Bank Accounts: ఖాతాదారులకు ఆ బ్యాంకుల షాక్.. భారీగా వడ్డీ రేట్ల తగ్గింపు..!

Savings account

రిజర్వ్ బ్యాంక్ ఆఫ్ ఇండియా రెపో రేటును 25 బేసిస్ పాయింట్లు తగ్గించి 6 శాతానికి చేర్చిన తర్వాత దాదాపు అన్ని బ్యాంకులు పొదుపు ఖాతా డిపాజిట్లపై వడ్డీ రేట్లను తగ్గించాయి. ద్రవ్య విధాన కమిటీ (ఎంపీసీ) 54వ సమావేశం మరియు 2025–26 ఆర్థిక సంవత్సరం మొదటి సమావేశం ముగిసిన తర్వాత ఎంపీసీ సభ్యులు పాలసీ రెపో రేటును 25 బేసిస్ పాయింట్లు తగ్గించాలని ఏకగ్రీవంగా నిర్ణయించారు. తక్షణమే అమల్లోకి వచ్చేలా రెపోరేటును 6 శాతానికి తగ్గించారని ఆర్‌బీఐ గవర్నర్ సంజయ్ మల్హోత్రా ఇటీవల ప్రకటించారు. రెపో రేటు అంటే ఆర్‌బిఐ వాణిజ్య బ్యాంకులకు డబ్బు ఇచ్చే రేటు. రెపో రేటు తగ్గింపు రుణాలు, పెట్టుబడులను పెంచే లక్ష్యంతో ఉంటుంది. ఆర్‌బీఐ రెపో రేటును తగ్గించిన తర్వాత హెచ్‌డీఎఫ్‌సీ బ్యాంక్, ఐసీఐసీఐ బ్యాంక్, యాక్సిస్ బ్యాంక్, ఫెడరల్ బ్యాంక్, యస్ బ్యాంక్ వంటి బ్యాంకులు సేవింగ్స్ ఖాతాల వడ్డీ రేట్లను తగ్గించాయి. 

హెచ్‌డీఎఫ్‌సీ బ్యాంక్

హెచ్‌డీఎఫ్‌సీ బ్యాంక్ పొదుపు ఖాతాలపై వడ్డీ రేటును 0.25 శాతం తగ్గించింది. దేశంలో అతిపెద్ద ప్రైవేట్ రంగ రుణదాత రూ. 50 లక్షల కంటే తక్కువ డిపాజిట్లపై పొదుపు ఖాతాలపై 2.75 వడ్డీని, రూ. 50 లక్షల కంటే ఎక్కువ డిపాజిట్లపై 3.25 శాతం వడ్డీని అందించనుంది. ప్రైవేట్ రంగ రుణదాత కూడా తన స్థిర డిపాజిట్ రేట్లను 0.35 శాతం తగ్గించి 0.40 శాతానికి తగ్గించింది. ఈ సవరించిన వడ్డీ రేట్లు ఏప్రిల్ 1, 2025 నుంచి అమల్లోకి వచ్చింది. 

ఐసీఐసీఐ బ్యాంక్

ఐసీఐసీఐ బ్యాంక్ తన సేవింగ్స్ ఖాతాల డిపాజిట్ వడ్డీ రేటును 0.25 శాతం తగ్గిస్తున్నట్లు ప్రకటించింది. తమ కస్టమర్లు రూ. 50 లక్షల వరకు తమ పొదుపు బ్యాంకు నిల్వలపై 2.75 శాతం వడ్డీ రేటును పొందేందుకు అర్హులు అని పేర్కొంది. ఈ కొత్త వడ్డీ రేట్లు ఏప్రిల్ 16, 2025 నుంచి అమల్లోకి వచ్చాయి. 

యాక్సిస్ బ్యాంక్

యాక్సిస్ బ్యాంక్ పొదుపు ఖాతాలపై వడ్డీ రేట్లను 25 బేసిస్ పాయింట్లు తగ్గించింది. రూ. 50 లక్షల లోపు పొదుపు ఖాతా నిల్వలు ఉన్న కస్టమర్లకు 2.75 శాతం వడ్డీ రేటు లభిస్తుంది. రూ. 50 లక్షల నుంచి రూ. 2,000 కోట్ల లోపు నిల్వలు ఉన్న వ్యక్తులు సంవత్సరానికి 3.25 శాతం పొందవచ్చు.

ఫెడరల్ బ్యాంక్

ఫెడరల్ బ్యాంక్ తన పొదుపు ఖాతాల డిపాజిట్లపై మొత్తాన్ని 25 బేసిస్ పాయింట్లు తగ్గించింది. ఇది 2025 ఏప్రిల్ 17 నుంచి అమల్లోకి వచ్చింది. సేవింగ్స్ ఖాతాదారులు ఇప్పుడు రూ. 50 లక్షల వరకు డిపాజిట్లపై 2.75 శాతం వరకు పొందుతారు.

యస్ బ్యాంక్

యస్ బ్యాంక్ తన పొదుపు ఖాతాలపై తగ్గించిన వడ్డీ రేట్లను ఏప్రిల్ 21, 2025 అమల్లోకి తీసుకొచ్చింది. రూ. 10 లక్షల వరకు డిపాజిట్లు కలిగి ఉన్న బ్యాంక్ కస్టమర్లు ఇప్పుడు సంవత్సరానికి 3 శాతం పొందుతారు. రూ. 10 లక్షల నుంచి రూ. 25 లక్షల మధ్య డిపాజిట్లు 3.5 శాతం పొందుతారు.