Kushboo: నా జీవితంలో మా నాన్నే విలన్.. ఓపెన్గా చెప్పేసిన ఖుష్బూ
నటి ఖుష్బూ తన బాల్యం, ప్రారంభ సినీ కెరీర్లోని కష్టాలను వెల్లడించారు. 1986లో తన తండ్రి కుటుంబానిని వదిలి, డబ్బు, నగలు తీసుకుని వెళ్ళిపోయారని ఆమె తెలిపారు. ఆ మైనర్ వయసులో కుటుంబ పోషణకు, తండ్రి అప్పులు తీర్చడానికి తాను పడిన ఇబ్బందులను, సినీ ప్రముఖుల నుండి లభించిన నైతిక మద్దతును ఖుష్బూ వివరించారు.
ప్రముఖ నటి, రాజకీయ నాయకురాలు ఖుష్బూ ఓ ఇంటర్వ్యూలో తన వ్యక్తిగత జీవితంలోని కఠిన సత్యాలను వెల్లడించారు. ఆమె తండ్రి 1986లో కుటుంబానిని విడిచిపెట్టి వెళ్ళిపోయారని, ఆ తర్వాత తమకు ఎంతో కష్టం వచ్చిందని వివరించారు. 1986లో తన తండ్రి బాంబేకు తిరిగి వెళ్ళిపోయారని, ఆయన బ్యాంక్లోని డబ్బుతో పాటు, లాకర్లోని ఆభరణాలను కూడా తీసుకుని వెళ్ళారని ఖుష్బూ తెలిపారు. ఆ సమయంలో ఆమె మైనర్నని, తమ కుటుంబం పూర్తిగా రోడ్డున పడిందని ఆవేదన వ్యక్తం చేశారు. అప్పటి నుండి తన తండ్రితో ఎటువంటి సంప్రదింపులు లేవని, తాను కూడా ఆయనను సంప్రదించే ప్రయత్నం చేయలేదని ఆమె స్పష్టం చేశారు. ఆమె తండ్రి కుటుంబానిని వదిలి వెళ్ళినప్పుడు, ఖుష్బూకు మద్రాస్లో (నేటి చెన్నై) సినిమా షూటింగ్లు ఉండేవి. బాంబేలో ఎవరూ లేకపోవడం వల్ల, ఆమెకు మద్రాస్లోనే కొనసాగడం తప్ప మరో మార్గం లేకపోయింది. అప్పుడు ఆమె తెలుగు చిత్రాలలో నటిస్తున్నారు. దర్శకులు కె. రాఘవేంద్ర రావు, డి. రామానాయుడు వంటి సినీ ప్రముఖుల నుండి ఆమెకు ఎంతో సహాయం అందిందని పేర్కొన్నారు.
తన తండ్రి వారి వద్దకు వెళ్ళి షూటింగ్కు డబ్బు ఇవ్వమని అడిగేవారని, డబ్బు ఇస్తేనే తాను షూటింగ్కు వస్తానని చెప్పేవారని తెలిపారు. అలాంటి పరిస్థితులలో, రాఘవేంద్ర రావు ఖుష్బూకు డబ్బు ఇచ్చి, ఆమె తండ్రికి ఇచ్చినట్లు చెప్పడం వంటి సంఘటనలు జరిగాయని ఆమె గుర్తుచేసుకున్నారు. ఆర్థిక ఇబ్బందులు తీవ్రంగా ఉన్న సమయంలో, ఒకసారి తన తల్లి విజయ హాస్పిటల్లో ఎమర్జెన్సీలో చేరారని, ఆ బిల్లు రూ. 38,000 కట్టడానికి తన చేతిలో డబ్బు లేదని ఖుష్బూ చెప్పారు. అప్పటికే సినిమాల్లో నటిస్తున్నప్పటికీ, ప్రారంభ దశలో అంత పెద్ద మొత్తంలో పారితోషికం ఉండేది కాదని వివరించారు. తన తండ్రి అనేక మంది వద్ద అప్పులు చేసి వెళ్ళిపోయారని, ఆ అప్పులను కూడా తాను తీర్చాల్సి వచ్చిందని ఆమె వెల్లడించారు. కొన్ని సందర్భాలలో కుటుంబం ఆహారం లేకుండా గడిపిందని, తన చేతిలో ఉన్న ఒక ఉంగరం, గాజులు, గొలుసు వంటి వస్తువులను కూడా అమ్మి తన సోదరులకు ఆహారం పెట్టానని ఖుష్బూ గుర్తుచేసుకున్నారు. చదువు, ఇల్లు, ఉద్యోగం వంటివి ఏమీ లేకపోయినా, తన నైపుణ్యంపై, తనపై తనకు ఉన్న నమ్మకంతోనే ఆ క్లిష్ట పరిస్థితులను ఎదుర్కొన్నానని ఆమె దృఢంగా చెప్పారు. 1987లో కన్నడ చిత్రాలలో, అదే సంవత్సరం చివరిలో తమిళ చిత్రాలలో నటించడం ప్రారంభించానని తెలిపారు. ఈ కష్టాలన్నీ జీవితంలో భాగమేనని, వీటిని అధిగమించిన తర్వాత లభించే సంతృప్తే గొప్పదని ఖుష్బూ పేర్కొన్నారు.