నర్సాపూర్‌కు దగ్గరలో అర్నబ్ భీకర తుఫాన్.. ఈ ప్రాంతాలకు ఫ్లాష్ ఫ్లడ్స్ అలర్ట్.. ఇదిగో లేటెస్ట్ అప్డేట్
అర్నబ్ తీవ్ర తుపాను తీరాన్ని తాకింది. యానాం సమీపంలో తీవ్ర తుఫాను తీరం దాటుతుందని వాతావరణ శాఖ తెలిపింది. గంటకు 150 కిలోమీటర్ల వేగంతో గాలులు వీచే ప్రమాదం, సముద్ర అలల ఉద్ధృతి, ఆకస్మిక వరదల ముప్పు నేపథ్యంలో ఆంధ్రప్రదేశ్‌లోని పలు జిల్లాలకు హెచ్చరికలు జారీ చేశారు.
అమరావతి / యానాం: తీరప్రాంత ప్రజలను తీవ్ర భయాందోళనలకు గురిచేస్తూ భీకర అర్నబ్ తీవ్ర తుఫాను (Severe Cyclonic Storm Arnab) తీరాన్ని తాకింది. ప్రస్తుతం ఇది తీరానికి అత్యంత సమీపంలో కొనసాగుతోంది. నర్సాపూర్‌కు తూర్పున కేవలం 30 కిలోమీటర్ల దూరంలో, యానానికి 45 కిలోమీటర్ల దూరంలో కేంద్రీకృతమైన ఈ తుఫాను సరిగ్గా యానాం సమీపంలో తీరం దాటుతుందని భారత వాతావరణ శాఖ (IMD) వెల్లడించింది. తీరం దాటే ఈ ప్రక్రియ మరో రెండు గంటల పాటు కొనసాగనుంది.
ప్రస్తుతం తీరం వెంబడి గంటకు 125 నుండి 135 కిలోమీటర్ల వేగంతో పెనుగాలులు వీస్తున్నాయి. రాబోయే 3 గంటల్లో ఈ ఈదురుగాలుల వేగం గరిష్టంగా గంటకు 150 కిలోమీటర్లకు చేరే అవకాశం ఉందని వాతావరణ శాఖ తీవ్రంగా హెచ్చరించింది. గడిచిన 3 గంటల్లో ఈ తుఫాను గంటకు కేవలం 3 కిలోమీటర్ల అత్యంత నెమ్మది వేగంతో కదిలింది. తుఫాను వేగం మందగించడంతో తీరప్రాంతాలపై దీని ప్రభావం, దాడుల తీవ్రత మరికొన్ని గంటల పాటు దీర్ఘకాలికంగా కొనసాగే ప్రమాదం ఏర్పడింది. ఈ మేరకు ఆంధ్రప్రదేశ్ తీరప్రాంతంతో పాటు దక్షిణ ఒడిశా తీరానికి ఐఎండీ అత్యంత తీవ్రమైన అలర్ట్ జారీ చేసింది.
తుఫాను తీవ్రత కారణంగా కాకినాడ, యానాం తీరప్రాంతాల్లో సముద్రం తీవ్రంగా అల్లకల్లోలంగా మారింది. సాధారణం కంటే 2.5 మీటర్ల ఎత్తు వరకు సముద్ర అలలు రాకాసి లేతల్లా ఎగసిపడుతున్నాయి. ఈ ఎగసిపడే అలల వల్ల కాకినాడ, యానాం పరిసర లోతట్టు ప్రాంతాల్లోకి సముద్రపు నీరు చొచ్చుకువచ్చి తీవ్రమైన ఉప్పెన (Storm Surge) వచ్చే ప్రమాదం ఉందని అధికారులు స్పష్టం చేశారు. స్థానిక ప్రజలు అత్యంత అప్రమత్తంగా ఉండాలని సూచించారు.
ఫ్లాష్ ఫ్లడ్ అలర్ట్
తుఫాను ప్రభావంతో ఆకస్మిక వరదలు వచ్చే ముప్పు ఉందని వాతావరణ శాఖ తెలిపింది. బాపట్ల, గుంటూరు, కృష్ణ, ఎన్టీఆర్, ఏలూరు, వెస్ట్ గోదావరి, కోనసీమ, ఈస్ట్ గోదావరి, కాకినాడ, అల్లూరి జిల్లా, అనకాపల్లి, విశాఖపట్నం, విజయనగరం, శ్రీకాకుళం, పార్వతిపురం మన్యం జిల్లాలకు ఫ్లాష్ ఫ్లడ్ అలర్ట్ జారీ చేశారు. ఏ సమయంలోనైనా ఆకస్మిక వరదలు వచ్చే అవకాశం ఉందని ప్రకటించారు.
తీరం దాటే ప్రక్రియ పూర్తియ్యే వరకు, ఈదురుగాలుల వేగం తగ్గేవరకు ప్రజలు ఎవరూ ఇళ్ల నుంచి బయటకు రాకూడదు. కరెంట్ స్తంభాలు, పాత భవనాలు, పెద్ద చెట్ల కింద నిలబడవద్దని, అధికారిక యంత్రాంగం ఇచ్చే హెచ్చరికలను నిరంతరం గమనిస్తూ సురక్షిత ప్రాంతాల్లోనే ఉండాలని ప్రభుత్వం విజ్ఞప్తి చేస్తోంది.
