Nutan Prasad: నూటొక్క జిల్లాల అందగాడు.. ఆ ఒక్క సంఘటనతో నూతన్ ప్రసాద్ జీవితం చీకట్లోకి..!
ప్రముఖ నటుడు నూతన్ ప్రసాద్ జీవితంలో ఎన్నో ఎత్తుపల్లాలు ఉన్నాయి. 1973లో ఇండస్ట్రీలోకి అడుగుపెట్టిన ఈ నూటొక్క జిల్లాల అందగాడు.. బామ్మ మాట బంగారు బాట షూటింగ్లో జరిగిన ప్రమాదంతో వీల్చైర్కే పరిమితమైనా, 90కి పైగా చిత్రాల్లో నటించి, TV కార్యక్రమాలకు వ్యాఖ్యాతగా వ్యవహరించారు.
తెలుగు సినీ చరిత్రలో విలక్షణ నటుడిగా, అద్భుతమైన సంభాషణలతో ప్రేక్షకులను ఆకట్టుకున్న నూతన్ ప్రసాద్ జీవితం అలుపెరుగని ఆత్మవిశ్వాసానికి, సంకల్పానికి ఒక నిలువెత్తు నిదర్శనం. తడినాద వరప్రసాద్ అనే అసలు పేరుతో 1945 డిసెంబర్ 12న కృష్ణా జిల్లాలోని కైకలూరులో జన్మించిన ఆయన, బందర్లో ఐటీ విద్యను అభ్యసించారు. నాగార్జున సాగర్, హైదరాబాద్లలో హెచ్సీఎల్లో ఉద్యోగం చేస్తున్న సమయంలోనే రంగస్థల నటుడు, దర్శకుడు భానుప్రకాష్ పరిచయంతో నాటకరంగంలోకి ప్రవేశించారు. చిన్నప్పటి నుంచీ నటనపై ఉన్న మక్కువతో 1973లో తన ఉద్యోగానికి రాజీనామా చేసి, అక్కినేని నాగేశ్వరరావు నటించిన అందాల రాముడు చిత్రంతో సినీ రంగ ప్రవేశం చేశారు. ఆ సినిమాతోనే ఆయన పేరు ముందు నూతన్ చేరింది.
ఆయన సినీ ప్రస్థానంలో ఎన్నో మలుపులు, మైలురాళ్లు ఉన్నాయి. బాపు-రమణల కలయికలో వచ్చిన ముత్యాల ముగ్గులో గుర్తింపు పొందిన పాత్ర, ప్రాణం ఖరీదులో మునసబు బుల్లబ్బాయిగా ఆయన నటన అజరామరం. చలిచీమలు, కుడి ఎడమైతే చిత్రాలలోని ఆయన డైలాగులు అప్పట్లో విశేష ప్రజాదరణ పొందాయి. కలియుగ భారతంలో నవ్వింది ఓ ఆడది నన్ను చూసి నవ్వింది అనే ఆయన సంభాషణలు, ఇంటింటి రామాయణంలో రంగనాథ్, చంద్రమోహన్లకు సమానమైన పాత్రలతో నూటొక్క జిల్లాల అందగాడుగా ప్రేక్షకుల మదిలో స్థిరపడ్డారు. రమాప్రభతో ఆయన జోడీ అనేక చిత్రాలలో విజయవంతమైంది. చిరంజీవి, బాలకృష్ణ, వెంకటేష్, నాగార్జున వంటి స్టార్ హీరోల చిత్రాలలోనూ కీలక పాత్రలు పోషించి తనదైన ముద్ర వేశారు. పదేళ్ల వ్యవధిలో 360కి పైగా చిత్రాల్లో నటించి, తన నటనా పటిమను చాటుకున్నారు.
అయితే, కెరీర్ ఉచ్ఛ స్థితిలో ఉన్న సమయంలోనే దురదృష్టం ఆయనను వెంటాడింది. బామ్మ మాట బంగారు బాట సినిమా షూటింగ్లో కారు క్రేన్ నుండి జారిపడిన ప్రమాదంలో ఆయన నడుముకు తీవ్ర గాయమై, వీల్చైర్కే పరిమితమయ్యారు. ఈ ఘటన ఆయన జీవితాన్ని పూర్తిగా మార్చివేసింది. దాదాపు రెండున్నర సంవత్సరాలు ఆసుపత్రిలో గడిపారు. ఈ క్లిష్ట సమయంలో సినీ పరిశ్రమలోని చిరంజీవి, బాలకృష్ణ సహా అనేక మంది నటులు ఆయనను పరామర్శించి ధైర్యం చెప్పారు. కన్నడ కంఠీరవ డాక్టర్ రాజ్ కుమార్ సైతం అదే ఆసుపత్రిలో తన కొడుకు చేతికి గాయం కావడంతో చికిత్స పొందుతున్నప్పటికీ, మానవతా దృక్పథంతో నూతన్ ప్రసాద్ కాళ్లకు స్వయంగా మర్దనా చేసి ఆయనలోని సంస్కారాన్ని చాటుకున్నారు. “ఇది ఓ కళాకారుడి కాలు, దీన్ని స్పృశిస్తే కళామ్మ తల్లి పాదాన్ని స్పృశించినట్లే” అని రాజ్ కుమార్ అనడం నూతన్ ప్రసాద్పై ఆయనకున్న గౌరవానికి నిదర్శనం.
ప్రమాదం తర్వాత కూడా నూతన్ ప్రసాద్ తన ఆత్మవిశ్వాసాన్ని కోల్పోలేదు. వీల్చైర్కే పరిమితమైనప్పటికీ, నిర్మాతలు ఆయన కోసం ప్రత్యేక పాత్రలను సృష్టించారు, దర్శకులు ఆయన నటనను వాడుకున్నారు. వైకల్యం తర్వాత కూడా 90కి పైగా చిత్రాల్లో నటించి అరుదైన రికార్డు సృష్టించారు. టీవీ ఛానెళ్లలోనూ అవకాశాలు అందిపుచ్చుకుని, ఈటీవీలో హ్యాట్సాఫ్ కార్యక్రమం ద్వారా గొప్ప నటుల నటనను విశ్లేషించే అవకాశం పొందారు. ఈటీవీ 2లో ప్రసారమైన నేరాలు-ఘోరాలు కార్యక్రమానికి వ్యాఖ్యాతగా వ్యవహరించి, ఆ కార్యక్రమాన్ని విజయపథంలో నడిపించారు.
ఆయన కుటుంబం కూడా ఆయనకు అడుగడుగునా ధైర్యం ఇచ్చింది. ఆయన భార్య ప్రమీలాదేవి, ఇద్దరు కుమార్తెలు, కొడుకు నూతన్ కుమార్ ఆయనకు అండగా నిలిచారు. నూతన్ కుమార్ కూడా నటుడిగా తన తండ్రితో పలు సినిమాల్లో, అలాగే తరుణ్ నటించిన సోగ్గాడు లాంటి చిత్రాల్లో కనిపించారు. నూతన్ ప్రసాద్కి తన కుమారుడు కంటికి రెప్పలా సేవలు చేశాడు. దాదాపు 500కు పైగా చిత్రాలలో నటించి, తెలుగు సినీ చరిత్రలో తనదైన అధ్యాయాన్ని లిఖించిన నూతన్ ప్రసాద్ గారు, 2011 మార్చి 30న కన్నుమూశారు. ఆయన నటనా వారసత్వం, జీవిత పోరాటం ఎప్పటికీ తెలుగు ప్రేక్షకులకు స్ఫూర్తినిస్తూనే ఉంటుంది.
ఇది చదవండి: చనిపోయే ముందు సౌందర్య గర్భవతి.. ప్రేమించింది అతడినే.! ఎవ్వరికీ తెలియని నిజం