Desk Job Health Risks: డెస్క్ జాబ్ చేసేవారు జాగ్రత్త!.. గంటల తరబడి కూర్చోవడం వల్ల ఈ రిస్క్ తప్పదట!
ఉదయం నుంచి సాయంత్రం వరకు డెస్క్ ముందు కూర్చుని పనిచేస్తున్నారా? రోజూ వ్యాయామం చేస్తున్నామని కాస్త రిలాక్స్ అవుతున్నారా? అయితే ఎక్కువసేపు కదలకుండా కూర్చోవడం గుండె ఆరోగ్యంపై ప్రభావం చూపొచ్చని కార్డియాలజిస్ట్ హెచ్చరిస్తున్నారు. ముఖ్యంగా 8-10 గంటల పాటు కూర్చునే అలవాటు ఉన్నవారు ఈ విషయాన్ని తప్పక తెలుసుకోవాలి. ఆ వివరాలేంటో చూసేద్దాం..
ఆఫీసు పని, ఆన్లైన్ మీటింగ్స్, ప్రయాణం, మొబైల్ లేదా ల్యాప్టాప్ వినియోగం.. ఇలా రోజులో ఎక్కువ సమయం కూర్చునే పరిస్థితి చాలామందికి సాధారణమైపోయింది. అయితే శరీరానికి వ్యాయామం ఎంత అవసరమో.. రోజంతా మధ్య మధ్యలో కదలడం కూడా అంతే ముఖ్యమని నిపుణులు చెబుతున్నారు.
1. ఎక్కువసేపు కూర్చుంటే గుండెపై ఎలాంటి ప్రభావం?
ఎక్కువసేపు కదలకుండా కూర్చోవడం వల్ల రక్త ప్రసరణ మందగించవచ్చు. కండరాలు చక్కెర, కొవ్వును వినియోగించే స్థాయి తగ్గడంతో కాలక్రమంలో రక్తంలో షుగర్, ట్రైగ్లిజరైడ్లు పెరగడం, మంచి కొలెస్ట్రాల్ తగ్గడం వంటి మార్పులు రావచ్చని కార్డియాలజిస్ట్ సంజీవ్ వీకే తెలిపారు.
2. వ్యాయామం చేస్తున్నా సరిపోదా?
వ్యాయామం తప్పనిసరిగా చేయాలి. అయితే రోజుకు 30-45 నిమిషాలు వ్యాయామం చేసి మిగిలిన 10 గంటలు కదలకుండా కూర్చోవడం వల్ల దీర్ఘకాలిక నిష్క్రియ ప్రభావం పూర్తిగా తొలగిపోదని డాక్టర్ చెబుతున్నారు. రోజంతా చిన్న చిన్న విరామాల్లో కదలడం ముఖ్యం.
3. యువతలోనూ సమస్యలు కనిపిస్తున్నాయి
ఒకప్పుడు వయసు పెరిగిన వారిలో ఎక్కువగా కనిపించే బీపీ, కొలెస్ట్రాల్, అలసట వంటి సమస్యలు 30, 40 ఏళ్ల వయసులో ఉన్నవారిలోనూ కనిపిస్తున్నాయని డాక్టర్ పేర్కొన్నారు. ఎక్కువసేపు కూర్చునే జీవనశైలి, నిద్రలేమి, ఒత్తిడి వంటి అంశాలు దీనిలో భాగం కావచ్చు.
4. ఈ లక్షణాలను నిర్లక్ష్యం చేయకండి
ఎక్కువసేపు కూర్చునే అలవాటు ఉన్నవారు కింది లక్షణాలను గమనించాలి:
సాయంత్రానికి పాదాలు, చీలమండల్లో వాపు
మెట్లు ఎక్కేటప్పుడు ఆయాసం
తగినంత నిద్రపోయినా అలసటగా ఉండటం
ఆరోగ్య పరీక్షల్లో బీపీ, షుగర్, కొలెస్ట్రాల్ పెరగడం
కాళ్ల కండరాల్లో నొప్పి లేదా బరువుగా అనిపించడం
5. ప్రతి అరగంటకోసారి లేచి నిలబడండి
డెస్క్ పని చేసేవారు ప్రతి 30 నిమిషాలకు సుమారు 30 సెకన్ల పాటు లేచి నిలబడాలని డాక్టర్ సూచిస్తున్నారు. వీలైతే ఫోన్ మాట్లాడేటప్పుడు నిలబడటం, లంచ్, డిన్నర్ తర్వాత 5-10 నిమిషాలు నడవడం వంటి చిన్న మార్పులు కూడా రోజువారీ కదలికను పెంచుతాయి.
6. వారానికి కనీసం 150 నిమిషాల శారీరక శ్రమ
పెద్దలు వారానికి కనీసం 150 నిమిషాల శారీరక శ్రమ లక్ష్యంగా పెట్టుకోవాలని సూచిస్తున్నారు. వారానికి ఐదు రోజులు రోజుకు సుమారు 30 నిమిషాలు వేగంగా నడవడం, సైక్లింగ్ లేదా తగిన ఇతర వ్యాయామాలు చేయవచ్చు.
7. రెగ్యులర్ హెల్త్ చెకప్ కూడా ముఖ్యం
ముఖ్యంగా మధుమేహం, అధిక రక్తపోటు, ఊబకాయం లేదా కుటుంబంలో గుండె జబ్బుల చరిత్ర ఉన్నవారు ఎక్కువసేపు కూర్చునే అలవాటు విషయంలో మరింత జాగ్రత్తగా ఉండాలి. బీపీ, బ్లడ్ షుగర్, కొలెస్ట్రాల్, అవసరమైతే ECG వంటి పరీక్షలను వైద్యుల సూచన మేరకు చేయించుకోవడం మంచిది.
గమనిక:
డెస్క్ ఉద్యోగం చేస్తున్నవారు పూర్తిగా కూర్చోవడం మానేయడం సాధ్యం కాకపోవచ్చు. అయితే నిరంతరం కూర్చోకుండా మధ్య మధ్యలో లేచి నడవడం, మెట్లు ఉపయోగించడం, శారీరక చురుకుదనాన్ని పెంచుకోవడం ఉపయోగకరంగా ఉంటుంది. గుండె సంబంధిత లక్షణాలు లేదా బీపీ, షుగర్, కొలెస్ట్రాల్ సమస్యలు ఉన్నవారు వైద్యుల సలహా తీసుకోవాలి. ఈ కథనం సాధారణ ఆరోగ్య అవగాహన కోసం మాత్రమే. వ్యక్తిగత వైద్య నిర్ణయాలకు ముందు నిపుణుల సలహా తీసుకోవాలి. ఈ సమాచారాన్ని ఆధారంగా చేసుకుని తీసుకునే వ్యక్తిగత నిర్ణయాలకు మా సంస్థ బాధ్యత వహించదు.