సూపర్ మార్కెట్లలో మిల్క్ మిస్టరీ.. ఇవి తెలుసుకోకుండా వెళ్తే జేబుకు చిల్లే..
సూపర్ మార్కెట్కి వెళ్లే ప్రతి ఒక్కరూ ఏదో ఒక సమయంలో ఫేస్ చేసే ప్రాబ్లమ్ ఇది.. కేవలం ఒక లీటరు పాలు కొందామని లోపలికి వెళ్తాం.. కానీ బయటకొచ్చేసరికి చేతిలో చాక్లెట్లు, చిప్స్, డ్రింక్స్ నిండిన పెద్ద ట్రాలీ ఉంటుంది. అసలు అనుకోకుండానే ఈ ఖర్చు ఎలా పెరిగింది? ఎప్పుడైనా గమనించారా.. మనం రోజూ కొనే పాలు చివర్లోనే ఎందుకు ఉంటాయి? అనే విషయాలు తెలుసుకుందాం..
కేవలం ఒక లీటరు పాలు మాత్రమే కొందామని సూపర్ మార్కెట్లోకి అడుగుపెడతారు. కానీ తిరిగి బయటకు వచ్చేసరికి చేతిలో చిప్స్, బిస్కెట్లు, చాక్లెట్లు, ఇతర ఫ్రోజెన్ స్నాక్స్ నిండిన పెద్ద ట్రాలీ ఉంటుంది. అసలు అనుకోకుండానే ఈ ఖర్చు ఎలా పెరిగింది? ప్రజలను ఎక్కువ వస్తువులు కొనేలా చేయడానికి రీటైల్ దుకాణాలు పన్నిన వ్యూహమా? ప్రతి సూపర్ మార్కెట్లోనూ నిత్యం కొనే పాలు, బ్రెడ్ వంటి వస్తువులు ఎప్పుడూ స్టోర్ ఆఖరి చివరన ఎందుకు ఉంటాయి? దీని వెనుక ఉన్న అసలు రహస్యాన్ని రీటైల్, సప్లై చైన్ నిపుణులు బయటపెట్టారు.
అసలు కారణం లాజిస్టిక్స్ – కూలింగ్ సిస్టమ్
పాలను స్టోర్ చివరన పెట్టడం వెనుక మార్కెటింగ్ కంటే వస్తువు నాణ్యత, కూలింగ్ కారణాలే ఎక్కువని నిపుణులు చెబుతున్నారు. పాలు త్వరగా పాడైపోయే సున్నితమైన ఆహార పదార్థం. సరఫరా చేసే ట్రక్కులు సూపర్ మార్కెట్ వెనుక భాగంలోని లోడింగ్ డాక్స్ వద్దే అన్ లోడ్ అవుతాయి. పాలు వెనుక భాగంలోనే ఉండటం వల్ల, ట్రక్కుల నుంచి నేరుగా వాక్ ఇన్ రిఫ్రిజరేటర్లలోకి సులభంగా మార్చవచ్చు. ఒకవేళ వీటిని స్టోర్ ముందు భాగంలో పెడితే, రోజులో పలుమార్లు భారీ పాల క్రేట్లను సిబ్బంది షాప్ అంతటా మోయాల్సి వస్తుంది. దీనివల్ల ఉష్ణోగ్రత మారి పాలు పాడయ్యే ప్రమాదంతో పాటు శ్రమ కూడా పెరుగుతుంది. పాలు ఎల్లప్పుడూ ఒకే విధమైన కూలింగ్లో ఉండాలి. ఎంట్రన్స్ వద్ద ఉంచితే తరచూ మెయిన్ డోర్లు తెరుచుకోవడం వల్ల గాలి మారి పాలు పాడయ్యే అవకాశం ఉంటుంది.
వినియోగదారుల మైండ్ గేమ్
లాజిస్టిక్స్ కారణమే ప్రధానమైనప్పటికీ, రీటైలర్లు ఈ అవకాశాన్ని తమ వ్యాపార లాభానికి అద్భుతంగా వాడుకుంటున్నారు. పాలు, బ్రెడ్, గ్రుడ్లు అనేవి కస్టమర్ ఆఫర్లు ఉన్నా లేకపోయినా ఖచ్చితంగా కొనే వస్తువులు. పాలు స్టోర్ చివరన ఉండటం వల్ల కస్టమర్లు మిగతా అన్ని ర్యాక్ల గుండా నడుచుకుంటూ వెళ్లాల్సి వస్తుంది. ఈ క్రమంలో మిగతా వస్తువులను చూసి, అవసరం లేకపోయినా కొనుగోలు చేసే అవకాశం దాదాపు 40శాతం పెరుగుతుంది. దీన్నే రీటైల్ భాషలో “బిల్డింగ్ ది బాస్కెట్” అంటారు.
భారీ కూలింగ్ ఖర్చులు
సూపర్ మార్కెట్లలో వాడే కమర్షియల్ కూలింగ్ సిస్టమ్స్కు అధిక విద్యుత్, సంక్లిష్టమైన పైపింగ్ అవసరం. ఈ పెద్ద పెద్ద ఫ్రీజర్లను స్టోర్ గోడల వైపు లేదా వెనుక భాగంలో అమర్చడం వల్ల నిర్మాణ వ్యయం తగ్గడమే కాకుండా నిర్వహణ కూడా సులభమవుతుంది.
ఇది వ్యూహమా? అవసరమా?
దీనికి సమాధానం రెండూ.. పాలు స్టోర్ చివరన ఉండటం అనేది ఒక రకంగా పాలు పాడవ్వకుండా కాపాడే సాంకేతిక అవసరం. అదే సమయంలో కస్టమర్ల చేత ఎక్కువ వస్తువులు కొనిపించే వ్యాపార వ్యూహం కూడా. కాబట్టి మీరు సూపర్ మార్కెట్కు వెళ్లినప్పుడు కేవలం పాలు మాత్రమే కొని బయటకు రాగలిగితే.. మీరు రీటైలర్ల సైకాలజీని జయించినట్లే..