ఆరోగ్య సేతు యాప్ లో లోపాలున్నాయన్న హ్యాకర్.. ఖండించిన కేంద్రం

కరోనా పై ప్రజలను అప్రమత్తం చేసేందుకు ప్రభుత్వం తెచ్చిన ‘ఆరోగ్య సేతు’ యాప్ పై క్రమంగా అనుమానపు నీలి నీడలు పరచుకుంటున్నాయి. ఈ యాప్ లో ఎన్నో లోపాలు ఉన్నాయని, ఇది 90 మిలియన్ల మంది భారతీయుల ప్రైవసీకి ముప్పు కలిగించేదిగా ఉందని ఓ హ్యాకర్ పేర్కొన్నాడు. తనను ఇలియట్ ఆల్డర్సన్ అని చెప్పుకున్న ఇతగాడు ఈ యాప్ వల్ల తీవ్రమైన సెక్యూరిటీ సమస్యలు ఉత్పన్నమవుతాయని అన్నాడు. ఫ్రెంచ్ ‘వైట్ హ్యాట్’ అనే నిక్ నేమ్ తో ఈ వ్యక్తి వరుసగా ట్వీట్లు చేశాడు. దీని విషయంలో కేంద్రం తనను ప్రైవేటుగా కాంటాక్ట్ చేయాలనీ, తనకు సహనం చాలా తక్కువని పేర్కొన్నాడు. ఇండియన్ కంప్యూటర్ ఎమర్జెన్సీ రెస్పాన్స్ టీమ్, నేషనల్ ఇన్ఫర్మాటిక్స్ సెంటర్ నన్ను కాంటాక్ట్ చేశాయి. ఈ యాప్ లోని లోపాల  విషయంలో మీరు సరిగా స్పందించకపోతే ఈ లోపాల  గురించి పబ్లిక్ గా బహిర్గతం చేస్తా అని కూడా ఈ హ్యాకర్ హెచ్చరించాడు. ఓ డెడ్ లైన్ కూడా ఇస్తున్నా అన్నాడు. ఈ యాప్ అంశంపై కాంగ్రెస్ నేత రాహుల్ గాంధీ చేసిన వ్యాఖ్యలు సరైనవే అన్నాడు.

అయితే కేంద్రం మాత్రం ఆరోగ్య సేతు యాప్ లో ఎలాంటి లోపాలు లేవని, ఇది ప్రజల ప్రయివసీకి ఎలాంటి భంగం కలిగించదని స్పష్టం చేసింది.