
సినిమాలకు ప్రేక్షకుల్లో మంచి బజ్ తీసుకురావడానికి హీరోలు రకరకాల ప్రచార వ్యూహాలను అనుసరిస్తున్నారు. సోషల్ మీడియా ప్రమోషన్లతో పాటు నేరుగా ప్రజల్లోకి వెళ్లి తమ సినిమాలను పరిచయం చేస్తున్నారు. ఈ క్రమంలో నటుడు విజయ్ ఆంటోనీ ఎంచుకున్న వినూత్న ప్రచార పద్ధతి ఇప్పుడు అందరి దృష్టిని ఆకర్షిస్తోంది. తెలుగు ప్రేక్షకులకు బిచ్చగాడు, బిచ్చగాడు 2 చిత్రాలతో సుపరిచితమైన విజయ్ ఆంటోనీ తాజాగా ‘అప్పాకుట్టి’ సినిమాతో ప్రేక్షకుల ముందుకు వచ్చారు. తెలుగులో ఈ సినిమాను నాన్న కుట్టి అనే పేరుతో రిలీజ్ చేస్తున్నారు. ఈ చిత్రానికి మరింత ప్రచారం కల్పించాలనే ఉద్దేశంతో ఆయన వినూత్న ఆలోచన చేశారు.
సినిమా ప్రమోషన్ కోసం ఎలాంటి హంగామా లేకుండా సాధారణ ప్రయాణికుడిలా రైలు ఎక్కారు. తన చిత్ర బృందంతో కలిసి చెన్నై నుంచి కోయంబత్తూర్ వెళ్లే కోవై ఎక్స్ప్రెస్లో ప్రయాణించారు విజయ్. రైలులోని జనరల్ బోగీలో తోటి ప్రయాణికుల మధ్య కూర్చుని వారితో సరదాగా ముచ్చటించారు. ఈ సందర్భంగా తన కొత్త సినిమా గురించి వివరించి, చిత్ర విశేషాలను పంచుకున్నారు. ఒక స్టార్ హీరో తమ మధ్యే సాధారణ వ్యక్తిలా ప్రయాణిస్తుండటంతో ప్రయాణికులు ఆశ్చర్యానికి గురయ్యారు.
సినిమా ప్రమోషన్ కోసం భారీ ఈవెంట్లు, ప్రత్యేక కార్యక్రమాలు నిర్వహించే ఈ రోజుల్లో విజయ్ ఆంటోనీ ఇలా నేరుగా సామాన్య ప్రజల మధ్యకు వెళ్లడం ప్రత్యేకంగా నిలిచింది. ఆయన రైలు ప్రయాణానికి సంబంధించిన ఫొటోలు, వీడియోలు ప్రస్తుతం సోషల్ మీడియాలో వైరల్ అవుతున్నాయి. తనదైన శైలిలో ప్రమోషన్ చేసిన విజయ్ ఆంటోనీ మరోసారి వార్తల్లో నిలిచారు. ప్రేక్షకులకు దగ్గరవ్వడానికి ఇలాంటి కొత్త ప్రయత్నాలు ఎంతవరకు ఉపయోగపడతాయో చూడాలి. తెలుగులోనూ విజయ్ కు మంచి క్రేజ్ ఉంది.
మరిన్ని సినిమా వార్తల కోసం ఇక్కడ క్లిక్ చేయండి