RBI నిర్ణయాలతో సామాన్యుడి జేబుకు చిల్లు పడుతోందా? EMIలు పెరుగుతున్నాయా

భారతీయ రిజర్వ్ బ్యాంక్ (RBI) ప్రతి రెండు నెలలకు ఒకసారి నిర్వహించే మానిటరీ పాలసీ కమిటీ (MPC) సమావేశాల్లో తీసుకునే ‘రెపో రేటు’ నిర్ణయం సామాన్యుల ఆర్థిక జీవితాన్ని నేరుగా ప్రభావితం చేస్తుంది. హోమ్ లోన్, కార్ లోన్, పర్సనల్ లోన్ వడ్డీ రేట్ల నుండి ఫిక్స్‌డ్ డిపాజిట్ల (FD) రాబడి వరకు అన్నీ దీనిపైనే ఆధారపడి ఉంటాయి. ప్రస్తుతం రెపో రేటు 5.25 శాతంగా ఉండగా, జూన్ 3 నుండి జూన్ 5, 2026 మధ్య జరగబోయే తదుపరి సమావేశంపై అందరి దృష్టి నెలకొంది. అసలు ఈ రెపో రేటు అంటే ఏమిటి? ఇది పెరిగినా లేదా తగ్గినా మన జేబుపై ఎలాంటి ప్రభావం పడుతుందో తెలుసుకుందాం..

రెపో రేటు తగ్గితే..

రెపో రేటు తగ్గితే హోమ్ లోన్ వంటి వాటిపై వడ్డీ భారం తగ్గుతుంది. ఉదాహరణకు, 50 లక్షల రూపాయల హోమ్ లోన్‌పై వడ్డీ రేటు 8.25 శాతం నుండి 8 శాతానికి తగ్గితే, నెలకు సుమారు 781 రూపాయలు, ఏడాదికి 9,372 రూపాయల చొప్పున ఆదా అవుతుంది. అయితే, డిపాజిటర్లకు ఇది కొంత నష్టదాయకం, ఎందుకంటే బ్యాంకులు ఎఫ్‌డి వడ్డీ రేట్లను తగ్గించే అవకాశం ఉంది.

దీనివల్ల మెచ్యూరిటీ సమయంలో అందే రాబడి తగ్గుతుంది. షేర్ మార్కెట్ విషయానికి వస్తే, అప్పులు చౌకగా మారడం వల్ల కంపెనీల లాభాలు పెరిగి స్టాక్స్ పుంజుకునే అవకాశం ఉంటుంది. డెట్ మ్యూచువల్ ఫండ్స్ పెట్టుబడిదారులకు కూడా ఇది లాభదాయకం.

దీనికి విరుద్ధంగా, రెపో రేటు పెరిగితే మీ ఈఎంఐల భారం పెరుగుతుంది. 50 లక్షల హోమ్ లోన్‌పై వడ్డీ రేటు 8.5 శాతానికి పెరిగితే, నెలకు అదనంగా 788 రూపాయలు చెల్లించాల్సి ఉంటుంది. అంటే లోన్ కాలపరిమితి ముగిసేసరికి మీరు లక్షల రూపాయలు అదనంగా కట్టాల్సి రావచ్చు. కానీ, ఎఫ్‌డి చేసే వారికి ఇది శుభవార్త, ఎందుకంటే బ్యాంకులు వడ్డీ రేట్లను పెంచుతాయి. అయితే, పెరిగిన వడ్డీ రేట్ల వల్ల కంపెనీల నిర్వహణ వ్యయం పెరిగి స్టాక్ మార్కెట్ ఒత్తిడికి లోనయ్యే అవకాశం ఉంది.

రెపో రేటు తగ్గుదల అనేది ఈఎంఐలు, ఈక్విటీ పెట్టుబడిదారులకు సానుకూలమైనది, కానీ ఎఫ్‌డిలకు తక్కువ లాభదాయకం. రేటు పెరిగితే ఎఫ్‌డిలు లాభిస్తాయి కానీ ఈఎంఐలు పెరుగుతాయి. మార్కెట్ పరిస్థితులు, బ్యాంకులు ఎంత వేగంగా ఈ మార్పులను అమలు చేస్తాయి అనే దానిపైనే మీ ఆర్థిక ప్రయోజనాలు ఆధారపడి ఉంటాయి. కాబట్టి, ఆర్బీఐ నిర్ణయాలను నిశితంగా గమనిస్తూ మీ ఆర్థిక ప్రణాళికలను సిద్ధం చేసుకోవడం ఎల్లప్పుడూ మంచిది.