Iran-Israel War: ఇరాన్ యుద్ధ సమయంలో బంగారం కొనుగోలు చేస్తున్నారా?

Iran Israel War

Iran-Israel War: యుద్ధాల సమయంలో బంగారం, వెండి సాధారణంగా సురక్షితమైన పెట్టుబడులుగా పరిగణిస్తారు. ప్రపంచ ఉద్రిక్తతలు పెరిగినప్పుడు, పెట్టుబడిదారులు భద్రత కోసం తమ డబ్బును ఈ లోహాలలోకి తరలించడంతో వాటి ధరలు తరచుగా పెరుగుతాయి. పశ్చిమ ఆసియాలో యుద్ధ మేఘాలు కమ్ముకున్నప్పటికీ, పెట్టుబడిదారులకు సురక్షిత స్వర్గధామంగా భావించే బంగారం, వెండి ధరలు ఊహించని విధంగా పతనమవుతున్నాయి. సాధారణంగా యుద్ధ సమయాల్లో పెరిగే పసిడి ధరలు, ఈసారి ఎందుకు తగ్గుతున్నాయనే అంశంపై పూర్తి వివరాలు తెలుసుకుందాం..

ఇది కూడా చదవండి: Free Gas: గృహ వినియోగదారులకు కేంద్రం భారీ గుడ్‌న్యూస్‌.. రూ.500 వరకు ఉచిత గ్యాస్‌.. సెక్యూరిటీ ఫీజు జీరో…!

యుద్ధం ఉన్నా తగ్గని పసిడి సెగ: బంగారం ధరలు ఎందుకు పడిపోతున్నాయి?

సాధారణంగా ప్రపంచ దేశాల మధ్య ఉద్రిక్తతలు పెరిగినప్పుడు పెట్టుబడిదారులు తమ డబ్బును సురక్షితంగా ఉంచుకోవడానికి బంగారం వైపు మొగ్గు చూపుతారు. దీనినే ‘సేఫ్ హెవెన్’ డిమాండ్ అంటారు. కానీ, ప్రస్తుత పశ్చిమ ఆసియా సంక్షోభంలో ఈ సిద్ధాంతం తలకిందులైంది. అంతర్జాతీయ మార్కెట్లో బంగారం ధరలు గత ఫిబ్రవరి నుండి దాదాపు 18% మేర క్షీణించాయి.

ధరలు తగ్గడానికి ప్రధాన కారణాలు:

1. నగదు కోసం అమ్మకాలు:

ప్రస్తుత అస్థిర పరిస్థితుల్లో పెట్టుబడిదారులు బంగారాన్ని సురక్షిత ఆస్తిగా చూడటం లేదు. ఇతర మార్కెట్లలో వస్తున్న నష్టాలను పూడ్చుకోవడానికి లేదా నగదును చేతిలో ఉంచుకోవడానికి అత్యంత వేగంగా అమ్ముడయ్యే బంగారాన్ని విక్రయిస్తున్నారు. అంటే, బంగారం ఇప్పుడు కొనుగోలు చేసే వస్తువుగా కాకుండా, నగదును సమకూర్చే వనరుగా మారింది.

2. బలమైన అమెరికన్ డాలర్:

అంతర్జాతీయ మార్కెట్లో డాలర్ విలువ పెరగడం బంగారంపై ఒత్తిడిని పెంచుతోంది. డాలర్ బలపడితే, ఇతర కరెన్సీలు ఉన్న దేశాలకు బంగారం కొనుగోలు చేయడం ఖరీదైన వ్యవహారంగా మారుతుంది. దీనివల్ల డిమాండ్ తగ్గి ధరలు పడిపోతాయి.

3. వడ్డీ రేట్ల ప్రభావం:

అమెరికాలో వడ్డీ రేట్ల తగ్గింపుపై నెలకొన్న సందిగ్ధత కూడా బంగారానికి శాపంగా మారింది. వడ్డీ రేట్లు ఎక్కువగా ఉన్నప్పుడు బాండ్ల వంటి ఇతర ఆస్తులపై ఆదాయం ఎక్కువగా ఉంటుంది. బంగారంపై ఎటువంటి వడ్డీ రాదు కాబట్టి, పెట్టుబడిదారులు ఇతర మార్గాల వైపు మళ్లుతున్నారు.

4. ద్రవ్యోల్బణం, చమురు ధరలు:

యుద్ధం కారణంగా ముడి చమురు ధరలు పెరగడం ద్రవ్యోల్బణానికి దారితీస్తోంది. దీనిని అదుపు చేసేందుకు సెంట్రల్ బ్యాంకులు కఠినంగా వ్యవహరిస్తున్నాయి. ఈ పరిస్థితులు పరోక్షంగా బంగారు ధరల తగ్గుదలకు కారణమవుతున్నాయి.

పెట్టుబడిదారులు ఏం చేయాలి?

ఆగ్మౌంట్ (Augmont) రీసెర్చ్ హెడ్ డాక్టర్ రేనిషా చైనాని విశ్లేషణ ప్రకారం.. ధరలు తగ్గినప్పటికీ, దీర్ఘకాలంలో బంగారం, వెండి బలమైన ఆస్తులే. దీని వల్ల ఎలాంటి ఆందోళన చెందాల్సిన అవసరం లేదంటున్నారు. కొత్తగా పెట్టుబడి పెట్టేవారు ఒకేసారి కాకుండా, ధరలు తగ్గినప్పుడు కొద్దికొద్దిగా (Dips) కొనుగోలు చేయడం ఉత్తమం. బంగారం ధర రూ.1,30,000 వరకు చేరే అవకాశాలు ఉండగా, తర్వాత తిరిగి రూ. 1,48,000 వరకు వెళ్లే అవకాశం ఉంది. వెండికి రూ. 2,00,000 వరకు చేరే అవకాశాలు ఉన్నాయంటున్నారు.

ప్రస్తుతానికి భౌగోళిక రాజకీయాల కంటే ప్రపంచ ఆర్థిక పరిస్థితులు (ముఖ్యంగా డాలర్ విలువ, వడ్డీ రేట్లు) బంగారం ధరలను నిర్ణయించడంలో కీలక పాత్ర పోషిస్తున్నాయి. అందుకే యుద్ధం జరుగుతున్నా పసిడి ధరల్లో పెరుగుదల కనిపించడం లేదు.

ఇది కూడా చదవండి: LPG Gas: సంచలన నిర్ణయం.. వీరికి నిలిచిపోనున్న గ్యాస్‌ బుకింగ్‌ సేవలు..!

ఇది కూడా చదవండి: Gold Price Today: మళ్లీ మొదలైందిరా బాబోయ్‌.. బంగారం, వెండి ధరలు పరుగులే.. పరుగులు!

మరిన్ని బిజినెస్ వార్తల కోసం ఇక్కడ క్లిక్‌ చేయండి