మహిళా ప్రొఫెసర్ పై విద్యార్ధి దాష్టీకం.. పోలీసుల జోక్యంతో కటకటాల వెనక్కి…!!

ప్రొఫెసర్‌ను బెదిరించి నగ్న వీడియో చిత్రీకరించిన కేసులో ఆంధ్రప్రదేశ్‌కి చెందిన విద్యార్థిని తమిళనాడు పోలీసులు అరెస్టు చేశారు. వివరాల్లోకి వెళ్తే.. ఆంధ్రాకి చెందిన వివేశ్‌ (23) కాంచీపురం జిల్లా మహాబలిపురం సమీపాన గల ప్రైవేటు వర్సిటీలో ఇంజనీరింగ్‌ చదువుతున్నాడు. అంబత్తూరు ప్రాంతంలో అద్దె ఇంట్లో ఉంటూ పార్ట్‌టైమ్‌గా ఒక ప్రైవేటు సంస్థలో పని చేస్తున్నాడు. అదే వర్సిటీలో ఆంధ్రాకు చెందిన 25 ఏళ్ల యువతి ఒకరు ప్రొఫెసర్‌గా పని చేస్తున్నారు. ఒకే రాష్ట్రానికి చెందినవారు కావడంతో వివేశ్‌తో ప్రొఫెసర్‌ స్నేహంగా మెలిగారు. ఈ క్రమంలో గత 19వ తేదీ వివేశ్‌ తన చదువు పూర్తవుతున్నందున పార్టీ ఇస్తానని ప్రొఫెసర్‌ను పిలిచాడు. ఆ తరువాత ఈ ఇద్దరు ఈస్ట్‌ కోస్ట్‌ రోడ్డుకు వెళ్లారు.

మార్గమధ్యంలో పూంజేరి సమీపాన గల చీకటి ప్రాంతంలో వివేశ్ వాహనాన్ని ఆపాడు. దీంతో ఆందోళనకు గురైన ప్రొఫెసర్‌ ఎందుకు ఇక్కడ ఆపావని ప్రశ్నించగా.. లోపల రిసార్ట్‌ ఉందని, అక్కడ విందు ఏర్పాటు చేశానని తెలిపాడు. తర్వాత పొదలు ఉన్న చోటుకు ఆమెను తీసుకెళ్లి కత్తి చూపి, దుస్తులు విప్పమని బెదిరించాడు. అంతేకాకుండా ఆమెను నగ్నంగా వీడియో చిత్రీకరించాడు. ఈ విషయం బయట చెప్పకూడదని బెదిరించి మళ్లీ ఆమెను హాస్టల్లో దింపివేశాడు. తర్వాత తనతో గడపాలని, లేకుంటే నగ్న వీడియోలను సామాజిక మాధ్యమాల్లో పెడతానని బెదిరించాడు. దీంతో సెమ్మంజేరి పోలీసులకు ఆమె ఫిర్యాదు చేయడంతో పోలీసులు వివేశ్‌ను అరెస్టు చేశారు. అతడి ఫోన్‌లో నుంచి ప్రొఫెసర్‌ నగ్న వీడియోను డిలీట్‌ చేశారు. సోమవారం వివేశ్‌ను కోర్టులో హాజరు పరిచి రిమాండ్‌కు తరలించారు.