Chiru 152: చిరు సినిమాలో ఛాన్స్.. ఎగిరి గంతేస్తోన్న నటుడు..!

కొరటాల శివ దర్శకత్వంలో మెగాస్టార్ చిరంజీవి 152వ చిత్రంలో నటిస్తోన్న విషయం తెలిసిందే. ప్రస్తుతం శరవేగంగా షూటింగ్ జరుపుకుంటోన్న ఈ చిత్రం నుంచి రోజుకో ఆసక్తికర వార్త ఫిలింనగర్‌ వర్గాల్లో హల్‌చల్ చేస్తోంది. ఇప్పటికే ఈ మూవీలో ఓ కీలక పాత్రలో నటించేందుకు సూపర్‌స్టార్ మహేష్ బాబు ఓకే చెప్పారట. అంతేకాదు 30రోజుల క్యాల్షీట్లు కూడా ఇచ్చినట్లు సమాచారం. ఈ వార్తతో అటు మెగాస్టార్, ఇటు సూపర్‌స్టార్ ఫ్యాన్స్ ఇప్పటినుంచే సంబరాలను ప్రారంభించారు. ఒకప్పుడు కృష్ణ సినిమాలో చిరంజీవి నటించగా.. ఇప్పుడు చిరు మూవీలో మహేష్ బాబు నటించబోతున్నారని వారు సంతోషపడుతున్నారు. ఇదిలా ఉంటే తాజాగా ఈ మూవీలో భాగమయ్యారు మరో నటుడు సోనూ సూద్. ఈ విషయాన్ని ఆయనే స్వయంగా వెల్లడించారు.

ఓ ఇంటర్వ్యూలో మాట్లాడిన సోనూ సూద్.. “చిరంజీవి గారి సినిమాలో భాగమైనందుకు చాలా గర్వంగా ఉంది. దక్షిణాది సినిమా ఇండస్ట్రీ నాకు ఎంతో ప్రేమను ఇచ్చింది. ఈ చిత్రం ద్వారా వారికి మరోసారి నా ప్రేమను ఇస్తానని నమ్ముతున్నా” అని అన్నారు. కాగా సినిమాలోని ఓ కీలక పాత్రలో సోనూ సూద్ నటించబోతున్నారని, ఈ పాత్ర కచ్చితంగా ఆయనకు మంచి పేరు తీసుకొస్తుందని సమాచారం. ఏదేమైనా చిరు మూవీపై వస్తోన్న వార్తలను చూస్తుంటే.. ఫ్యాన్స్ అంచనాలకు మించి కొరటాల ఈ ప్రాజెక్ట్‌ను తెరకెక్కించబోతున్నట్లు అర్థమవుతోంది. కాగా ఈ మూవీలో చిరు సరసన త్రిష నటిస్తోంది. రెజీనా ఓ ప్రత్యేక పాత్రలో మెరవనుంది. మ్యాట్నీ ఎంటర్‌టైన్‌మెంట్స్, కొణిదెల ప్రొడక్షన్స్ నిర్మిస్తోన్న ఈ చిత్రానికి మణిశర్మ సంగీతం అందిస్తున్నారు. Read This Story Also: ‘లూసిఫర్’ రీమేక్‌.. లైన్‌లోకి ‘మెగాస్టార్’ ఫేవరెట్ డైరక్టర్..!