ఇల్లు వెతుక్కుంటున్న చంద్రబాబు..!

మాజీ సీఎం చంద్రబాబు ఇల్లు మారబోతున్నారా..? ప్రభుత్వం నోటీసులు జారీ చేయడంతో తప్పనిసరి పరిస్థితి ఏర్పడనుందా..? ఒక వేళ అదే జరిగితే బాబు ఎక్కడ ఉండబోతున్నారు. ఇప్పుడు ఇదే న్యూస్.. టీడీసీ సహా అమరావతి వర్గాల్లో ఆసక్తికరమైన చర్చ సాగుతుంది. కృష్ణా నది కరకట్టపై నిర్మించిన ప్రజావేదిక అక్రమ నిర్మాణమంటూ.. కూల్చివేసింది ఏపీ ప్రభుత్వం. మరోవైపు చంద్రబాబు నివాసముంటున్న లింగమనేని గెస్ట్‌హాస్‌కు నోటీసులు జారీ చేసింది. పైగా గెస్ట్‌హాస్‌కు పక్కన ఉన్న తమ స్థలాన్ని గతంలో తీసుకుని.. రెండేళ్ల తరువాత అప్పగిస్తామని చంద్రబాబు హామీ ఇచ్చారని రైతులు ఆందోళన వ్యక్తం చేస్తున్నారు.

కాగా.. చంద్రబాబు గెస్ట్‌హాస్‌ను ప్రభుత్వం తొలగించబోతుందని.. ఆయన ఇల్లు ఖాళీ చేయడం మంచిదంటూ ప్రభుత్వ మంత్రులు కూడా పదేపదే సూచిస్తున్నారు. ఈ క్రమంలో బాబు.. లింగమనేని గెస్ట్‌హాస్‌ను ఖాళీ చేయడం ఖాయమని తెలుస్తోంది.

ఇప్పుడు హాట్‌టాపిక్‌ అంతా నెక్ట్స్ చంద్రబాబు ఎక్కడ ఉంటారనేదే. అయితే.. ఆయన వెలగపూడి మాజీ సర్పంచ్ శాంతకుమారి ఇంట్లో ఉండవచ్చని టీడీపీ వర్గాలు అంచనా వేస్తున్నాయి. ఇప్పటికే టీడీపీ నేత, దేవినేని ఉమా, చంద్రబాబు పీఏ శాంతకుమారి ఇంటిని పరిశీలించారని తెలుస్తోంది. ఇంట్లో అన్ని సౌకర్యాలు ఉండటంతో పాటు.. ఇటు సెక్రటేరియెట్, అటు.. గుంటూరు టీడీపీ ఆఫీస్‌కు అందుబాటులో ఉంటుందని చంద్రబాబు యోచిస్తున్నట్లు తెలుస్తోంది.