Andhra: పార్టీలకు రెబల్స్‌ రివర్స్‌ షాక్‌.. అధికారిక గుర్తు లేకున్నా గెలుపు..
ఏపీ మున్సిపల్‌ ఎన్నికల్లో కూటమి ఆధిపత్యం కొనసాగినప్పటికీ, రెబల్‌ అభ్యర్థులు కూడా తమ సత్తా చాటారు. టికెట్లు దక్కకపోవడంతో స్వతంత్రులుగా బరిలోకి దిగిన పలువురు నేతలు విజయం సాధించారు. విశాఖలో ఎనిమిది మంది, పిఠాపురంలో పది మంది స్వతంత్రులు గెలుపొందగా.. నెల్లిమర్ల, సాలూరులో రెబల్‌ అభ్యర్థులు ఏకంగా చైర్‌పర్సన్‌ పీఠాలను దక్కించుకున్నారు.
ఏపీ మున్సిపల్‌ ఎన్నికల్లో కూటమి హవా కనిపించింది. కానీ అదే సమయంలో రెబల్స్‌ కూడా పార్టీలకు షాక్‌ ఇచ్చారు. టికెట్‌ రాలేదని వెనక్కి తగ్గలేదు. పార్టీ గుర్తు లేకుండానే స్వతంత్రులుగా పోటీ చేశారు. కొన్ని చోట్ల వార్డులు గెలిచారు. మరికొన్ని చోట్ల ఏకంగా చైర్‌పర్సన్‌ పీఠాలనే దక్కించుకున్నారు. విశాఖ నుంచి పిఠాపురం వరకు.. నెల్లిమర్ల నుంచి సాలూరు వరకు తమ సత్తా చూపించారు. కూటమి గెలుపు మధ్య రెబల్స్‌ విజయాలు ఇప్పుడు పార్టీల్లో చర్చగా మారాయి.
విశాఖలో ఎనిమిది.. పిఠాపురంలో పది
GVMC ఎన్నికల్లో సుమారు 40 మంది రెబల్స్‌ స్వతంత్రులుగా పోటీ చేశారు. వీరిలో ఎనిమిది మంది గెలిచారు. 36, 39, 41, 73, 86, 98, 106, 118 వార్డులను స్వతంత్రులు కైవసం చేసుకున్నారు.
వీరిలో కొందరు TDP, జనసేన టికెట్లు ఆశించి భంగపడిన నేతలే. కొన్ని చోట్ల ఒకే కూటమి నుంచి ఇద్దరు, ముగ్గురు రెబల్స్‌ పోటీకి దిగారు. దీంతో అధికారిక అభ్యర్థుల ఓట్లు చీలిందనే చర్చ జరిగింది. విశాఖలో కూటమి 120 వార్డులకు గాను 98 గెలిచినా.. రెబల్స్‌ గెలుపు మాత్రం నాయకులకు కొత్త తలనొప్పిగా మారింది.
పవన్‌ కల్యాణ్‌ ప్రాతినిధ్యం వహిస్తున్న పిఠాపురంలోనూ ఇదే జరిగింది. అక్కడ చైర్‌పర్సన్‌ పీఠం జనసేనకు దక్కింది. కానీ పలు వార్డుల్లో స్వతంత్రులు గెలిచారు. పది మంది స్వతంత్రులు గెలిచారు. జనసేన, TDP, వైసీపీల్లో టికెట్‌ రాని అసంతృప్త నేతలు స్వతంత్రులుగా బరిలోకి దిగారు. అంటే పార్టీకి ఓటేస్తూనే.. తమకు నచ్చిన స్థానిక నాయకుడిని కూడా గెలిపించారన్న మాట.
నెల్లిమర్ల, సాలూరులో పీఠాలే సొంతం
రెబల్స్‌ ప్రభావం వార్డులకే పరిమితం కాలేదు. నెల్లిమర్లలో TDP టికెట్‌ ఆశించి భంగపడిన లంక అప్పలనాయుడు స్వతంత్రంగా పోటీ చేసి చైర్‌పర్సన్‌గా గెలిచారు. సాలూరులో TDP రెబల్‌ జి. అరుణ కూడా స్వతంత్ర అభ్యర్థిగా విజయం సాధించారు. కర్నూలు జిల్లా ఆదోనిలో జనసేన రెబల్‌ అధికారిక BJP అభ్యర్థిపై గెలిచారు. టికెట్‌ లేకపోయినా.. తమకున్న స్థానిక బలంతో ఈ నేతలు గెలవడం పార్టీలకు గట్టి సందేశమే.
రెబల్స్‌ వెనుక ఉన్న బలమేంటి
ఈ గెలుపుల వెనుక స్థానిక పరిచయాలు, ప్రజల్లో ఉన్న పేరు ప్రధానంగా కనిపిస్తున్నాయి. కొందరు ఏళ్లుగా ప్రజలకు అందుబాటులో ఉన్నారు. స్థానిక సమస్యలపై పనిచేశారు. మరికొందరికి బలమైన అనుచరగణం ఉంది. టికెట్‌ రాకపోవడంతో అదే బలాన్ని నమ్ముకుని స్వతంత్రులుగా పోటీ చేశారు. కొన్ని చోట్ల కులం, కుటుంబం, వ్యాపార వర్గాల మద్దతు కూడా కలిసొచ్చి ఉండొచ్చు. పార్టీ గుర్తు కంటే అభ్యర్థి ఎవరు అన్నదానికే ఓటర్లు ప్రాధాన్యం ఇచ్చినట్లు కనిపిస్తోంది. రాజకీయాల్లో ఓ మాట ఉంది. పార్టీ జెండా నీడనిస్తుంది. కానీ ఓటు మాత్రం వ్యక్తి వెంట నడుస్తుంది. ఈ ఎన్నికల్లో కొన్ని చోట్ల అదే జరిగింది. పార్టీలు తమకు నచ్చిన వారికి టికెట్లు ఇచ్చాయి. ఓటర్లు మాత్రం తమకు నచ్చిన వారిని గెలిపించారు. పాత నేతలను పక్కనపెట్టారా, కొత్తవారికి అవకాశం ఇచ్చారా, కుటుంబ సభ్యులకు టికెట్లు ఇచ్చారా అన్న చర్చ కూడా మొదలైంది.
కుటుంబాలు, వర్గాల మధ్య పోరు
కొన్ని చోట్ల టికెట్ల కేటాయింపుపై కుటుంబాలు, వర్గాల మధ్య అసంతృప్తి ఉందనే చర్చ జరుగుతోంది. ఏళ్లుగా పార్టీ కోసం పనిచేసిన వారిని పక్కనపెట్టడం, స్థానికంగా బలమున్న వారికి టికెట్‌ ఇవ్వకపోవడం తిరుగుబాట్లకు కారణమై ఉండొచ్చు. కుటుంబాల మధ్య ఆధిపత్య పోరు కూడా కొన్ని చోట్ల ప్రభావం చూపి ఉండొచ్చు. అయితే ప్రతి రెబల్‌ గెలుపునకు ఇదే కారణమని చెప్పలేం. ఒక్కో చోట పరిస్థితి ఒక్కోలా ఉంటుంది.
ఇప్పుడు రెబల్స్‌ కింగ్‌మేకర్లా
గెలిచిన స్వతంత్రుల పాత్ర ఇప్పుడు కీలకం కానుంది. వీరు అధికార పార్టీలతో కలుస్తారా, స్వతంత్రంగానే ఉంటారా, మళ్లీ పాత పార్టీల్లో చేరతారా అన్నది ఆసక్తికరంగా మారింది. పార్టీ అండ లేకుండా గెలిచిన వీరికి అభివృద్ధి పనులు చేయించుకోవడం కూడా సవాలే. గెలిపించిన ప్రజల నమ్మకాన్ని నిలబెట్టుకోవడమే ఇప్పుడు అసలైన పరీక్ష.
పార్టీలకు గుణపాఠం
ఈ ఫలితాలు పార్టీ పెద్దలకు ఓ పాఠం చెబుతున్నాయి. టికెట్లు ఇచ్చేటప్పుడు నాయకుల సిఫార్సులు, పొత్తుల లెక్కలే కాదు. స్థానికంగా ఎవరికి ప్రజాబలం ఉందో కూడా చూడాలి. ప్రజల్లో పట్టున్న నేతలను పక్కనపెడితే.. వాళ్లే స్వతంత్రులుగా మారి పార్టీ అభ్యర్థులకు పోటీ ఇస్తారు. ఈ పరిణామాలు వచ్చే ఎన్నికల్లో టికెట్ల కేటాయింపుపై ప్రభావం చూపొచ్చు. వార్డుల్లో గెలిచిన నేతలు రేపు పెద్ద రాజకీయాల్లోకి రావాలని కూడా అనుకోవచ్చు.
మొత్తానికి ఏపీ పురపోరులో కూటమి ఆధిపత్యం ఒకవైపు ఉంటే, రెబల్స్‌ విజయాలు మరోవైపు పార్టీలకు గట్టి సందేశం ఇచ్చాయి. విశాఖలో వార్డులు, పిఠాపురంలో స్థానాలు, నెల్లిమర్ల, సాలూరులో చైర్‌పర్సన్‌ పీఠాలు.. ఇలా తమ బలాన్ని చూపించారు. పార్టీలు టికెట్లు పంచాయి. ఓటర్లు మాత్రం తమ తీర్పు చెప్పారు. జెండా లేకపోయినా జనబలం ఉంటే గెలవొచ్చని రెబల్స్‌ నిరూపించారు. వీరి తిరుగుబాటు రాబోయే రోజుల్లో పార్టీల్లో ఇంకెన్ని మార్పులు తెస్తుందో చూడాలి.
కొండవీటి శివనాగరాజు
డిప్యూటీ అవుట్ ఫుట్ ఎడిటర్, టీవీ9.