Diwali Gift Scam: దీపావళి గిఫ్ట్ రూ.8 లక్షలు.. ఇలా చేశారంటే చాలు బ్యాంక్ ఖాతా ఖాళీ..!
Diwali Gift Scam Alert: దీపావళి పండుగ సందర్భంగా సైబర్ నేరగాళ్లు కొత్త మోసాలకు తెరలేపుతున్నారు. ప్రముఖుల పేర్లతో రూ.8 లక్షల విలువైన గిఫ్టులు ఇస్తామంటూ నకిలీ లింకులు పంపిస్తున్నారు. ఈ తరహా మోసాల పట్ల ప్రజలు అప్రమత్తంగా ఉండాలని సైబరాబాద్ పోలీసులు హెచ్చరించారు..
Diwali Gift Scam Alert: పండుగ వచ్చిందంటే చాలు.. షాపింగ్ ఆఫర్లు, డిస్కౌంట్లు, గిఫ్టుల పేరుతో ఎన్నో ప్రకటనలు కనిపిస్తుంటాయి. ఇదే అదనుగా భావిస్తున్న సైబర్ నేరగాళ్లు అమాయక ప్రజలను లక్ష్యంగా చేసుకుంటున్నారు. ముఖ్యంగా దీపావళి సందర్భంగా రూ.8 లక్షల విలువైన గిఫ్ట్ అందిస్తామంటూ కొత్త తరహా మోసాలకు పాల్పడుతున్నారు. ప్రముఖ వ్యక్తుల పేర్లతో నకిలీ సందేశాలు, లింకులు రూపొందించి వాట్సాప్, సోషల్ మీడియా ద్వారా పంపిస్తున్నారు. ఈ లింకులపై క్లిక్ చేస్తే భారీ బహుమతి వస్తుందని నమ్మిస్తున్నారు. ఇలాంటి నకిలీ ప్రచారాలను నమ్మి మోసపోవద్దని సైబరాబాద్ పోలీసులు ప్రజలను హెచ్చరించారు.
ప్రముఖుల పేర్లతో నకిలీ లింకులు
సైబర్ నేరగాళ్లు ప్రజల్లో నమ్మకం కలిగించేందుకు ప్రముఖ వ్యక్తుల పేర్లు, ఫొటోలను ఉపయోగిస్తున్నారు. రూ.8 లక్షల విలువైన దీపావళి గిఫ్ట్ గెలుచుకున్నారంటూ ఆకర్షణీయమైన సందేశాలు పంపిస్తున్నారు. ఈ సందేశాల్లో ఉండే లింకుల ద్వారా వ్యక్తిగత వివరాలు, బ్యాంకింగ్ సమాచారాన్ని సేకరించే ప్రయత్నం చేస్తున్నారు. కొన్నిసార్లు నకిలీ వెబ్‌సైట్లకు తీసుకెళ్లి ప్రజలను మోసగిస్తున్నారు. అందువల్ల గుర్తుతెలియని లింకులపై క్లిక్ చేయడం ప్రమాదకరమని పోలీసులు సూచిస్తున్నారు.
సైబర్ మోసాల నుంచి తప్పించుకోవాలంటే ఈ జాగ్రత్తలు తప్పనిసరి:
సైబరాబాద్ పోలీసులు తమ పోస్టులో ప్రజలకు పలు సూచనలు చేశారు.
1. తెలియని లింకులు వద్దు: వాట్సాప్ లేదా ఇతర సోషల్ మీడియా ద్వారా వచ్చే అపరిచిత లింకులను క్లిక్ చేయవద్దు.
2. బ్యాంకింగ్ వివరాలు చెప్పొద్దు: మీ వ్యక్తిగత సమాచారం, బ్యాంక్ ఖాతా వివరాలు, ఇతర రహస్య సమాచారాన్ని ఎవరికీ తెలియజేయవద్దు.
3. అపరిచిత మెసేజ్‌ల పట్ల జాగ్రత్త: అనుమానాస్పద సందేశాలు, గుర్తుతెలియని వ్యక్తుల నుంచి వచ్చే ఫోన్ కాల్స్‌ను నమ్మవద్దు.
4. గిఫ్ట్ ఆఫర్లను నమ్మేముందు పరిశీలించండి: లక్షల రూపాయల విలువైన బహుమతులు ఇస్తామనే సందేశాల వెనుక నిజానిజాలు తెలుసుకోండి.
సైబర్ మోసానికి గురైతే వెంటనే ఇలా చేయండి:
ఒకవేళ పొరపాటున సైబర్ నేరగాళ్ల వలలో చిక్కుకుని డబ్బులు పోగొట్టుకున్నా, భయపడకుండా వెంటనే స్పందించాలి. ఆలస్యం చేయకుండా జాతీయ సైబర్ క్రైమ్ హెల్ప్‌లైన్ నంబర్ 1930కు ఫోన్ చేయాలి. అలాగే అధికారిక సైబర్ క్రైమ్ వెబ్‌సైట్ www.cybercrime.gov.in ద్వారా కూడా ఫిర్యాదు చేయవచ్చు. ఎంత త్వరగా ఫిర్యాదు చేస్తే అంత త్వరగా సంబంధిత అధికారులకు చర్యలు తీసుకునే అవకాశం ఉంటుంది.
పండుగ వేళ అప్రమత్తంగా ఉండండి:
దీపావళి పండుగను సంతోషంగా జరుపుకోవాల్సిన సమయంలో ఇలాంటి నకిలీ గిఫ్ట్ ఆఫర్లకు ఆకర్షితులై కష్టపడి సంపాదించిన డబ్బును పోగొట్టుకోవద్దు. సోషల్ మీడియాలో వచ్చే ప్రతి ఆఫర్ నిజమైనది కాదు. ముఖ్యంగా రూ.8 లక్షల గిఫ్ట్ అంటూ వచ్చే సందేశాల విషయంలో మరింత అప్రమత్తంగా ఉండాలని సైబరాబాద్ పోలీసులు సూచిస్తున్నారు.
ఇది కూడా చదవండి: RBI Notes: దీపావళికి రూ.10, రూ.20, రూ.50 నోట్ల కొరత? ఆర్బీఐ సంచలన ప్రకటన
మరిన్ని బిజినెస్ వార్తల కోసం ఇక్కడ క్లిక్ చేయండి