Andhra Pradesh: సరదాగా మొదలైన అలవాటు మెడకు చుట్టేసుకుంది.. ఈ యువకుడి జీవితంలో ఏం జరిగిందంటే..?
చేతిలో స్మార్ట్‌ఫోన్.. రాత్రికి రాత్రే కోటీశ్వరులు అయిపోవాలనే అత్యాశ.. వెరసి మరో నిండు ప్రాణం బలైపోయింది. ఆన్‌లైన్ క్రికెట్ బెట్టింగుల ఊబిలో చిక్కుకుని, లోన్ యాప్‌ల వేధింపులు తాళలేక నంద్యాల జిల్లాకు చెందిన ఓ 23 ఏళ్ల యువకుడు కత్తితో గొంతు కోసుకుని ప్రాణాలు తీసుకున్నాడు. కూలీ నాలీ చేసుకునే ఆ నిరుపేద కుటుంబానికి తీరని శోకాన్ని మిగిల్చిన ఈ హృదయవిదారక ఘటన గురించి ఈ స్టోరీలో తెలుసుకుందాం..
స్మార్ట్‌ఫోన్ చేతిలో ఉంటే చాలు.. క్షణాల్లో కోటీశ్వరులు కావొచ్చంటూ ఆశచూపే ఆన్‌లైన్ బెట్టింగ్‌లు, సులువుగా డబ్బులిచ్చే లోన్ యాప్‌లు నిండు ప్రాణాలను బలిగొంటున్నాయి. సరదాగా మొదలై వ్యసనంగా మారిన క్రికెట్ బెట్టింగ్, ఆపై లోన్ యాప్‌ల నిర్వాహకుల వేధింపులు తాళలేక ఓ నిరుపేద యువకుడు కత్తితో గొంతు కోసుకుని బలవన్మరణానికి పాల్పడ్డాడు. ఈ హృదయవిదారక ఘటన నంద్యాల జిల్లా బనగానపల్లె మండలంలో తీవ్ర విషాదాన్ని నింపింది. నంద్యాల జిల్లా బనగానపల్లె మండలం నందివర్గం గ్రామానికి చెందిన తిరుపాలు, అన్నపూర్ణ దంపతులది నిరుపేద కుటుంబం. రెక్కాడితే గానీ డొక్కాడని స్థితిలో రోజూ కూలీ పనులకు వెళ్తూ కుటుంబాన్ని నెట్టుకొస్తున్నారు. వీరికి ఇద్దరు కొడుకులు, ఒక కూతురు ఉన్నారు. కష్టపడి పిల్లలను ప్రయోజకులను చేయాలని ఈ దంపతులు తాపత్రయపడేవారు. వీరి పెద్ద కుమారుడు మనోహర్ (23) పదో తరగతి వరకు చదువుకుని, కుటుంబానికి చేదోడువాదోడుగా ఉండేందుకు స్థానిక కిరాణా దుకాణంలో గుమస్తాగా పనిచేస్తున్నాడు.
బెట్టింగ్ ఊబి.. లోన్ యాప్‌ల ఉచ్చు
సజావుగా సాగుతున్న వీరి జీవితంలోకి ఆన్‌లైన్ బెట్టింగ్ భూతం ప్రవేశించింది. కొందరు స్నేహితుల ద్వారా మనోహర్‌కు ఆన్‌లైన్ క్రికెట్ బెట్టింగ్‌లు ఆడటం అలవాటైంది. బెట్టింగ్‌లో నష్టాలు రావడంతో పోగొట్టుకున్న డబ్బును తిరిగి సంపాదించాలనే తాపత్రయంతో పలు లోన్ యాప్‌ల ద్వారా అప్పులు తీసుకోవడం మొదలుపెట్టాడు. అలా సుమారు రూ.6 లక్షల వరకు అప్పులు చేసి, ఆ మొత్తాన్ని కూడా బెట్టింగ్‌లలో పోగొట్టుకున్నాడు.
వేధింపులు తాళలేక బలవన్మరణం
తీసుకున్న డబ్బు చెల్లించాలంటూ లోన్ యాప్ నిర్వాహకుల నుంచి తీవ్ర ఒత్తిళ్లు, వేధింపులు మొదలయ్యాయి. కనీస ఆదాయం లేని స్థితిలో అంత పెద్ద మొత్తంలో అప్పు తీర్చే దారి కనిపించక మనోహర్ తీవ్ర మానసిక క్షోభకు గురయ్యాడు. దీంతో జీవితంపై విరక్తి చెందిన అతడు, ఇంట్లో ఎవరూ లేని సమయం చూసి కూరగాయలు తరిగే కత్తితో తన గొంతు స్వయంగా కోసుకున్నాడు. రక్తపు మడుగులో కొట్టుమిట్టాడుతున్న మనోహర్‌ను గమనించిన కుటుంబసభ్యులు, స్థానికులు వెంటనే కర్నూలు ప్రభుత్వ ఆసుపత్రికి తరలించారు. అక్కడ అత్యవసర చికిత్స పొందుతూ పరిస్థితి విషమించి అతడు తుదిశ్వాస విడిచాడు. చేతికందివచ్చిన కొడుకు కళ్లముందే విగతజీవిగా మారడంతో తల్లిదండ్రులు కన్నీరుమున్నీరవుతున్నారు. ఈ ఘటనపై నందివర్గం పోలీసులు కేసు నమోదు చేసుకుని, సదరు లోన్ యాప్‌ల వ్యవహారంపై దర్యాప్తు ప్రారంభించారు. ఆన్‌లైన్ బెట్టింగ్‌లు, లోన్ యాప్‌ల పట్ల యువత, వారి తల్లిదండ్రులు అప్రమత్తంగా ఉండాలని ఈ సందర్భంగా పోలీసులు హెచ్చరిస్తున్నారు.