత అలసటగా, డల్గా మారుతుంది.
నిద్రపోయే భంగిమ: పడుకునేటప్పుడు సరైన భంగిమను పాటించాలి. తలగడపై రోజ్ ఆయిల్ వంటి సుగంధ నూనెలను చల్లుకోవడం మంచి నిద్రకు సహాయపడుతుంది.
మానసిక ఒత్తిడి: అధిక మానసిక ఆందోళనలు, ఆలోచనలు నిద్రను దూరం చేస్తాయి. వీటిని నియంత్రించుకోవడం ముఖ్యం.
కెఫిన్, ఆల్కహాల్: రోజుకు మూడు, నాలుగు కప్పులకు మించి టీ లేదా కాఫీ తీసుకోవడం, ముఖ్యంగా సాయంత్రం 6 గంటల తర్వాత తాగడం నిద్రను ప్రభావితం చేస్తుంది. ఆల్కహాల్ నిద్రకు సహాయపడుతుందనేది అపోహ మాత్రమే. ఇది తాత్కాలిక నిద్రను ఇచ్చి, మధ్యరాత్రి నిద్రలేమికి, మానసిక రుగ్మతలకు (కోర్సకోఫ్ సైకోసిస్ వంటివి) దారితీస్తుంది.
నిద్రలేమికి కారణాలు:
కొన్ని అంతర్గత ఆరోగ్య సమస్యలు కూడా:
- మధుమేహం (డయాబెటిస్)
- రక్తహీనత (ఎనీమియా)
- కీళ్ల నొప్పులు: రుమటాయిడ్ ఆర్థరైటిస్ వంటి కీళ్ల నొప్పులు ముఖ్యంగా ఉదయం లేవగానే తీవ్రంగా ఉండి, నిద్రకు భంగం కలిగిస్తాయి. ఇవి పురుషుల కంటే మహిళల్లో ఎక్కువగా కనిపిస్తాయి.
మంచి నిద్ర కోసం చిట్కాలు
తులసి ఆకులు: రోజుకు రెండు, మూడు తులసి ఆకులను నమలడం అలవాటు చేసుకోండి.
ఆవ నూనె మసాజ్: రాత్రి పడుకోవడానికి ఒక గంట ముందు పాదాలను శుభ్రం చేసుకొని, ఆవ నూనెతో మసాజ్ చేయడం వల్ల మంచి నిద్ర పడుతుంది.
ఆకుకూరలు: పాలకూర, మెంతికూర వంటి ఆకుకూరలను వారానికి కనీసం రెండు సార్లు ఆహారంలో చేర్చుకోవడం వల్ల నిద్ర మెరుగుపడుతుంది.
క్రమబద్ధమైన సమయం: ప్రతిరోజూ ఒకే సమయానికి పడుకొని, లేవడం అలవాటు చేసుకోవాలి. ఆలస్యంగా భోజనం చేయడం, ముఖ్యంగా అర్ధరాత్రి 12 తర్వాత తినడం మెటబాలిజంను దెబ్బతీసి, నిద్రకు ఆటంకం కలిగిస్తుంది. ఇది షుగర్, బీపీ వంటి సమస్యలకు దారితీస్తుంది.
హోమియోపతి: నిద్రలేమికి పాసిఫ్లోరా అనే మొక్క నుండి తీసిన రసాన్ని కొద్దిగా నీటిలో కలిపి రాత్రి పడుకునే ముందు తాగడం వల్ల మంచి నిద్ర పడుతుంది. వారం రోజుల పాటు ఇలా చేయడం వల్ల మందులు లేకుండానే నిద్ర అలవాటవుతుంది.
ఇది కేవలం అవగాహన కోసం మాత్రమే.. నిద్రలేమిని తేలికగా తీసుకోవద్దు.. దీర్ఘకాలిక నిద్రలేమి ఉంటే స్వయంగా మందులు వాడకుండా నిద్ర నిపుణుడు లేదా వైద్యుడి సలహా తీసుకోవడం ఉత్తమం.
మరిన్ని హెల్త్ వార్తల కోసం ఇక్కడ క్లిక్ చేయండి..