Numerology: ఈ తేదీల్లో పుట్టిన పిల్లలకు.. తల్లిదండ్రుల మాటే వేదవాక్కు..!

Numerology

ప్రతి తల్లిదండ్రులు తమ పిల్లలు తమ మాట వినాలని, పెద్దలను గౌరవించాలని, క్రమశిక్షణతో మెలగాలని కోరుకుంటారు. అయితే పిల్లల స్వభావం ఒక్కొక్కరిలో ఒక్కోలా ఉంటుంది. కొందరు తల్లిదండ్రుల సలహాలను శ్రద్ధగా పాటిస్తే, మరికొందరు తమ సొంత అభిప్రాయాలకే ప్రాధాన్యత ఇస్తుంటారు. సంఖ్యాశాస్త్రం(Numerology) ప్రకారం కొన్ని తేదీల్లో పుట్టిన పిల్లలు కుటుంబ బంధాలకు, పెద్దల మాటలకు ఎక్కువ ప్రాధాన్యత ఇస్తారని నమ్ముతారు. ముఖ్యంగా 2, 4, 6 మూలాంకాల పిల్లల్లో ఈ లక్షణాలు ఎక్కువగా కనిపిస్తాయని చెబుతారు.

మూలాంకం 2

ఏ నెలలోనైనా 2, 11, 20, 29 తేదీల్లో జన్మించిన పిల్లల మూలాంకం 2. సంఖ్యాశాస్త్రం ప్రకారం ఈ మూలాంకానికి చంద్రుడు అధిపతి. ఈ పిల్లలు సున్నిత మనస్తత్వం కలిగి, కుటుంబ సభ్యులతో భావోద్వేగ అనుబంధాన్ని ఏర్పరచుకుంటారు. తల్లిదండ్రుల భావాలను అర్థం చేసుకోవడానికి ప్రయత్నిస్తారు. వారి మనసు బాధపడకుండా వ్యవహరించడానికి ఇష్టపడతారు. పెద్దల సలహాలను గౌరవించడం, కుటుంబంలో ప్రశాంత వాతావరణాన్ని కోరుకోవడం వీరి ప్రత్యేకతలు.

మూలాంకం 4

ఏ నెలలోనైనా 4, 13, 22, 31 తేదీల్లో జన్మించిన పిల్లల మూలాంకం 4. సంఖ్యాశాస్త్రంలో ఈ సంఖ్యను రాహువుతో అనుసంధానిస్తారు. ఈ మూలాంకం పిల్లలు ఆచరణాత్మకంగా ఆలోచిస్తారు. తమ పనులను క్రమపద్ధతిలో పూర్తి చేయడానికి ఇష్టపడతారు. ఇంట్లో పెద్దలు ఏర్పాటు చేసిన నియమాలను పాటించడం, బాధ్యతలను సక్రమంగా నిర్వర్తించేందుకు ప్రాధాన్యత ఇస్తారు. చదువు, రోజువారీ పనులు, ఇతర బాధ్యతల విషయంలో క్రమశిక్షణతో ఉండే అవకాశం ఉంది.

మూలాంకం 6

ఏ నెలలోనైనా 6, 15, 24 తేదీల్లో జన్మించిన పిల్లల మూలాంకం 6. ఈ సంఖ్యకు శుక్రుడు అధిపతిగా పరిగణిస్తారు. సంఖ్యాశాస్త్రం ప్రకారం ఈ పిల్లలు ప్రేమ, అనుబంధం, కుటుంబ సంబంధాలకు ఎక్కువ విలువ ఇస్తారు. తల్లిదండ్రులు, పెద్దల పట్ల గౌరవంతో మెలగడం, కుటుంబ సభ్యులతో సఖ్యతగా ఉండటం, ఇంట్లో ప్రశాంతతను కోరుకోవడం వీరి ప్రత్యేకతలు. తమకు ఇష్టమైన వారితో అనుబంధాన్ని కాపాడుకోవడానికి ప్రయత్నిస్తారు.

(గమనిక: మూలాంకాలకు సంబంధించిన ఈ లక్షణాలు సంఖ్యాశాస్త్ర విశ్వాసాల ఆధారంగా చెప్పబడినవి. వీటికి శాస్త్రీయంగా నిర్ధారిత ఆధారాలు లేవు)