Chiranjeevi: వరుస ఫ్లాపుల్లో మెగాస్టార్.. ఆ ఒక్క సినిమాతో ఇండస్ట్రీ మొత్తం షాక్ అయ్యేలా చేసిన చిరు
తెలుగు సినిమా చరిత్రలో మెగాస్టార్ చిరంజీవి నటించిన సినిమాలకు ఒక ప్రత్యేక స్థానం ఉంది. ఆయన తన కర్రీర్ లో ఎన్నో సూపర్ హిట్ సినిమాలతో పాటు ఫ్లాపులు, డిజాస్టర్స్ కూడా చూశారు. అప్పట్లో వరుస ఫ్లాపుల్లో ఉన్న చిరు ఒకేఒక్క సినిమాతో అందరిని షాక్ అయ్యేలా చేశారు.
రుద్రవీణ వంటి పర్ఫార్మెన్స్ ఓరియెంటెడ్ సినిమా కమర్షియల్‌గా విజయం సాధించకపోయినప్పటికీ, చిరంజీవి నటనకు విశేష ప్రశంసలు దక్కాయి. ఆ సమయంలో, తదుపరి చిత్రం ఏమై ఉంటుందనే ఉత్కంఠ మధ్య, రవిరాజా పినిశెట్టి దర్శకత్వంలో యముడికి మొగుడు ప్రకటించారు. జీవీ నారాయణరావు (నటుడు, నిర్మాత) చిరంజీవితో “దేవాంతకుడు” వంటి విజయవంతమైన రీమేక్ చిత్రాన్ని రూపొందించిన అనుభవం ఉంది. నారాయణరావు తన మిత్రులు సుధాకర్, హరిప్రసాద్‌లతో కలిసి ఈ సినిమాను నిర్మించడానికి ముందుకు వచ్చారు. చిరంజీవి తన మిత్రుల ప్రపోజల్‌ను ఎంతో సంతోషంగా స్వీకరించారు, వారికి మద్దతు ఇవ్వాలనే ఉద్దేశ్యంతో.. ఈ సినిమా కథా నేపథ్యం విభిన్నమైన అంశాల కలయిక. మొదట, నాగబాబు “హెవెన్ కెన్ వెయిట్” (1943లో వచ్చిన నవల, చిత్రం) అనే కథను సూచించారు, దీనిలో ఒకే వ్యక్తిని పోలిన ఏడుగురు మనుషులు ఉంటారు అనే కాన్సెప్ట్ ఉంటుంది. ఈ ప్రధానాంశాన్ని తీసుకుని, దీనికి “యమగోల,” ఎన్టీఆర్ నటించిన “రాముడు భీముడు” వంటి చిత్రాలలోని వినోదాత్మక అంశాలను జోడించారు. సత్యానంద్, నారాయణరావు, తోటపల్లి మధు వంటి రచయితలు ఈ కథను రెండు విభిన్నమైన చిరంజీవి పాత్రలుగా (కాళీ, బాలరాజు) మలిచారు. చిత్రంలోని కొన్ని సన్నివేశాలలో చిరంజీవి గత చిత్రాలైన “విజేత,” “అడవి దొంగ” పాత్రలను చూపించడం ద్వారా కథను మరింత ఆసక్తికరంగా మలిచారు.
చిరంజీవి హెల్మెట్ తీసి విసిరే సీన్‌తో ప్రారంభమయ్యే అతని ఇంట్రడక్షన్ అప్పట్లో ఒక సంచలనం. హీరోయిన్లుగా విజయశాంతి, రాధ నటించగా, అంబిక “నాట్యమేధ” పాటలో స్పెషల్ డాన్స్ చేశారు. యముడు, చిత్రగుప్తుడి పాత్రల్లో కైకాల సత్యనారాయణ, అల్లు రామలింగయ్యలు “యమగోల” స్ఫూర్తితో అద్భుతంగా నటించారు. అల్లు రామలింగయ్య ఆరోగ్యం సరిగా లేని కారణంగా, చిత్రగుప్తుడు పాత్రకు కొన్ని సన్నివేశాల్లో సుత్తివేలు సహాయపడ్డారు. కోట శ్రీనివాసరావు, గొల్లపూడి మారుతీరావు, రావు గోపాలరావు వంటి ప్రముఖ నటులు తమ నటనతో సినిమాకు బలాన్ని చేకూర్చారు. ముఖ్యంగా, నిర్మాతల్లో ఒకరైన సుధాకర్ “పితా పితా” అనే డైలాగ్‌తో రాత్రికి రాత్రే స్టార్ కమెడియన్‌గా ఎదిగారు.
కేఎస్ హరి సినిమాటోగ్రఫీ ఈ చిత్రానికి ఒక ప్రత్యేక ఆకర్షణ. ఆయన కాళీ, బాలరాజు పాత్రలకు తగ్గ మూడ్‌ని, లైటింగ్‌ని అద్భుతంగా చిత్రీకరించారు. రాజ్‌కోటి అందించిన సంగీతం సినిమా విజయానికి కీలకమైంది, ముఖ్యంగా “అందం హిందోళం” వంటి పాటలు ఇప్పటికీ శ్రోతలను అలరిస్తున్నాయి. చిరంజీవి తన కాస్ట్యూమ్స్, లుక్స్ విషయంలో ఎంతో శ్రద్ధ చూపేవారు. అప్పట్లో షాజీ, శివ (ప్రస్తుతం చిరంజీవి మేకప్ మ్యాన్) వంటివారు అతని లుక్స్‌ను డిజైన్ చేయడంలో కీలక పాత్ర పోషించారు. “యముడికి మొగుడు” 1988 ఏప్రిల్ 29న విడుదలైంది. ఆనాటి కాలంలో కోటి పాతిక లక్షల రూపాయల బడ్జెట్‌తో నిర్మించబడిన ఈ చిత్రం భారీ విజయాన్ని నమోదు చేసింది. “గీతా ఆర్ట్స్” నెగటివ్ రైట్స్ తీసుకుంది. ఈ చిత్రం వంద రోజుల వేడుక చెన్నైలోని మెరీనా బీచ్‌లో నిర్వహించారు, తెలుగు రాష్ట్రాల నుండి వేలాది మంది అభిమానులు బస్సుల్లో తరలిరావడం అప్పట్లో ఒక చారిత్రక ఘట్టం. ఈ సినిమా చిరంజీవిని “సుప్రీం హీరో” నుండి “మెగాస్టార్” స్థాయికి తీసుకెళ్లడంలో కీలకమైంది. “యముడికి మొగుడు” ఒక కమర్షియల్ విజయం మాత్రమే కాదు, అది చిరంజీవి అభిమానులకు ఒక స్వర్ణయుగాన్ని పరిచయం చేసింది.
మరిన్ని సినిమా వార్తల కోసం ఇక్కడ క్లిక్ చేయండి