Autism: బాల్యాన్ని కబళిస్తున్న ఆటిజం.. నిపుణులు ఏం చెబుతున్నారు?
భారతదేశంలో ఆటిజంపై అవగాహన పెరుగుతున్నప్పటికీ, దీనికి సరైన, సంపూర్ణ చికిత్స అందించడం ఇప్పటికీ ఒక సవాలుగా ఉంది. ఆటిజం అనేది ప్రధానంగా మెదడు అభివృద్ధి, సామాజిక సంభాషణకు సంబంధించిన ఒక స్థితి అయినప్పటికీ, ఇటీవల పరిశోధనలు ఈ సమస్యకు గట్ హెల్త్ కు ..
భారతదేశంలో ఆటిజంపై అవగాహన పెరుగుతున్నప్పటికీ, దీనికి సరైన, సంపూర్ణ చికిత్స అందించడం ఇప్పటికీ ఒక సవాలుగా ఉంది. ఆటిజం అనేది ప్రధానంగా మెదడు అభివృద్ధి, సామాజిక సంభాషణకు సంబంధించిన ఒక స్థితి అయినప్పటికీ, ఇటీవల పరిశోధనలు ఈ సమస్యకు గట్ హెల్త్ కు మధ్య బలమైన సంబంధాన్ని కనుగొన్నాయి.
ఆటిజం చికిత్సలో కేవలం ప్రవర్తనా చికిత్స మాత్రమే కాకుండా, రోగి ఆహారం, గట్ హెల్త్ను మెరుగుపరచడం ద్వారా సానుకూల ఫలితాలు సాధించవచ్చని నిపుణులు భావిస్తున్నారు. ఆటిజం గల పిల్లల్లో ఎలాంటి సమస్యలు ఎదురవుతాయో తెలుసుకుందాం..
ఆహారంపై శ్రద్ద తప్పనిసరి..
మన మెదడుకు, పేగులకు మధ్య ఒక బలమైన కమ్యూనికేషన్ వ్యవస్థ ఉంది, దీనిని ‘గట్-బ్రెయిన్ యాక్సిస్’ అంటారు. పేగులో నివసించే మైక్రోబయోమ్ అనేక రకాల న్యూరోట్రాన్స్మిటర్లను, రసాయనాలను ఉత్పత్తి చేస్తాయి, ఇవి నేరుగా మెదడు పనితీరును ప్రభావితం చేస్తాయి. ఆటిజంతో బాధపడే అనేక మంది పిల్లలలో జీర్ణ సమస్యలు గ్యాస్, మలబద్ధకం, డయేరియా తరచుగా కనిపిస్తాయి.
వారి గట్లో ఉండే మైక్రోబయోమ్ సమతుల్యత దెబ్బతిని ఉంటుంది. అనవసరమైన హానికర బ్యాక్టీరియా అధికంగా ఉండి, అవి విషపూరిత పదార్థాలను ఉత్పత్తి చేస్తాయి, ఇవి మెదడు వాపునకు దారితీయవచ్చు. ఈ విష పదార్థాలు మెదడు పనితీరుపై ప్రభావం చూపడం వల్ల, పిల్లలలో ఆందోళన, చిరాకు, పునరావృత ప్రవర్తనలు మరింత పెరిగే అవకాశం ఉంటుంది.
మంచి బ్యాక్టీరియా (ప్రోబయోటిక్స్), వాటికి ఆహారంగా ఉపయోగపడే ఫైబర్ (ప్రీబయోటిక్స్) అందించడం ద్వారా గట్ మైక్రోబయోమ్ను సమతుల్యం చేయవచ్చు. చేప నూనెల్లో ఉండే ఒమేగా-3 ఫ్యాటీ యాసిడ్స్, విటమిన్ డి మెదడు ఆరోగ్యం మరియు రోగనిరోధక శక్తికి చాలా అవసరం. కొంతమంది పిల్లలలో గ్లూటెన్, కేసిన్ అలెర్జీలను కలిగిస్తాయి. వీటిని తాత్కాలికంగా ఆహారం నుంచి తొలగించడం ద్వారా జీర్ణ సమస్యలు, ప్రవర్తనా సమస్యలు తగ్గుతున్నట్లు నిపుణులు గమనించారు.
ఆటిజం చికిత్సలో స్పీచ్ థెరపీ, ఆక్యుపేషనల్ థెరపీ వంటివి ప్రధానమైనవి అయినప్పటికీ, గట్ హెల్త్ను మెరుగుపరచడం ద్వారా శరీర అంతర్గత వ్యవస్థను బలోపేతం చేయవచ్చు. భారతదేశంలో, వైద్యులు ఈ సంపూర్ణ విధానాన్ని అనుసరించి మెరుగైన ఫలితాలను సాధించడానికి కృషి చేస్తున్నారు.