బ్యాక్‌గ్రౌండ్‌ లేకుండా ఇండస్ట్రీలోకి ఎంట్రీ.. టాలెంట్‌తో స్టార్ డమ్ సొంతం చేసుకుని కోట్లు కొల్లగొడుతున్న స్టార్లు..

సినిమా ప్రపంచం అంటేనే గ్లామర్, పేరు, డబ్బు. కానీ ఈ రంగుల ప్రపంచంలోకి అడుగుపెట్టడం ఒక ఎత్తయితే, నిలదొక్కుకోవడం మరో ఎత్తు. ముఖ్యంగా సినీ నేపథ్యం ఉన్న కుటుంబాల నుండి వచ్చే వారసుల (నేపోటిజం) హవా ఎక్కువగా ఉండే ఈ రంగంలో, సామాన్య మధ్యతరగతి కుటుంబాల నుండి వచ్చి తమకంటూ ఒక సామ్రాజ్యాన్ని నిర్మించుకోవడం సామాన్యమైన విషయం కాదు. అయితే గత ఏడెనిమిదేళ్లలో భారతీయ చిత్ర పరిశ్రమలో ఒక సరికొత్త మార్పు మొదలైంది. వారసత్వపు గోడలను బద్దలు కొట్టుకుంటూ, కేవలం ప్రతిభనే ఆయుధంగా చేసుకుని ఎదిగిన ‘సెల్ఫ్ మేడ్’ స్టార్ల ప్రభంజనం కనిపిస్తోంది.

ఒకరు ఎన్ఐటీలో ఇంజనీరింగ్ చదివి వేల సంఖ్యలో ఆడిషన్లు ఇచ్చారు.. మరొకరు సినిమా అవకాశం కోసం డ్రైవర్‌గా, క్లాప్ బాయ్‌గా పనిచేశారు. ఇంకొకరు యూట్యూబ్ షార్ట్ ఫిలిమ్స్ చేస్తూ చిన్న ఊరి నుండి వెండితెరపైకి వచ్చారు. వీరికి ఏ స్టార్ హీరో సపోర్ట్ లేదు, ఏ పెద్ద నిర్మాణ సంస్థ బ్యాక్ గ్రౌండ్ లేదు. కానీ నేడు వీరు ఒక్కో సినిమాకు కోట్లాది రూపాయల పారితోషికం తీసుకుంటున్నారు. బాక్సాఫీస్ వద్ద వందల కోట్ల వసూళ్లు రాబడుతూ అగ్ర హీరోలకు సైతం పోటీనిస్తున్నారు. ఆ ప్రతిభావంతులైన స్టార్లు మరెవరో కాదు.. మన మధ్య నుండి వెండితెరపై మెరిసిన సామాన్యులు.

టాలీవుడ్ స్టార్ బాయ్స్..

తెలుగు చిత్రసీమలో సిద్ధు జొన్నలగడ్డ ప్రయాణం అద్భుతం. చిన్న పాత్రలతో మొదలుపెట్టి ‘డీజే టిల్లు’తో తనకంటూ ఒక మేనరిజం సృష్టించుకున్న ఆయన, నేడు యూత్ ఐకాన్ గా మారారు. అలాగే నవీన్ పొలిశెట్టి ‘ఏజెంట్ సాయి శ్రీనివాస ఆత్రేయ’, ‘జాతిరత్నాలు’ వంటి చిత్రాలతో వంద కోట్ల మార్కును అందుకుని మోస్ట్ వాంటెడ్ హీరోగా ఎదిగారు. వీరికంటే ముందే అడివి శేష్ రచయితగా, నటుడిగా తనకంటూ ఒక ప్రత్యేక శైలిని ఏర్పరచుకున్నారు. విశ్వక్ సేన్, సుహాస్ వంటి వారు నిరంతరం వైవిధ్యమైన సినిమాలు చేస్తూ తమ స్థానాన్ని సుస్థిరం చేసుకుంటున్నారు. ఇక కిరణ్ అబ్బవరం ‘క’ (KA) సినిమాతో పాన్ ఇండియా హిట్ కొట్టి మినిమం గ్యారెంటీ హీరోగా గుర్తింపు తెచ్చుకున్నారు.

Adavi Sesh, Kiran Abbavaram

బాలీవుడ్ లో ‘ఆర్యన్’ మార్కు..

బాలీవుడ్‌లో అవుట్‌సైడర్లకు చోటు లేదనే విమర్శలను కార్తీక్ ఆర్యన్ తిప్పికొట్టారు. గ్వాలియర్ నుండి వచ్చి ‘భూల్ భూలయ్యా 2’తో బాక్సాఫీస్ ను కాపాడిన ఆయన, నేడు ఒక్కో సినిమాకు రూ. 40-50 కోట్లు తీసుకునే స్థాయికి చేరారు. ఇక ‘యానిమల్’తో నేషనల్ క్రష్ గా మారిన త్రిప్తి డిమ్రి, ప్రభాస్ సరసన ‘స్పిరిట్’లో అవకాశం అందుకోవడం ఆమె కెరీర్ లో అతిపెద్ద మైలురాయి. ఆయుష్మాన్ ఖురానా, రాజ్ కుమార్ రావు వంటి వారు తమ నటనతో వారసత్వాన్ని వెనక్కి నెట్టేశారు.

కోలీవుడ్ మినీ సూపర్ స్టార్

తమిళ పరిశ్రమలో శివకార్తికేయన్ ఒక సంచలనం. టీవీ యాంకర్ గా కెరీర్ మొదలుపెట్టి నేడు కోలీవుడ్ లో అత్యధిక పారితోషికం తీసుకునే హీరోల్లో ఒకరిగా నిలిచారు. ‘అమరన్’, ‘డాన్’ వంటి చిత్రాలతో ఆయన సామాన్యుల సూపర్ స్టార్ అయ్యారు. అలాగే ప్రదీప్ రంగనాథన్ ‘లవ్ టుడే’తో కేవలం నటుడిగానే కాకుండా దర్శకుడిగా కూడా 100 కోట్ల క్లబ్ లో చేరి అందరినీ ఆశ్చర్యపరిచారు.

కన్నడ, మలయాళంలో..

రిషబ్ శెట్టి ‘కాంతార’ సినిమాతో భారతీయ సినిమా దిశను మార్చేశారు. మట్టి కథలను నమ్ముకుని నేషనల్ అవార్డు గెలుచుకోవడం ఆయన స్వయంకృషికి నిదర్శనం. మలయాళంలో టోవినో థామస్ ‘మిన్నల్ మురళి’తో గ్లోబల్ గుర్తింపు పొందారు. వారసత్వం అనేది కేవలం మొదటి సినిమా వరకే దారి చూపిస్తుంది, కానీ నిలబడాలంటే మాత్రం టాలెంట్ ఒక్కటే మార్గమని వీరంతా నిరూపించారు. ప్రేక్షకులు కూడా కంటెంట్ బాగుంటే నేపో కిడ్ అని చూడకుండా ఆదరిస్తున్నారు.