బ్యాంక్ లాకర్లో ఉన్న మీ బంగారం పోతే.. నష్టపరిహారం వస్తుందా? రూల్స్ ఇవే
బ్యాంకు లాకర్లో బంగారం చోరీ అయితే, బ్యాంకు నిర్లక్ష్యం వల్ల నష్టం జరిగితే ఆర్బీఐ నిబంధనల ప్రకారం బ్యాంకు బాధ్యత వహించాలి. వార్షిక అద్దెకు 100 రెట్లు వరకు పరిహారం చెల్లించవచ్చు. ప్రకృతి వైపరీత్యాలకు బ్యాంకు బాధ్యత వహించదు. మీ వస్తువుల బిల్లులు, ఫొటోలు భద్రపరుచుకోవడం, నష్టం జరిగితే వెంటనే ఫిర్యాదు చేయడం అవసరం.
బ్యాంక్ లాకర్లలో భద్రపరిచిన బంగారం చోరీ అయిన ఘటనలు ఈ మధ్యకాలంలో ఎక్కువగా వినిపిస్తున్నాయి. ఇలాంటి ఘటనలు జరిగినప్పుడు ఖాతాదారుల్లో ఒక ప్రధాన సందేహం తలెత్తుతుంది. లాకర్లో ఉన్న బంగారం పోతే బ్యాంకు నష్టపరిహారం చెల్లిస్తుందా? లేదా? చెల్లిస్తే ఎంత ఇస్తుంది? అనే డౌట్లు ఉంటాయి. అయితే దీని గురించి భారతీయ రిజర్వ్ బ్యాంక్ నిబంధనల్లో స్పష్టమైన మార్గదర్శకాలు ఉన్నాయి. ఆర్బీఐ లాకర్ నిబంధనల ప్రకారం.. లాకర్లో ఉంచిన వస్తువుల వివరాలను బ్యాంకులు సాధారణంగా నమోదు చేయవు. అందువల్ల లాకర్లో ఏమి ఉంచారో తెలుసుకునే బాధ్యత పూర్తిగా ఖాతాదారుదే. అయితే బ్యాంకు నిర్లక్ష్యం, ఉద్యోగుల మోసం, భద్రతా లోపాలు లేదా లాకర్ నిర్వహణలో వైఫల్యం కారణంగా ఆస్తులు పోయినట్లు నిర్ధారణ అయితే, బ్యాంకు బాధ్యత నుంచి తప్పించుకోలేదు.
ఇలాంటి సందర్భాల్లో ఖాతాదారులకు నష్టపరిహారం చెల్లించాల్సి ఉంటుంది. ప్రస్తుతం అమల్లో ఉన్న నిబంధనల ప్రకారం, బ్యాంకు లాకర్ వార్షిక అద్దెకు 100 రెట్లు వరకు పరిహారం ఇవ్వాల్సి ఉంటుంది. ఉదాహరణకు ఒక లాకర్కు ఏడాదికి రూ.5,000 అద్దె ఉంటే, గరిష్టంగా రూ.5 లక్షల వరకు నష్టపరిహారం పొందే అవకాశం ఉంటుంది. అయితే ప్రకృతి వైపరీత్యాలు, భూకంపాలు, వరదలు, అగ్నిప్రమాదాలు, యుద్ధ పరిస్థితులు లేదా ప్రభుత్వ ఆదేశాల వల్ల జరిగిన నష్టాలకు బ్యాంకులను బాధ్యులను చేయలేమని ఆర్బీఐ పేర్కొంది. కానీ అలాంటి పరిస్థితుల్లో కూడా తగిన భద్రతా చర్యలు తీసుకోకపోతే బాధ్యతపై విచారణ జరగవచ్చు.
లాకర్లో విలువైన వస్తువులు ఉంచే వారు వాటి ఫొటోలు, బిల్లులు, స్వచ్ఛత ధ్రువపత్రాలు, అంచనా విలువ పత్రాలు వంటి ఆధారాలను భద్రంగా ఉంచుకోవాలని నిపుణులు సూచిస్తున్నారు. ఏదైనా నష్టం జరిగినప్పుడు ఇవి కీలక సాక్ష్యాలుగా ఉపయోగపడతాయి. లాకర్లోని వస్తువులు కనిపించకపోతే వెంటనే సంబంధిత బ్యాంకు శాఖకు ఫిర్యాదు చేయాలి. సమస్య పరిష్కారం కాకపోతే బ్యాంకు ఉన్నతాధికారులు, బ్యాంకింగ్ ఒంబుడ్స్మన్ లేదా వినియోగదారుల కోర్టును ఆశ్రయించే అవకాశం ఖాతాదారులకు ఉంటుంది. అందువల్ల లాకర్ను ఉపయోగించే ప్రతి ఒక్కరూ ఆర్బీఐ నిబంధనలను తెలుసుకొని జాగ్రత్తలు పాటించడం అవసరం.
మరిన్ని బిజినెస్ వార్తల కోసం ఇక్కడ క్లిక్ చేయండి