Suresh Guru: సురేష్ గురు కంటికి అసలు ఏమైంది..? సర్జరీ ఎందుకు చేశారంటే..?

ప్రముఖ సోషల్ మీడియా పర్సనాలిటీ, హాస్యనటుడు సురేష్ గురు ఇటీవల తన జీవితంలో మొదటిసారి కంటి శస్త్రచికిత్స చేయించుకున్నారు. ఈ సంఘటనను ఆయన తన అభిమానులతో పంచుకుంటూ, తన ఆరోగ్య పరిస్థితి గురించి పూర్తి వివరాలు వెల్లడించారు. తన కంటి ఆపరేషన్‌కు సంబంధించిన ఫోటోను సోషల్ మీడియాలో పోస్ట్ చేసినప్పుడు, అనేక మంది అభిమానులు ఆయన త్వరగా కోలుకోవాలని కోరుతూ కామెంట్లు పెట్టగా, కొందరు సరదాగా “కన్ను అమ్మేసి ఐఫోన్ కొన్నావా” అంటూ కామెడీగా కామెంట్స్ చేశారు. ఈ నేపథ్యంలో, తన అనుభవాన్ని వివరించడానికి సురేష్ గురు ఒక వీడియోను విడుదల చేశారు. ఆయన తెలిపిన వివరాల ప్రకారం, సురేష్ గురు తన భార్యతో కలిసి తిరుపతిలోని ఒక ప్రైవేట్ ఆసుపత్రికి వెళ్లారు. సాధారణంగా తన ప్రతి పనిలోనూ తన భార్య ఎదురుగా ఉండటం తనకు అలవాటని ఆయన పేర్కొన్నారు. సంవత్సరాలుగా ఆయన కళ్ళు ఎర్రగా ఉండటాన్ని చాలా వీడియోలలో గమనించిన వారికి ఈ ఆపరేషన్ వెనుక గల కారణం ఆశ్చర్యం కలిగించవచ్చు.

సరేష్ గురు రైల్వేలో జాబ్ చేస్తాడన్న విషయం తెలిసిందే. ఎక్కువగా ఎండలో పనిచేయడం, వెల్డింగ్ పనుల్లో నిమగ్నం కావడం వల్ల తన కంటిపై ఒక పొర లాంటిది ఏర్పడిందని సురేష్ గురు తెలిపారు.  వైద్య పరీక్షల అనంతరం, ఈ పొరను తొలగించడం తప్పనిసరి అని వైద్యులు నిర్ధారించారు. శస్త్రచికిత్సకు ముందు, బీపీ, షుగర్ వంటి సాధారణ పరీక్షలు నిర్వహించారు. ఆపరేషన్ థియేటర్‌లోకి వెళ్లేటప్పుడు, సురేష్ గురు తన అనుభవాన్ని వీడియో తీయడానికి అనుమతి కోరగా, వైద్య సిబ్బంది దానికి అంగీకరించారు. డాక్టర్  మాట్లాడుతూనే చాలా సునాయాసంగా ఆపరేషన్ పూర్తి చేశారని, ఇది సుమారు 15 నిమిషాల్లోనే పూర్తయిందని ఆయన పేర్కొన్నారు. ఈ సందర్భంలో, “వైద్యులు నిజంగా కనిపించే దేవుళ్లు” అని సురేష్ గురు కొనియాడారు. ఆపరేషన్ పూర్తయిన వెంటనే, సురేష్ గురు కంటికి కట్టు కట్టారు. ఆసుపత్రి బిల్లు మొత్తం 31,000 రూపాయలు అయిందని ఆయన వెల్లడించారు. ప్రస్తుతం తాను కోలుకుంటున్నానని, ఇంకో వారం రోజుల్లో పూర్తిగా కోలుకొని సాధారణ స్థితికి వస్తానని సురేష్ గురు తెలిపారు. ఆ తర్వాత మళ్ళీ యధావిధిగా కామెడీ వీడియోలతో తన అభిమానులను, ప్రేక్షకులను అలరిస్తానని ఆయన హామీ ఇచ్చారు. ఈ క్లిష్ట సమయంలో తనకు మద్దతుగా నిలిచిన వారందరికీ కృతజ్ఞతలు తెలిపారు.