NEET UG 2026 అభ్యర్థులకు గుడ్న్యూస్.. MBBS, BDS అడ్మిషన్లకు మరో ఛాన్స్!
తెలంగాణలో 2026–27 విద్యా సంవత్సరానికి MBBS, BDS కన్వీనర్ కోటా సీట్ల భర్తీ కోసం KNRUHS మరోసారి ఆన్లైన్ రిజిస్ట్రేషన్కు అవకాశం కల్పించింది. NEET UG-2026లో నిర్ణీత కటాఫ్ స్కోర్ లేదా అంతకంటే ఎక్కువ మార్కులు సాధించిన అర్హులైన అభ్యర్థులు ఈ కింది డైరెక్ట్ లింక్ ద్వారా..
Updated on: Aug 19, 2026 | 8:13 AM
హైదరాబాద్, ఆగస్ట్ 19: తెలంగాణ రాష్ట్రంలోని ప్రభుత్వ, ప్రైవేట్ మెడికల్, డెంటల్ కళాశాలల్లో 2026–27 విద్యా సంవత్సరానికి కన్వీనర్ కోటా సీట్ల భర్తీకి మరో అవకాశం లభించింది. ఇందులో భాగంగా MBBS, BDS కోర్సుల ఆన్లైన్ రిజిస్ట్రేషన్ ప్రక్రియను కాళోజీ నారాయణరావు ఆరోగ్య విశ్వవిద్యాలయం (KNRUHS) తిరిగి ప్రారంభించింది. అభ్యర్థుల విజ్ఞప్తులను పరిగణనలోకి తీసుకున్న విశ్వవిద్యాలయం.. అర్హులైన విద్యార్థులకు మరోసారి దరఖాస్తు చేసుకునే అవకాశం కల్పించింది. NEET UG-2026లో నిర్ణీత కటాఫ్ స్కోర్ లేదా అంతకంటే ఎక్కువ మార్కులు సాధించిన అభ్యర్థులు ఈ అవకాశాన్ని వినియోగించుకోవాలని KNRUHS సూచించింది.
తెలంగాణ నీట్ 2026 కౌన్సెలింగ్ రిజిస్ట్రేషన్ కోసం ఇక్కడ క్లిక్ చేయండి.
ఆగస్టు 20 వరకు రిజిస్ట్రేషన్
MBBS, BDS కన్వీనర్ కోటా సీట్ల కోసం ఆన్లైన్ రిజిస్ట్రేషన్, అవసరమైన ధ్రువపత్రాల అప్లోడ్ ప్రక్రియ ఆగస్టు 20 సాయంత్రం 6 గంటల వరకు కొనసాగనుంది. అర్హత ఉన్న అభ్యర్థులు గడువులోగా రిజిస్ట్రేషన్ ప్రక్రియను పూర్తి చేయాలని అధికారులు సూచించారు. దరఖాస్తు సమయంలో అభ్యర్థులు అవసరమైన సర్టిఫికెట్లను ఆన్లైన్లో అప్లోడ్ చేయాల్సి ఉంటుంది. గడువు ముగిసిన తర్వాత రిజిస్ట్రేషన్కు అవకాశం ఉండదని అధికారులు స్పష్టం చేశారు. ఇప్పటికే KNRUHS నిర్వహించిన ఆన్లైన్ రిజిస్ట్రేషన్ ప్రక్రియలో దరఖాస్తు పూర్తి చేసి, అప్లికేషన్ సమర్పించిన అభ్యర్థులు మళ్లీ దరఖాస్తు చేయాల్సిన అవసరం లేదని విశ్వవిద్యాలయం తెలిపింది.
అర్హత ఉన్నప్పటికీ గతంలో రిజిస్ట్రేషన్ చేసుకోలేకపోయిన NEET UG-2026 అభ్యర్థులు ఈ అదనపు అవకాశాన్ని సద్వినియోగం చేసుకోవాలని అధికారులు సూచించారు. కన్వీనర్ కోటా కింద తెలంగాణలోని ప్రభుత్వ, ప్రైవేట్ మెడికల్, డెంటల్ కళాశాలల్లో MBBS, BDS ప్రవేశాల తదుపరి ప్రక్రియకు ఈ రిజిస్ట్రేషన్ కీలకం కానుంది.
తెలంగాణ నీట్ 2026 కౌన్సెలింగ్ రిజిస్ట్రేషన్ కోసం ఇక్కడ క్లిక్ చేయండి.
